Pơgê hei, dôm bơngai tang măt Quốc hội pơma nuh tơ̆ hnam hôp tơm găh tơdrong dăr hơlen sek tơlang kiơ̆ nơ̆r pơma athei đơ̆ng bơngai tăh hla gơih ăn Hop akŏm ‘măng mă 5, Quốc hội jăl 15. Tơroi dôm tơdrong jang đei mưh sek tơlang kiơ̆ nơ̆r apinh đơ̆ng bơngai tăh hla gơih ăn Hop akŏm ‘măng mă 5, Quốc hội jăl 15, Kơdră chĕp kơ̆l Anih vei lăng tơdrong hơpơi ‘mĕh đơ̆ng kon pơlei găh Anih chĕp kơ̆l pơgơ̆r Quốc hội Dương Thanh Bình ăn tơbăt, truh dang ei, 2.751 nơ̆r pơma apinh hlôi đei sek tơlang, tơl tơblang ăn bơngai tăh hla, iŏk đei 99%.

Bơngai tăh hla tơchĕng ‘lơ̆ng khei ‘năr âu ki, tơdrong jang đơ̆ng Quốc hội hlôi đei lơ tơplih ‘nao, đei yoa ‘lơ̆ng, akhan Quốc hội roi đunh roi tơklep kơjăp hăm kon pơlei. Nơ̆r athei đei tơlĕch hăm Quốc hội ‘nŏh, hơnơ̆ng hơtŏk hlŏh dơ̆ng tơdrong ‘lơ̆ng mưh bơ̆ jang dăr lăng tơdrong tơlĕch hla ar hơgăt luơ̆t; dôm Khul tang măt Quốc hội hơtŏk tơdrong ‘lơ̆ng rơgei, chih akŏm, sek tơlang ‘lơ̆ng dôm nơ̆r pơma apinh đơ̆ng bơngai tăh hla.