Tơ̆ jơ tơƀâp, hăm ƀĕnh jơhngâm đon ‘lơ̆ng hơiă, dôm bơngai tang măt pơma nuh păng mơ̆ng nơ̆r tơroi, đon hơpơi ‘mĕh đơ̆ng đe sinh viên păng druh dăm kon kông, păng bơngai lui khop jang rơgei. ‘Nâu jĭ dôm bơngai tôch tơnăp, đei lơ tơdrong jơnei lơm tơdrong hŏk pơhrăm kŭm nhen iung jang xa. Đe sư kŭm dơ̆ng tang ăn druh dăm tơ̆ tơring pơma tơlĕch lơ tơdrong ƀơm truh tơdrong tơgŭm, tơdrong hơpăh ăn sinh viên, druh dăm kon kông; hơpơi ‘mĕh sinh viên, druh dăm đei tơgŭm tŏk iŏk jên teh đak, đei chă ăn tơdrong jang.

Tơ̆ âu, kơdră chĕp kơ̆l 1,2 anih jang kŭm pơma nuh, roi tơƀôh hơdăh ƀiơ̆ dôm tơdrong tơgŭm, tơdrong pơlung hơpăh ăn sinh viên păng druh dăm kon kông, mă loi găh tơdrong pơtho pơhrăm, chă tơdrong jang păng năm jang tơ̆ teh đak đe. Vang truh tơ̆ âu, oh H’Saronny Arul, sinh viên hŏk găh tơdrong pơvei hăm apŭng plenh teh, Hnam hŏk jang tơbôl tơroi:

“Dôm tơdrong thoi âu gô pơjing đei jơhngâm đon hưch hanh vă oh adrin hŏk mă ‘lơ̆ng ƀiơ̆. Kơlih yoa đe ƀok kơdră chĕp kơ̆l hlôi tơƀôh tôch hơdăh ‘nŏh đe oh athei adrin hŏk mă ‘lơ̆ng ning mônh kơnh brŏk tơ̆ âu, jing bơngai rơgei, đei yoa ‘lơ̆ng ăn plt păng dêh char kơdih. Yoa tơ̆ âu oei đei lơ bơngai gô chang dôm bơngai rơgei nhen đe oh. Hơpơi ‘mĕh ning mônh kơnh gô đei dơ̆ng lơ ‘măng tơƀâp vă gơ̆h pơlung jơhngâm đon ăn đe hŏk tro, sinh viên oei hŏk pơhrăm hơtăih kơ hnam.”

Ƀlep ƀât ‘măng mă âu, Anih vei lăng kon pơlei plt Buôn Ma Thuột hơpăh Hla ar pôk pơ ư 8 ‘nu sinh viên hŏk rơgei; Anih jang đoan Buôn Ma Thuột pôk pơ ư 11 ‘nu sinh viên păng 31 ‘nu druh dăm kon kông, bơngai kiơ̆ lui khop rơgei. Bơngai dơ̆ng tang ăn kơdră chĕp kơ̆l tơring, ƀok Trần Đức Nhật, Phŏ Kơdră vei lăng kon pơlei plt Buôn Ma Thuột hơpơi ‘mĕh rim sinh viên, druh dăm bơngai kon kông jĭ bơngai dơ̆ng tang tưk tơiung tơdrong jŏh ayŏ kơ dŏ xoang ‘lơ̆ng hơiă đơ̆ng sơ̆, tơƀôh um ai kon bơngai păng tơring teh Buôn Ma Thuột pơma hơdrô̆ păng Đắk Lắk pơma atŭm.

“Hơmĕng đe boăl đei pôk pơ ư năr ‘nâu gô jing dôm bơngai tơm vang tơgop lơ ƀiơ̆ ăn pơlei pơla Buôn Ma Thuột pơma hơdrô̆ păng dêh char Đắk Lắk pơma atŭm tơ̆ hơnăp kơnh. Hơpơi ‘mĕh bôl boăl gô jing bơngai dơ̆ng tang, bơngai jang rơgei hơnhăk tơdrong juăt ‘lơ̆ng đơ̆ng sơ̆ kơ plt Buôn Ma Thuột truh hăm bôl boăl lơ̆m păng ‘ngoăih kơ teh đak. Đe boăl jĭ dôm bơngai tang măt rơgei vang tơgop tơiung pơjing, roi tơƀôh um rup plt Buôn Ma Thuột – plt cheh phe kơ apŭng plenh teh, kŭm nhen pơjing plt rơgŏh ‘lơ̆ng, gơ̆h hơgei păng đei ƀĕnh tơdrong juăt ‘lơ̆ng hơiă”.

Chĕp vei tơdrong juăt mât mĭnh ƀơ̆r đon, ‘mêm kơ teh đak đơ̆ng hơdrĕch Việt Nam, khei ‘năr âu ki, druh dăm bơngai kon kông păng bơngai lui khop tơ̆ plt Buôn Ma Thuột, dêh char Đắk Lắk hơnơ̆ng adrin, pơtâp pơhrăm păng vang plang jơhngâm ăn tơdrong pơjing păng vei lăng teh đak.

Đei lơ bôl boăl jĭ dôm bơngai tôch chơ găm hŏk, adrin pơtâp pơhrăm, adrin jang tŏk lơ̆m tơdrong arih xa. Tơdrong ‘nŏh hlôi tơƀôh hơdăh, roi đunh roi đei lơ druh dăm bơngai kon kông kiơ̆ hŏk tơ dôm hnam trưng Đăi hŏk, cao đẳng păng trung hŏk chuyên nghiệp lơ̆m teh đak, đơ̆ng rŏng kơ hok đang lơ sinh viên đei iŏk bơ̆ jang păng jang lơ kơchư̆k tơm dơnơm lơ̆m khul kơdră chĕp kơ̆l Đảng, teh đak păng dôm anih jang kơpal, khul grŭp tơpôl tơ̆ jơ̆p tơring; rơbâu druh dăm pơnam hŏk, adrin jang xa, tech mơdro pơm pơdrŏng ăn kơdih, ăn unh hnam păng tơpôl, vang tơgop sut pơđĭ pơngot, tơjur tơnuh hin, pơm hơtŏk tơdrong arih xa ăn kon pơlei.