Sơnăm ‘nâu, Dak Lak đei hloh 31.000 ‘nu hŏk tro gô vang pơlong lĕch ‘măng khoă hŏk jăl 2. Tơchĕng hơdrol đơ̆ng rŏng lĕch ‘măng khoă hŏk đei dang 23.000 ‘nu hŏk tro mơ̆t hŏk tơ̆ dôm hnam trưng hŏk jăl 3 teh đak, 4.000 ‘nu hŏk tro tơ̆ dôm hơnih pơtho pơhrăm hơnơ̆ng, kơ sô̆ uơ oei dơ̆ng gô hŏk tơ̆ dôm hnam trưng pơjing kơdih dăh mă hnam trưng pơtho tơdrong jang kiơ̆ Tơdrong jang “Pơtho pơhrăm tơƀôh hŏk găh tơdrong jang păng klăih song hŏk tro hŏk pơhrăm lơ̆m tơdrong pơtho pơhrăm lơ̆m dêh char Dak Lak sơnăm 2018-2025”.

Anih vei lăng pơtho pơhrăm, dêh char Dak Lak hlôi jang tơgŭm Anih vei lăng kon pơlei dêh char pơgơ̆r rơih hŏk tro mơ̆t lăm 10 jăl 3 hăm trong pơlong rơih hơdai hăm set rơih dôm hŏk tro đei tôm jơhngơ̆m đon ‘lơ̆ng, hŏk gơh păng đei trong tơƀôh hŏk tơdrong jang mă lăp vă hŏk kiơ̆ Tơdrong pơtho pơhrăm 2018.