Kơdră Quốc hội Trần Thanh Mẫn akhan, lơ̆m khei ‘năr tơdrong apŭng plĕnh teh đei lơ tơplih, lơ̆m teh đak pơgơ̆r proh hơmet tŏ sĕt bơngai jang, proh hơmet khŭl kơdră chĕp kơ̆l pơgơ̆r 2 tăl gô ƀơm truh pơgơ̆r, vei lăng mŭk drăm - tơpôl. Ƀơ̆t mă tơdrong hơgăt tơlĕch ăn athei iŏk đei jang tŏk sơnăm 2025 ‘noh 8% păng truh sơnăm 2030 ‘noh 2 kơsô̆.

Kơdră Quốc hội pơma hơdăh: Quốc hội vang yak hơdai hăm Khŭl kơdră teh đak, hăm tơdrong chĕp kơ̆l pơgơ̆r đơ̆ng Đảng, hơnơ̆ng hơmet ming tơdrong jang khôi luơ̆t pran kơtang vă pơm lăp hăm ‘meh vă tơpă hơmet pơ ‘lơ̆ng pơmat tat ăn mŭk drăm. Găh mŭk drăm kơdih, Đảng hlôi đei Tơdrong tơchơ̆t 68, Quốc hội pơdrơ̆ng kiơ̆ Tơdrong tơchơ̆t 198 bơih, Khŭl kơdră teh đak ‘noh đei Tơdrong tơchơ̆t 193. Dang ei tơdrong pơgơ̆r tơlĕch jang kiơ̆ pơm liơ vă kơ ‘lơ̆ng, vă 6 khei hơtuch sơnăm jang tŏk đei 8 %.