Kiơ̆ lơ ‘măng pơma dơnuh tơ̆ dôm ‘măng hop akŏm, ‘măng hop akŏm hơdrol, truh dang ei oei đei lơ nơ̆r tơgop pha ra băl jum dăr tơdrong hơgăt găh iŏk ƀao hiêm tơpôl 1 ‘măng, mă đơ̆ng khŭl chih hơmet ming hlôi chih iŏk, hơmet ming dôm trong jang hlôi tơlĕch ăn hơdrol âu ki.

Kiơ̆ kơ Luơ̆t Ƀao hiêm tơpôl (hơmet ming) pơtruh ăn Quốc hội ‘măng âu, tơdrong gơh iŏk ƀao hiêm tơpôl 1 ‘măng hăm bơngai tam mă tôm 20 sơnăm nôp ƀao hiêm tơpôl đei 2 trong. Trong 1, bơngai jang đei klăih song pơm 2 grŭp. Kiơ̆ kơ ‘noh, grŭp bơngai jang pơtơm nôp ƀao hiêm tơpôl đơ̆ng năr Luơ̆t âu đei tơmơ̆t yua tơ̆ kơ pal ‘noh ưh kơ gơh iŏk ƀao hiêm tơpôl 1 ‘măng. Trong mă 2: Bơngai jang gơh iŏk ƀao hiêm tơpôl 1 ‘măng mă lei tôch ai ưh kơ hloh 50% akŏp khei ‘năr hlôi nôp lơ̆m jên mong pơdơh hưu păng jên lôch.