Hơnih tơm Hà Nội dang ei tŏk bŏk tơjră muh măt hăm lơ tơdrong long lơ̆m au đei ‘mê̆ ‘mach cham char, mă kăl cham char kial.

Ƀok Nguyễn Minh Tấn, Kơ iĕng Kơdră Hơnih vei lăng Mŭk drăm bri brăh păng Cham char Hà Nội tơbăt, vă xek tơlang tơdrong au, pơlei tơm hlôi chă tơchĕng hơlen, tơ iung pơjing păng jang kiơ̆ rim trong jang păng tơdrong vă jang găh vei lăng cham char păng tŏ ‘mi kial, pơjing tơlĕch rim trong pơprŏ jang, trong jang kăl vă hơmet pơ ‘lơ̆ng cham char, iung tơjră tang găn tơplih tŏ ‘mi kial lăng truh atŏk tơ iung kơjăp ‘lơ̆ng ăn Hơnih tơm nhen Trong pơprŏ vei lăng ‘lơ̆ng cham char truh sơnăm 2030, lăng truh sơnăm 2050, Tơdrong vă jang hơmet ming rim thoong đak kroong lơ̆m hơnih tơm, Trong pơ prŏ jang tơjră tang găn tơplih to ‘mi kial jăl jang 2025-2030.