Pơma tơ̆ Hop akŏm roi tơbăt Tơdrong tơproh trong jang kơ dêh char Kon Tum đơ̆ng 2021- 2030, trong vă jang truh sơnăm 2050, Phó Thủ tướng Trần Hồng Hà pơma hơdăh, Tơdrong tơproh trong jang kơ dêh char Kon Tum đei tơmât lơ̆m trong jang atŭm vă atŏk tơiung tơring Tây Nguyên, tơƀưh hăm tơring tơter đak dơsĭ găh Tơring Tŏk bŏk păng tơring Mê Kông.

Tơdrong tơproh trong jang ‘nŏh jĭ trong jang gĭt kăl vă pơih xă dôm tơdrong ‘lơ̆ng, jang tŏk ‘nao ăn dêh char Kon Tum hăm 4 tơdrong tơm, đei: pơjing tơring pơtăm ‘long pơgang tơm kơ teh đak; atŏk tơiung choh jang xa hăm kơmăy kơmŏk ‘nao, jang kơmăy pơm tơmam; atŏk tơiung unh hơyuh rơgăh păng chă tơmang lăng kơ Kon Tum jing anih jang mŭk drăm tơm. Tơdrong tơm vă jang tŏk đei tơlĕch truh sơnăm 2030, dêh char Kon Tum jing dêh char jang tŏk hrĕnh, tôm tơdrong, pran kơjăp păng hơtŏ ‘lơ̆ng kiơ̆ đơ̆ng jang mŭk drăm rơgŏh, chĕp vei kơjăp dôm tơdrong juăt ‘lơ̆ng đơ̆ng hơdrĕch hơdrung.