'Măng sơlam Đăk Long (xah Đăk Long, apŭng Đăk Glei, dêh char Kon Tum) -Văng Tắt (dêh char  Attapư) dang ei 'măn ăn tơdrong kăl vih vơ̆t năm hơpeh hơpong unh hnam 'nhŏng oh păng chơ tơmam drăm kơ 2 dêh char đĕch noh ưh đei pơih să lơ̆m tơdrong hơtŏk jang hadoi kơ dôm tơring nai kơ teh đak Việt Nam păng dôm tơring nai kơ teh đak Lào.

Tơ̆ jơ pơma đam, rim kơdră kơpal kơ dêh char Kon Tum păng dêh char Atapư adoi akhan, tơdrong ming hơmet 'măng sơlam teh Đăk Long - Văng Tắt jing 'măng sơlam dơnơm 'noh gĭt kăl tơpă, pơm trong hiôk ăn tơdrong mơ̆t lĕch gah ou gah to; hơtŏk tơdrong jang hadoi gah asong jang, tĕch pơdro, tơmang pơhiơ̆; trŏ ƀlep hăm tơchơ̆t jang hơtŏk mŭk drăm hơtŭm kơ tơring, pơm trong jang mŭk drăm ăn dôm dêh char Pơbah teh đak Lào păng dôm dêh char tơring Tŏk bŏk, Tây Nguyên…Tơ̆ jơ pơma đam, kơdră dêh char Kon Tum păng Attapư hlôi pơđăp, drơ̆ng nơ̆r kĭ hla bar tơchơ̆t ming hơtŏk 'măng sơlam teh Đak Long -Văng Tắt jing 'măng sơlam dơnơm.