Hơnơ̆ng bơ̆ jang lơ̆m hop akŏm mă 7, Quốc hội jăl XV, năr ‘nâu (30/5), Quốc hội mât lơ̆m năr bơ̆ jang mă 10, hăm dôm tơdrong gĭt kăl ƀơm truh tơdrong vă bơ̆ jang Dăr lăng đơ̆ng Quốc hội sơnăm 2025; Tơdrong chih pơjing luơ̆t, tơdrong hơgăt sơnăm 2025, hơmet ming Tơdrong jang chih pơjing Luơ̆t, tơdrong hơgăt sơnăm 2024; jô̆ hơlen, chih hơdăh jên thu mong, tơlĕch jang kơ teh đak; Luơ̆t jang kơmăy kơmŏk pơyoa ăn khul linh, vei sơđơ̆ng teh đak păng pơlung jang kơmăy.

Pơih blŭng hop akŏm til pơgê, Quốc hội mơ̆ng Tổng Thư ký Quốc hội pơre hla ar chih Tơblang găh tơdrong Jang dăr lăng đơ̆ng Quốc hội sơnăm 2025; păng akŏm pơma nuh tơ̆ hnam hôp găh Tơdrong jang dăr lăng âu. Đơ̆ng rŏng kơ ‘nŏh, Kơdră jang lơ̆m Anih chĕp kơ̆l pơgơ̆r Quốc hội, Kơdră Anih jang Luơ̆t kơ Quốc hội pơre hla ar chih găh tơdrong jang Chih pơjing Luơ̆t, tơdrong hơgăt sơnăm 2025, hơmet ming Tơdrong chih pơjing luơ̆t, tơdrong hơgăt sơnăm 2024. Đơ̆ng rŏng bai pơre đơ̆ng Kơdră Anih jang luơ̆t kơ Quốc hội, Quốc hội pơma nuh tơ̆ hnam hôp găh dôm tơdrong đei ƀơm truh.