Til pơgê, Quốc hội pơgơ̆r hop akŏm hơmet lê̆ hơdrol, mơ̆ng dôm tơdrong đei: Kơdră jang lơ̆m Anih chĕp kơ̆l pơgơ̆r Quốc hội, Tổng Thư ký Quốc hội – Kơdră Anih pơvih ăn Quốc hội Bùi Văn Cường tơroi, chih akŏm, hơmet ming dôm tơdrong vă pơma nuh tơ̆ hop akŏm. Đơ̆ng rŏng kơ ‘nŏh, Quốc hội pơma nuh păng pơdrơ̆ng nơ̆r ăn tơdrong vă bơ̆ jang lơ̆m hop akŏm. Đang kơ ‘nŏh, Kơdră jang lơ̆m Anih chĕp kơ̆l pơgơ̆r Quốc hội, Kơdră Anih vei lăng tơdrong jang kơ Bơngai tang măt găh Anih chĕp kơ̆l pơgơ̆r Quốc hội Nguyễn Thị Thanh pơre Hla ar chih tơroi đơ̆ng Anih chĕp kơ̆l pơgơ̆r Quốc hội găh tơdrong asong pơdơ̆h jang pơm bơngai tang măt Quốc hội dêh char An Giang hăm ƀok Nguyễng Văn Thạnh.

 4 tơdrong gĭt kăl đei Quốc hội hơlen năng tơ̆ hop akŏm mă âu ‘nŏh: Luơ̆t teh (oei chih hơmet ming), Luơ̆t dôm anih asong tŏk iŏk jên (oei chih hơmet ming), Tơdrong tơchơ̆t găh 1,2 trong pơgơ̆r jang, tơdrong tơgŭm hơdrô̆ vă hơmet pơ ‘lơ̆ng pơmat tat, tơhlăk tăk, hơtŏk hrĕnh tơdrong bơ̆ jang dôm Tơdrong jang tơm kơ teh đak. Păng mă hơtuch ‘nŏh chih hơmet ming Trong tơmât jên jang kơ teh đak đunh păh lăp sơnăm, hăm jên jang trung ương đơ̆ng 2021 -–2025 iŏk đơ̆ng jên đei ‘măn răk hơtŏ hăm jên thu mong kơ trung ương sơnăm 2022 ăn dôm tơdrong tơmât jên jang kơ teh đak păng hơmet ming Trong tơmât jên đunh păh lăp ăn Grŭp jang unh điên Việt Nam đơ̆ng jên ‘măn răk đơ̆ng Trong tơmât jên jang kơ teh đak đunh păh lăp.