Hơnơ̆ng bơ̆ jang lơ̆m Hop akŏm mă 8, năr ‘nâu 7/11, Quốc hội pơma nuh găh dôm Luơ̆t ƀơm truh jên hu păng Luơ̆t Unh điên (oei chih hơmet ming). Găh Luơ̆t unh điên (oei chih hơmet ming), kiơ̆ hla ar tơroi, Luơ̆t Unh điên đơ̆ng rŏng 20 sơnăm tơlĕch jang păng 4 vât chih hơmet ming, mă lei truh dang ei oei đei lơ tơdrong ưh kơlăp, tam mă pơm lăp hăm tơdrong ‘mĕh vă bơ̆ jang kiơ̆ dôm trong jang đơ̆ng Đảng hăm tơdrong jang găh unh hơyuh pơma atŭm păng unh điên pơma hơdrô̆.

Luơ̆t unh điên (oei chih hơmet ming) đei 9 chăl hăm 119 apăng, tŏk 60 apăng pơting hăm luơ̆t so. Kiơ̆ bơngai tang măt Nguyễn Quang Huân, khul Bình Dương luơ̆t athei chih hơdăh tơdrong hơgăt găh unh hơyuh rơgŏh vă jang kiơ̆. Tơchĕng hơlen Luơ̆t unh điên (oei chih hơmet ming) bơngai tang măt Cẩm Hà Chung, khul Phú Thọ akhan, luơ̆t athei chih tơdrong phak mă hơdăh ƀiơ̆, veh ver tơdrong chih hrâu atŭm atŭm pơmattat vă jang kiơ̆.