Quân đoàn 3 đei pơjing lơ̆m ‘năr 26/3/1975 ‘moi kiơ̆ đơ̆ng tơmât hơdai grŭp ƀô đô̆i tơm tơ̆ kơdrăn tơblăh Tây Nguyên jing Quân đoàn tơblăh tơm dơnơm. Quân đoàn 3 hlôi tơƀôh hơdăh hơnăp jang jĭ khul linh tơm, tơgop gĭt kăl lơ̆m tơdrong tơblăh iŏk rơngei Tây Nguyên, năm truh tơdrong tơblăh iŏk rơngei đĭ đăng tơring Pơbăh, pơjing đei 1 teh đak kơjăp ‘lơ̆ng lơ̆m ‘năr 30/4/1975.

Lơ̆m tơdrong jang tơiung pơjing, vei lăng teh đak, Quân đoàn 3 hơnơ̆ng oei xa, bơ̆ jang hơdoi kơjăp hăm khul kơdră chĕp kơ̆l đảng, khul kơdră pơgơ̆r tơring păng kon pơlei dôm hơdrĕch hơdrung tơ̆ tơring pơm kơđông oei; tơgop gĭt kăl ăn tơdrong jang tŏk mŭk drăm, vei sơđơ̆ng teh đak tơ̆ Gia Lai pơma hơdrô̆, dôm dêh char tơ̆ Tây Nguyên pơma atŭm.

Hăm dôm tơdrong jơnei gĭt kăl lơ̆m khei ‘năr tơblăh păng bơ̆ jang tơiung pơjing, vei lăng teh đak, Quân đoàn 3 chơt hơiă đei Đảng păng teh đak hơpăh ăn hơnăn Khul linh tơblăh kơtang nuih mơng kơ kon pơlei lơ̆m ‘năr 20/12/1979; 81 khul grŭp păng 47 ‘nu bơngai đei Đảng, teh đak hơpăh ăn hơnăn khul linh tơblăh kơtang nuih mơng kơ kon pơlei. Lơ̆m noh đei 9 khul grŭp đei pôk pơ ư hơnăn khul linh tơblăh kơtang nuih mơng ‘măng mă 2; Lữ đoàn CB7 păng Trung đoàn BB66 đei pôk pơ ư, hơpăh ăn hơnăn khul linh tơblăh kơtang nuih mơng ‘măng mă 3 lơ̆m chăl tơplih ‘nao.