Đơ̆ng rŏng jơ ‘năr hŏk tơ̆ lăm, oh Y Minh Tuyết, hŏk tro lăm 5B tơ̆ Hnam trương Oei sa kơ ‘năr dơ̆ng Jăl kơđeh Măng Cành, tơring Măng Cành, apŭng Kon Plông tĕnh koăng chă ôp ‘nhao jơ̆ng ti đơ̆ng noh yak hơdoi hăm 187 ‘nu boăl hŏk tro 8 lăm anai akŏm tơ̆ hnam gŏ kơ hnam trương. ‘Măng sŏng sa kơ yuơ ƀok thây kô chă pai ăn kơ đe oh sŏng sa kơ ‘năr dơ̆ng au ‘noh đei ka, ‘nhĕm păng ‘nhot. Oh Y Minh Tuyết pơma lơ lau:“Hnam nhôn tơ̆ pơlei Măng Pành. Ĭnh tôch ‘meh oei tơ̆ hnam trương, đei pơtho khan ‘lơ̆ng hơ iă păng đei sŏng sa ‘nhĕm ‘nhot ‘lơ̆ng liĕm. Tơ̆ au sŏng sa ‘nhĕm ‘nhot ‘lơ̆ng hloh tơ̆ hnam kơ yuơ tơ̆ hnam ưh kơ đei ‘nhĕm nhen tơ̆ au”.

Sơnăm hŏk 2023- 2024, Hnam trương Oei sa ‘năr dơ̆ng jăl kơđeh Măng Cành đei 272 ‘nu hŏk tro, lơ̆m au lăp đei 57 ‘nu oh hŏk tro sơng iok đei tơdrong tơgŭm djru đơ̆ng Tơdrong tơchơ̆t 116 sơnăm 2016 đơ̆ng Khul kơdră Teh đak. Tơ hơnăp tơdrong rim hŏk tro uơ oei ưh kơ lơ̆m dôm hŏk tro sơng iŏk đei tơdrong tơchơ̆t au tơgŭm ăn au, mă lei ŭnh hnam tơnap tap, hnam hơtăih kơ hnam trương dơ̆ng, kơna Khul kơdră chĕp pơgơ̆r Hnam trương tơchơ̆t vei kơ jăp ‘Măng sŏng sa ‘năr dơ̆ng ăn đĭ đăng đe oh, truh hloi 85 ‘nu hŏk tro hŏk tơ̆ 6 hơnih hnam trương pơlei. Ƀok thây Trần Thông, Kơdră chĕp pơgơ̆r Hnam trương Sŏng sa ‘năr dơ̆ng Jăl kơđeh Măng Cành tơbăt, tơdrong rim năr hơnơ̆ng chă pai por ‘nhot ăn đe oh pơm ăn đe ƀok thây kô đei dơ̆ng tơdrong jang, đei dơ̆ng tơdrong gleh hrat mă lei rim ‘măng sŏng sa au ƀĕng ƀang jơhngơ̆m đon ‘mêm kơ eng dih băl hlôi pơjing đei jơhngơ̆m đon hưch hanh ăn đe oh hơdrin năm hŏk hloh dơ̆ng: “Vei kơjăp ‘măng sŏng sa, tơ̆ kơsơ̆ kơ hŏk tro tôch rơvơn. Lơ̆m pơyan ‘mi tơdăh ưh kơ đei sŏng sa ‘năr dơ̆ng kơtă tơ̆ hnam trương ‘nŏh tơ̆ kơsơ̆ nhen lĕ ưh kơ đei hŏk tro ayơ năm tơ̆ hnam trương vă hŏk pơhrăm hloi. Vei kơjăp ‘măng sŏng sa ‘năr dơ̆ng hlôi pơm ăn rim hŏk tro năm tŏ tơ̆ kơsơ̆ tôm ngăl”.

Găh tơdrong oei sa tơ̆ kơ ‘năr dơ̆ng, dôm hŏk tro găh đei tơdrong tơchơ̆t kơsô̆ 116/2016/NĐ-CP tơgŭm ăn lơ̆m sơnăm hŏk 2023-2024 rŏ năng đei truh 1.900 ‘nu hŏk tro ( ‘noh đei 829 ‘nu hŏk tro jăl kơ đeh, 871 ‘nu hŏk tro jăl ƀar) găh 14 hnam trương oei sa kơ ‘năr dơ̆ng. Rim hnam trương hlôi pơjing trong pơgơ̆r jang ăn oei sa kơ ‘năr dơ̆ng, chă hơmet ăn bơ̆n ‘nhĕm ‘nhot rim năr. Vă vei kơ jăp đei ‘măng sŏng sa kơ ‘năr dơ̆ng ăn vă jê̆ 1.250 ‘nu hŏk tro sŏng sa kơ ‘năr dơ̆ng kon pơlei rong ‘me tơ̆ 4 tơring, thĭ trân ‘nŏh đei: Măng Cành, Pờ Ê, Đăk Tăng păng thĭ trân Măng Đen, hơnih vei lăng Hnam trương pơtho pơhrăm apŭng Kon Plông tơlĕch jang lơ trong jang păng sơng iŏk đei tơdrong tơgŭm djru đơ̆ng kơdră tơring, rim hơnih jang adoi nhen dôm bơngai đei jơhngơ̆m đon ‘lơ̆ng.

Mă hơdăh, tơdrong vă jang “Rong ‘me oh” kơ Khul năm iung jang ‘Mêm mơnat păng tơdrong jang “rong ‘me oh Tây Nguyên” tơgŭm djru 397 ‘nu hŏk tro hăm kon jên tơgŭm ăn 1 năr 1 ‘nu oh ‘nŏh 17.000 hlak jên; Hơnih mong jên Hŏk tro dơnuh tơring groi kông Tơdrong vă jang “ ‘Măng sŏng sa đei ‘nhĕm” tơgŭm ăn sŏng sa kơ ‘năr dơ̆ng ăn 850 ‘nu hŏk tro, lơ̆m au đei 412 ‘nu hŏk tro mâm non hăm kon jên tơgŭm ăn 1 ‘nu oh 8.000 hlak jên păng 438 ‘nu hŏk tro jăl kơ đeh, Hŏk tro jăl ƀar ‘noh 10.000 hlak jên.

‘Ngoaih kơ ‘noh, rim hnam trương hơnơ̆ng chă hơvơn, krao hơvơn tơdrong vang chă tơgŭm djru đơ̆ng dôm bơngai đei jơhngơ̆m đon ‘lơ̆ng, rim khul phara dih băl lơ̆m dêh char păng dêh char anai, mĕ ƀă hŏk tro vang chă tơra phe, ‘nhot, ƀum, năr jang vă pơjing đei ‘măng sŏng sa ‘lơ̆ng hơ iă ăn hŏk tro oei sa kơ ‘năr dơ̆ng kon pơlei rong ‘me, pơjing rơvơn ‘lơ̆ng hơ iă hlŏh vă đe oh sơđơ̆ng jơhngơ̆m hŏk pơhrăm tơ̆ hnam trương lơ̆m sơnăm hŏk 2023-2024. Ƀok thây Nguyễn Minh Cường, Kơdră chĕp pơgơ̆r Hơnih vei lăng Hnam trương pơtho pơhrăm apŭng Kon Plông tơbăt, lơ̆m tơdrong kon jên chă tơgŭm djru kơ ƀăh kơ ƀôch, vă sơđơ̆ng ăn ‘măng sŏng sa ‘lơ̆ng ăn rim hŏk tro, hnam trương oei chă hơvơn dơ̆ng.“Rim kơdră chĕp pơgơ̆r hnam trương chă krao hơvơn mĕ ƀă hŏk tro vang chă tơra ăn phe, ƀa, ‘nhot sa. Dôm mĕ ƀă hŏk tro ayơ ưh kơ đei tơmam drăm au ‘noh vang chă ăn ‘long ŭnh. Tơdăh ưh kơ đei ‘nŏh vang năm truh tơ hnam gŏ au chă pơvih pơvăn por ‘nhot. Găh tơdrong tơpôl vang iung jang ‘noh Hơnih vei lăng Hnam trương pơtho pơhrăm apŭng atŭm hăm rim tơring, thĭ trân, rim kơdră chĕp pơgơ̆r hnam trương krao hơvơn dôm bơngai đei jơhngơ̆m đon ‘lơ̆ng găh lơ ‘nŏh chă tơgŭm ăn ‘nhĕm ‘nhot nhen tơgŭm ăn mi tôm, ka kro, đak rơmă”.

Tơdrong vei kơjăp ‘măng sŏng sa ‘năr dơ̆ng ăn vă jê̆ 1.250 ‘nu hŏk tro oei sa kơ ‘năr dơ̆ng kon pơlei rong ‘me, hơnăp jang tơm găh đe ƀok thây kô pơtho tơ̆ rim hnam trương. Rim ‘măng sŏng sa au hlôi pơm ăn rim ƀok thây kô gleh hrat dơ̆ng mă lei gei kơjăp jơhngơ̆m đon ‘mêm kơ eng dih băl tôch kơtang, tơgop pơtrŭt jơhngơ̆m đon hơdrin hŏk pơhrăm hlŏh dơ̆ng ăn rim hŏk tro bơngai Xơ Dang oei tơ̆ apŭng Kon Plông, dêh char Kon Tum năm tơ̆ hnam trương.