Hmach thơ thâu 99 sơnăm năr hla ar tơroi cách mạng Việt Nam, kơdră chĕp kơ̆l dôm anih jang hlôi gơih nơ̆r hmach thơ thâu ‘lơ̆ng hơiă hloh truh tơpôl kang ƀô̆, kơdră chĕp kơ̆l păng bơngai chih kơtơ̆ng ang, bơngai chih hơmet ming, bơngai jang ki thuơ̆t, bơngai jang kơ Anih radiô nơ̆r pơma Việt Nam. Kơdră dơnơm vei lăng Anih Radiô nơ̆r pơma Việt Nam Đỗ Tiến Sỹ tơbăt, Radiô nơ̆r pơma Việt Nam tŏk bŏk đei dôm hơyak tơplih pran kơ tang vă pơjing Radiô jing anih jang chih kơtơ̆ng ang tơm, lơ kơ loăi, lơ trong, lơ nơ̆r pơma jing anih jang tơroi tơbăt pran tih hloh kơ teh đak, đei bưng ai tơ̆ châu lục păng apŭng plĕnh teh.

Radiô tŏk bŏk hơdrin bơ̆jang kiơ̆ tơplih kơsô̆ hla ar kơtơ̆ng ang kiơ̆ lơ̆m 3 tơdrong tơm ‘noh jĭ: tơdrong kơsô̆, tơroi kơsô̆, tơpôl kơsô̆, lăng ‘nâu jĭ trong jang đei tơdrong ‘lơ̆ng tơchơ̆t truh tơdrong oei đei păng hơtŏk tơiung đơ̆ng dôm anih jang chih kơtơ̆ng ang pơma atŭm păng Radiô nơ̆r pơma Việt Nam pơma hơdrô̆ lơ̆m chăl ‘nao.