Đơ̆ng rŏng 3 sơnăm bơ̆ jang tơdrong jang vang tơroi tơbăt, Radio nơ̆r pơma VN pơgơ̆r chih hlŏh 3.000 tơdrong kơtơ̆ng ang, ƀai chih, pơih pơre tơpăt găh dôm tơdrong jang mŭk drăm, jŏh ayŏ kơ dŏ xoang, tơpôl, vei sơđơ̆ng tĕh đak tơ̆ tơring tơrang lơ̆m dêh char Đắk Lắk. Hơdai hăm ‘nŏh tơblơ̆, pơih pơre 1.816 tơdrong tơroi hăm nơ̆r kon kông, đei: 908 tơdrong tơroi hăm nơ̆r Rađe păng 908 tơdrong tơroi hăm nơ̆r M’Nông, 2 nơ̆r kon kông kơtă tơ̆ dêh char Đắk Lắk. Lơ̆m 6 khei blŭng sơnăm 2023, Radio nơ̆r pơma VN đei 480 ƀai chih, tơdrong kơtơ̆ng ang tơroi truh dôm tơdrong jang mŭk drăm, chinh trĭ, vei sơđơ̆ng tĕh đak tơ̆ tơring.

Ƀât mă tơdrong sơđơ̆ng chinh trĭ tơ̆ 1,2 apŭng tơ̆ dêh char Đắk Lắk đei lơ tơdrong krê, Radio nơ̆r pơma VN ‘măn lơ tơdrong kơtơ̆ng ang, ƀai chih ‘lơ̆ng vă tơjră plơ̆ dôm nơ̆r pơma hơlĕnh pơdăr, pơm tơblĕk jơhngâm, pơhlŭ pơhlôm đơ̆ng khul hơyăt; tơƀôh hơdăh jơhngâm đon tơpăt ‘lơ̆ng đơ̆ng kon pơlei tơ̆ hơnăp dôm tơdrong đei ƀôh ưh hơiă păng đon tơbral đơ̆ng dôm bơngai bơ̆h ƀơm pơm glăi.

Pơma tơ̆ hop akŏm, Kơdră jang lơ̆m Trung ương Đảng, Kơdră chĕp kơ̆l Radio nơ̆r pơma VN Đỗ Tiến Sỹ akhan, đơ̆ng rŏng 3 sơnăm bơ̆ jang tơdrong jang hơdoi, vang tơroi tơbăt găh trong jang, đon tơchĕng đơ̆ng Đảng, tơdrong tơgŭm, khôi luơ̆t đơ̆ng tĕh đak truh hăm tơpôl kon pơlei lơ̆m dêh char Đắk Lắk đei bơ̆ jang roi ‘lơ̆ng păng gơ̆h hơgei ƀiơ̆. Dêh char Đắk Lắk hlôi păng tŏk bŏk pơjing tơdrong hiôk hian ăn bơngai chih tơdrong kơtơ̆ng ang kơ Radio nơ̆r pơma VN bơ̆ jang lơ̆m dêh char. Atŭm hăm ‘nŏh, dêh char tơtom roi tơbăt dôm tơdrong mă khul chih hla ar tơroi tơrĕk truh ƀơm truh tơdrong arih xa, jŏh ayŏ kơ dŏ xoang, chinh trĭ, mŭk drăm, tơpoiol, vei sơđơ̆ng tĕh đak vă bơngai mơ̆ng gơ̆h băt tôm tơdrong trŏ ƀlep hlŏh. 

Ƀok Kơdră Đỗ Tiến Sỹ pơma hơdăh, Radio nơ̆r pơma VN hlôi păng vă hơnơ̆ng yak hơdai hăm dêh char Đắk Lắk hơtŏk hlŏh dơ̆ng tơdrong tơroi tơbăt. Lơ̆m nŏh, mă loi jĭ ‘moi kiơ̆ dôm trong jang gĭt kăl, ‘măn hơdrô̆ ăn tơring Tây Nguyên păng Đắk Lắk: “Tơ̆ hơnăp kơnh nhôn vă hơnơ̆ng kŭm hăm iĕm jang kiơ̆ tơdrong Tơchơ̆t đơ̆ng Trung ương Đảng, nơ̆r pơtho đơ̆ng Khul kơdră tĕh đak, tơdrong pơtho đơ̆ng Anih pơgơ̆r jang 35 găh tang găn khul hơyăt pơvĕr chă trong tơjră, phă ngơ̆r tơdrong rơngei, tơroi găh tơdrong tơgŭm hăm hơdrĕch kon kông, 3 tơdrong jang tơm kơ tĕh đak. Mă loi ‘nŏh Nơ̆r tơchơ̆t 67 đơ̆ng Anih tơm Chinh trĭ, Tơdrong tơchơ̆t 103 đơ̆ng Khul kơdră tĕh đak păng tơdrong tơchơ̆t 72 đơ̆ng Quốc hội găh jang pơlong năng 1,2 tơdrong tơgŭm hơdrô̆ ăn plt Buôn Ma Thuột, truh âu kơnh, nhôn vă hơnơ̆ng kŭm hăm iĕm bơ̆ jang roi tơbăt mă lăp hăm dôm tơdrong tơroi ‘lơ̆ng hơiă hlŏh.”

Năng dơ̆ng 3 sơnăm bơ̆ jang hơdoi, Kơdră jang lơ̆m Trung ương Đảng, Bí thư đảng dêh char Đắk Lắk Nguyễn Đình Trung ăn tơbăt, dôm ƀai chih đơ̆ng Radio nơ̆r pơma VN pơih tơroi găh rim tơdrong jang đơ̆ng dêh char Đắk Lắk tôch lăp păng đei tơpôl tơchĕng ‘lơ̆ng. Mă loi, tơdrong Radio nơ̆r pơma VN đei lơ tơdrong tơroi hăm nơ̆r kon kông tơ̆ Đắk Lắk păng lơ̆m tơring Tây Nguyên ‘nŏh jĭ tơdrong tôch gĭt kăl vă hơtŏk tơdrong đei yoa đơ̆ng roi tơbăt hăm kon pơlei tơ̆ jơ̆p pơlei pơla. Tơdrong jang hơdoi tôch kơjăp hlôi tơgŭm bơ̆ jang ‘lơ̆ng tơdrong roi tơbăt rim tơdrong găh mŭk drăm – jŏh ayŏ kơ dŏ xoang, tơpôl, vei sơđơ̆ng tĕh đak lơ̆m dêh char. Kiơ̆ đơ̆ng noh, tơgop gĭt kăl vă pơm hơtŏk anih dơ̆ng đơ̆ng tơring, hơmet kơjăp đon lui đơ̆ng kon pơlei hăm tơdrong chĕp kơ̆l pơgơ̆r đơ̆ng anih jang đảng, khul kơdră pơgơ̆r tơring, tưk tơiung tơdrong jang mŭk drăm, jŏh ayŏ kơ dŏ xoang, tơpôl kơ dêh char.

Jĭ tơring đei truh 49 hơdrĕch hơdrung arih xa hơdai, tơdrong ‘mĕh iŏk đei nơ̆r roi tơbăt tơ̆ Đắk Lắk tôch lơ. Yoa thoi nŏh, Bí thư Đảng dêh char Đắk Lắk athei, truh âu kơnh, Radio nơ̆r pơma VN hơnơ̆ng pơih xă lơ tơdrong tơroi. Lơ̆m nŏh athei akŏm roi tơbăt găh tơdrong bơ̆ jang kiơ̆ dôm trong jang, tơdrong tơgŭm đơ̆ng Đảng păng tĕh đak tơ̆ tơring: “Lơ̆m khei ‘năr pơgơ̆r bơ̆ jang dôm tơdrong tơgŭm đơ̆ng tĕh đak tơ̆ tơring ‘nŏh gô đei hloi dôm tơdrong tam mă lăp, đei hloi trong jang mưh tơlĕch jang tơ̆ Tây Nguyên gô tơhlăk tăk. Tơdrong ‘nâu đei ƀôh hơdăh kiơ̆ đơ̆ng dôm tơdrong jang tơm kơ tĕh đak păng 1,2 tơdrong nai hai. Dêh char hơpơi ‘mĕh VOV, mă loi jĭ VOV Tây Nguyên đei lơ nơ̆r pơma, đei ƀai chih tơblang mă hơdăh ƀiơ̆ găh dôm tơdrong ưh tam mă lăp lơ̆m tơdrong bơ̆ jang kiơ̆ dôm trong tơgŭm vă atŏk tơiung tơring Tây Nguyên.”

Ƀlep ƀât pơtôch 3 sơnăm bơ̆ jang jang hơdoi hăm dêh char Đắk Lắk, Kơdră chĕp kơ̆l Radio nơ̆r pơma VN hlôi hơpăh Grat yoa tơdrong jang pơih pơre nơ̆r ăn đe ƀok Nguyễn Đình Trung, Kơdră jang lơ̆m Trung ương Đảng, Bí thư Đảng dêh char; ƀok Phạm Minh Tấn Phó Bí thư chĕp kơ̆l đảng dêh char; ƀok Phạm Ngọc Nghị, Kơdră vei lăng kon pơlei dêh char; păng ƀok Nguyễn Tuấn Hà, Phŏ Kơdră chĕp kơ̆l Anih vei lăng kon pơlei dêh char. Ƀlep ƀât ‘măng mă âu mơ̆n, Radio nơ̆r pơma VN pơjao ăn dêh char Đắk Lắk 3 tŏ hnam tơgŭm ăn bơngai tơnuh, đei kơjă 300 triu hlak jên.