Dôm bơngai tang măt akhan, tơdrong tơlĕch Luơ̆t vă chih hơdăh dôm trong jang đơ̆ng Đảng păng tơdrong tơgŭm đơ̆ng teh đak găh pơjing Khul si kuan khul linh kon pơlei Việt Nam pran kơjăp, pơm lăp hăm tơdrong ‘mĕh vă truh sơnăm 2025 pơjing đei khul linh tŏ sĕt bơngai, gơ̆h hơgei, pran kơtang; pơih trong adrin truh sơnăm 2030 pơjing khul linh kăch mang, chính quy, gơ̆h hơgei.

Găh sơnăm pơvih lơ̆m khul linh kơ đe si kuan ‘nŏh jĭ tơdrong đei lơ bơngai tang măt tơgop nơ̆r, pơma nuh tơ̆ grŭp. Kơdră Quốc hội Trần Thanh Mẫn akhan, tơdrong hơtŏk sơnăm pơdơ̆h hưu hăm si kuan khul linh ‘nŏh tôch lăp. Mă lei, tơ̆ âu tơdrong kăl hlŏh jĭ hơtŏk dôm sơnăm vă pơdui khei ‘năr bơ̆ jang hăm si kuan lơ̆m khul linh mă lăp. Yoa bơ̆ jang lơ̆m khul linh tơblăh, mă loi jĭ khul linh ƀô đô̆i ‘nŏh đei lơ tơdrong pha ra băl, kơna tơdrong ‘nâu Anih chih hơmet athei tơchĕng hơlen mă tôm tơdrong vă gơ̆h chih hơdăh dơ̆ng dôm bơngai yơ gơ̆h pơdơ̆h hưu adrol kơ sơnăm hai vă gơ̆h pơm ‘lơ̆ng ăn rim bơngai.