Lơ̆m 2 năr, ‘năr 24 păng 25/8, Hơnih tơchă bơngai năm jang tơ̆ teh đak đe, Anih tơm vei lăng găh bơngai jang - lĭnh jĭ rơka păng tơpôl jang hơdai hăm Anih vei lăng bơngai jang - lĭnh jĭ rơka păng tơpôl dêh char Kon Tum pơgơ̆r roi tơƀôh tơdrong jang tơ̆ 2 apŭng mơmat tat sa yua trong jang tơgŭm 30a đơ̆ng Khŭl kơdră teh đak ‘noh Tu Mơ Rông păng Kon Plông. Jơ roi tơƀôh tơdrong jang hlôi tơƀôh ăn tơdrong jang ăn kơ hloh 600 ‘nu bơngai jang bơngai Xơ Đăng tơ̆ 2 tơring ‘nâu.

Lơ̆m 2 ‘măng roi tơƀôh, đei 42 anih mơdro sa, anih jang chih măt ‘meh vă chă hloh 2.200 ‘nu bơngai jang bơ̆jang lơ̆m dêh char, ‘ngoăih dêh char păng năm jang đei khei ‘năr pơkăp tơ̆ teh đak đe. Dôm bơngai jang tơ̆ 2 apŭng Tu Mơ Rông păng Kon Plông kơ dêh char Kon Tum đơ̆ng rŏng kơ chă hơlen lăng, đei roi tơƀôh tơ̆ jơ pơm hla ar gô pơma dơnuh kơ tă hăm Anih tơchă bơngai jang dêh char Kon Tum vă đei tơ goăt hơdai hăm anih mơdro sa păng pơm hla ar hô sơ. ‘Nâu jĭ ‘măng mă blŭng, Anih tơchă bơngai năm jang tơ̆ teh đak đe pơgơ̆r roi tơƀôh tơdrong jang tơ̆ dêh char Kon Tum.