Jĭ bơngai chĕp kơ̆l Khul kơdră chĕp pơgơ̆r Teh đak, Thủ tướng Teh đak Phạm Minh Chính chhưu lơ̆m jơhngơ̆m tơbăt, ƀok tôch hưch hanh hơmanh bơnê păng chơt hiôk hloh đei bơ̆ jang atŭm hăm nhap ƀok Tổng bí thư Nguyễn Phú Trọng lơ̆m prăt 8 sơnăm păng vă jê̆ 8 khei, hăm kơchư̆k jang phara dih băl; đơ̆ng Kơdră jang lơ̆m Hơnih tơm Chinh trĭ, Ban Bí thư, Kơdră chĕp pơgơ̆r Hơnih bơ̆ jang Trung ương, Kơdră chĕp pơgơ̆r Hơnih bơ̆ jang Vei lăng năng tông jơhngơ̆m jăn kang ƀô̆ Trung ương truh Thủ tướng Teh đak: “Ba tôch pŭn ai, hưch hanh hơmanh bơnê păng chơt hiôk hloh đei bơ̆ jang atŭm hăm nhap ƀok Tổng bí thư Nguyễn Phú Trọng, ‘moi kiơ̆ lơ̆m khei ‘năr bơ̆ jang păng tơdrong tơgŭm djru, pơjing rơvơn lăng ba kơtang đơ̆ng ƀok ĭnh ƀôh hơdăh dôm tơdrong kăl tơ̆ hơla ou. Mă blŭng, ƀok ‘noh jĭ mĭnh ‘nu bơngai chĕp pơgơ̆r gơ̆h hơgei kơ yuơ trong tơlĕch ăn tơ iung pơjing mĭnh teh đak pran kơtang, pơdrŏng hơnŭk hơnoa păng kon pơlei đei hơrih sa phĭ tơtŏ dơnŏ ‘lơ̆ng dơ̆ng kơjăp păng đei tơdrong yom kơtang ưh khan lăp lơ̆m teh đak, lơ̆m tơring, mă lei oei truh hloi lơ̆m apŭng plĕnh teh”.

Kơplah oei hơrih, Ƀok Tổng Bí thư Nguyễn Phú Trọng tơrĕk kăp gĭt truh tơdrong hơtŏk tơ-iung kơ pơlei tơm HCM, mă kiơ̆ kơ Ƀok Tổng Bí thư âu jing  “minh tơring kăp gĭt hloh. Đơ̆ng mă tŏk jang kơdră kơpal kơ Đảng, Ƀok Tổng Bí thư Nguyễn Phú Trọng hlôi đei 15 ‘măng năm hơpong păng pơm jang tơ̆ pơlei tơm đei hơnăn Ƀok Hô. ‘Măng năm hơpong mă hơtuch luch kơ Ƀok Tổng Bí thư Nguyễn Phú Trọng đei pơgơ̆r ah năr 23/9/2022, trŏ ah tơbăt 77 sơnăm Năr Tơring Pơbah iung tơjră.

Vă tơgop kăp gĭt hăm jơ̆p teh đak pơm jang đei jơnei tơchơ̆t truh sơnăm 2030 teh đak bơ̆n jing teh đak tŏk bŏk oei hơtŏk tơ-iung kiơ̆ trong jang ‘nao, đei iŏk yua pah ai; truh sơnăm 2045 teh đak bơ̆n jing teh đak hơtŏk tơ-iung, đei iŏk yua kơjung; păng vă atŭm hăm rim tơring tơ̆ Đông Nam bộ tơlĕch jang đei jơnei Tơchơ̆t ‘nao đơ̆ng Anih tơm Chĭnh trĭ, Ƀok Tổng Bí thư Nguyễn Phú Trọng ră hơdah: “Inh pơkăl rim bơngai jang lơ̆m Ƀan châ̆p hanh Đảng ƀô̆ pơlei tơm atŭm hăm jơnŭm jang chĭnh trĭ athei pơtoi chă hơlen, sơkơ̆t hơdah tơdrong tơm, ƀai hŏk hlôh vao păng tơtom đei dôm trong jang hơmet răm tơnăp. Dôm tơdrong kiơ hloh kơ tơdrong pơgơ̆r po noh athei tơroi hăm Trung ương, Kuôk hô̆i, Jơnŭm pơgơ̆r teh đak hơlen, pơm trong hiôk vă pơklaih; lơ̆m noh đei tơchơ̆t jang kăp gĭt, gơh hơgei hloh pơtêng hăm Tơchơ̆t 54 đơ̆ng Kuôk hô̆i jăl 14”.

Sơnăm 2016, Đảng ƀô̆, khul kơdră chĕp pơgơ̆r păng Kon pơlei rim hơdrung tơring Bản Bo, apŭng Tam Đường, dêh char Lai Châu pŭn ai, chơt hơ iă đei sơng Tổng Bí thư Nguyễn Phú Trọng năm ngôi.

Pơm kiơ̆ nơ̆r pơtho khan đơ̆ng ƀok lơ̆m ‘măng năm ngôi ‘noh, kang ƀô̆, đảng viên păng kon pơlei rim hơdrung tơ̆ ou hlôi vang kơrŭn jơhngơ̆m, mĭnh nơ̆r ƀơ̆r đon, hơdrin yak hloh tơnap tap, hơdrin đei jing hơnih hơdăh ang rang ‘lơ̆ng lơm atŏk tơ iung mŭk drăm, tơ iung pơjing tơring tơrang ‘nao tơ̆ tơring. Ƀok Hạng A Sào, hơdrung Mông, oei tơ̆ pơlei Nà Phát, tơring Bản Bo, apŭng Tam Đường tơbăt: Lăp đơ̆ng rŏng tơƀơ̆p păng đei Tổng Bí thư Nguyễn Phú Trọng hơlêm, ŭnh hnam ƀok hlôi hơdrin choh jang lang să pơtăm hla che kơ ŭnh hnam.“Ƀok Trọng Tổng Bí thư lăng ba kơjăp truh tơdrong jang sa kơ kon pơlei. Ƀok năm lăng mir pơgar hla che ŭnh hnam nhôn păng ƀok chă pơtho khan athei ŭnh hnam păng kon pơlei hơdrin vei lăng năng tông ‘lơ̆ng mir pơgar hla che vă jang sa iŏk đei ăn ŭnh hnam đunh sơnăm tăm kơrach. Đơ̆ng nơ̆r ƀok Tổng Bí thư chă pơtho khan ‘noh, kon pơlei lơ̆m pơlei hlôi hơdrin jang vei lăng năng tông ‘lơ̆ng mir pơgar hla che păng dang ei tơdrong hơrrih sa kơ kon pơlei hlôi đei phĭ tơtŏ dơnŏ ‘lơ̆ng, hơnŭk hơnoa bơih”.