Pơma pơtôch hop akŏm, ƀok Nguyễn Trọng Nghĩa  lăng ‘lơ̆ng Khŭl chĕp kơ̆l pơgơ̆r Anih jang Đảng dêh char Đắk Lắk hlôi bơngơ̆t truh chĕp kơ̆l bơ̆jang kiơ̆ trong tơlĕch jang hơlen lăng; kơchăng, jang tơnăp, hơmet ăn ‘lơ̆ng tơdrong tơm đei hơlen lăng; jang hơdai ‘lơ̆ng, đei yua hăm Khŭl hơlen lăng kơ Khŭl jang vei lăng chĭnh trĭ kơdih Trung ương.

Kơdră Khŭl hơlen lăng athei Khŭl chĕp kơ̆l pơgơ̆r Anih jang Đảng dêh char Đắk Lắk chĕp kơ̆l, athei đei trong jang hơmet pơ ‘lơ̆ng tơtom dôm tơdrong oei đei, ưh kơ ‘lơ̆ng vă hơnơ̆ng jang kiơ̆ đei yua tơdrong jang vei lăng kơdih tơklep hăm tơdrong kơ dêh char; hơnơ̆ng roi tơbăt, vei kơjăp, tơlĕch jang kiơ̆ tơpăt dôm hla ar đơ̆ng Trung ương ƀơm truh tơdrong jang vei lăng chĭnh trĭ kơdih.