Hơiă hăm ƀok Charles R. Kaye, Kơdră chĕp kơ̆l Công ty Warburg Pincus, 1 lơ̆m dôm Anih mong jên tơmât jang tơm kơ teh đak Mi truh hơpong păng bơ̆ jang tơ̆ Việt Nam, Phó Thủ tướng Lê Minh Khái pơma hơdăh, Việt Nam hơnơ̆ng năng năng Mi jĭ 1 lơ̆m dôm teh đak jang hơdoi gĭt kăl hlŏh. Tơchĕng ‘lơ̆ng Công ty Warburg Pincus jang hơdoi đei jơnei hăm lơ anih tĕch mơdro tih, đei bưng ai tơ̆ Việt Nam, Phó Thủ tướng hơpơi ‘mĕh Warburg Pincus hơnơ̆ng tơchĕng hơlen, pơih xă tơdrong pơvei jang hơdoi hăm dôm anih tĕch mơ dro păih Việt Nam, tơmât jên jang ‘lơ̆ng lơ̆m dôm tơdrong jang ‘nao.

Athei Warburg Pincus đei lơ anih jang tih lơ̆m apŭng plenh tĕh hơnơ̆ng jing gơng tơroh vă hơnhăk dôm anih tơmât jên jang đơ̆ng Mi pơma hơdrô̆ păng tĕh đak đe pơma atŭm truh tơmât jên jang xa tơ̆ Việt Nam. Akhan vă hơnơ̆ng pơih xă jên tơmât jang tơ̆ Việt Nam đơ̆ng Anih mong jên tơ̆ hơnăp kơnh, ƀok Charles R. Kaye ăn tơbăt, dang ei đei tôch lơ anih jang tih đơ̆ng Mi, tơchĕng ‘lơ̆ng păng tơƀôh đon ‘mĕh tơmât jên jang xa tơ̆ Việt Nam; hơdai hăm ‘nŏh tơlĕch 1,2 nơ̆r pơma apinh hăm kơdră chĕp kơ̆l tĕh đak Việt Nam.