Khul kơdră chĕp kơ̆l Trung ương Đảng Cộng sản Việt Nam, Quốc hội teh đak Cộng hoà Xã hội Chủ nghĩa Việt Nam, Kơdră teh đak Cộng hoà Xã hội Chủ nghĩa Việt Nam, Khul kơdră teh đak Cộng hoà Xã hội Chủ nghĩa Việt Nam, Anih Trung ương Mặt trận Tổ quốc Việt Nam păng unh hnam tôch ơh sơ ‘ngon tơroi:

Ƀok Nguyễn Phú Trọng, Tổng Bí thư Khul kơdră chĕp kơ̆l Trung ương Đảng, Bí thư Quân uỷ Trung ương, rơneh ‘năr 14 khei 4 sơnăm 1944; pơlei tơ̆: xăh Đông Hội, apŭng Đông Anh, pơlei tơm Hà Nội. Oei tơ̆ Hnam kơsô̆ 5, kơ phô̆ Thiền Quang, phường Nguyễn Du, quận Hai Bà Trưng, pơlei tơm Hà Nội.

Vang bơ̆ jang đơ̆ng sơnăm 1967; mât lơ̆m Đảng Cộng sản Việt Nam ‘năr 19 khei 12 sơnăm 1967. Kơdră jang lơ̆m Trung ương Đảng dôm jăl VII, VIII, IX, X, XI, XII, XIII; Kơdră jang lơ̆m Anih tơm Chinh trĭ dôm jăl VIII, IX, X, XI, XII, XIII; vang jang lơ̆m Khul chĕp kơ̆l Anih tơm Chinh trĭ jăl VIII; Kơdră Quốc hội teh đak Cộng hoà xã hội chủ nghĩa Việt Nam khoá XI, XII; Tổng Bí thư Khul kơdră chĕp kơ̆l Trung ương Đảng Cộng sản Việt Nam dôm jăl XI, XII, XIII; Kơdră teh đak Cộng hoà xã hội chủ nghĩa Việt Nam jăl jang đơ̆ng 2016 - 2021, Kơdră Anih vei lăng sơđơ̆ng teh đak; Bí thư Quân uỷ Trung ương; Kơdră jang lơ̆m Khul chĕp kơ̆l Đảng uỷ Công an Trung ương; Kơdră Anih pơgơ̆r jang kơ Trung ương găh tang găn xa pơjĭp, pơm glăi. Bơngai tang măt Quốc hội dôm jăl XI, XII, XIII, XIV, XV.

Đơ̆ng rŏng mĭnh khei ‘năr jĭ ăl, mă đơ̆ng đei Đảng, Teh đak, khul đe giáo sư, y ƀak si tơm dơnơm dŏng hơmet tôch ai, unh hnam đĭ jơhngâm vei lăng mă lei yoa đĭ kră bơih, jĭ ăl dơ̆ng kơna Ƀok lôch ƀât 1 jơ 38 pơnĭt kơsơ̆ ‘năr 19 khei 7 sơnăm 2024 (vă akhan ‘năr 14 khei 6 sơnăm Giáp Thìn), tơ̆ Hnam pơgang Trung ương Khul linh 108, Hà Nội, arih sot 80 sơnăm.

Vă jê̆ 60 sơnăm bơ̆ jang, ƀok đei lơ kŏng tih tên, tôch gĭt kăl hăm tơdrong jang kăch mang ‘lơ̆ng hơiă đơ̆ng Đảng păng hơdrĕch hơdrung. Ƀok đei Đảng, Teh đak hơpăh ăn Mê đai Sơnglŏng dreng, Hơnăn 55 sơnăm jang Đảng păng lơ Mê đai kăp gĭt nai kơ teh đak Việt Nam păng apŭng plenh teh.

Ƀok lôch hơchăng ‘nŏh jĭ 1 tơdrong hiong răm tôch tih hăm Đảng, Teh đak, Kon pơlei bơ̆n păng unh hnam ƀok. Vă tơƀôh jơhngâm đon ‘mêm kơ eng păng ƀlŏk hơdơ̆r kơ ƀok Tổng Bí thư Nguyễn Phú Trọng, Khul kơdră chĕp kơ̆l Trung ương Đảng Cộng sản Việt Nam, Quốc hội teh đak Cộng hoà xã hội chủ nghĩa Việt Nam, Kơdră teh đak Cộng hoà xã hội chủ nghĩa Việt Nam, Khul kơdră teh đak Cộng hoà xã hội chủ nghĩa Việt Nam, Anih Trung ương Mặt trận Tổ quốc Việt Nam tơchơ̆t pơgơ̆r Lêh pơdong ƀok Tổng Bí thư Nguyễn Phú Trọng hăm trong pơgơ̆r pơdong jơ̆p lơ̆m teh đak.

KHUL KƠDRĂ CHĔP KƠ̆L TRUNG ƯƠNG ĐẢNG CỘNG SẢN VIỆT NAM

QUỐC HỘI TEH ĐAK CỘNG HOÀ XÃ HỘI CHỦ NGHĨA VIỆT NAM

KƠDRĂ TEH ĐAK CỘNG HOÀ XÃ HỘI CHỦ NGHĨA VIỆT NAM

KHUL KƠDRĂ TEH ĐAK CỘNG HOÀ XÃ HỘI CHỦ NGHĨA VIỆT NAM

ANIH TRUNG ƯƠNG MẶT TRẬN TỔ QUỐC VIỆT NAM