3 ‘nu bơngai ‘nao đei rôp vei ‘noh: Y Khing Liêng (rơneh sơnăm 1992, oei tơ̆ xăh Hòa Sơn, apŭng Krông Bông); Y Huăl Êban (rơneh sơnăm 1970, oei tơ̆ plei Mấp, thị trấn Ea Pốk, apŭng Cư M'gar); păng Nay Dương (rơneh sơnăm 1968, oei tơ̆ xăh Cư Pơng, apŭng Krông Búk).  ‘Nâu jĭ 3 lơ̆m 6 ‘nu đei Kŏng an dêh char Dak lak tơkêng yoch păng tơlĕch tơdrong tơchơ̆t chă druh rôp gĭt kăl găh pơm yoch “Pơm kơnê̆ vă tơ jră khŭl kơdră, kon pơlei” kiơ̆ Hơpăng 113, Luơ̆t sek phak. Dôm bơngai âu hlôi vang tơdrŭt pơm kơnê̆ lơ̆m anih jang vei lăng kon pơlei 2 xăh Ea Tiêu păng Ea Ktur, apŭng Cư Kuin ‘năr 11/6, đơ̆ng rŏng kơ ‘noh kơ dâu klĕnh. Pơgê 21/7, iŏk đei tơroi 3 ‘nu âu ôn tơ̆ hơnih mir ưh kơ đei bơngai găh plei Kniết, xăh Ea Ktur, apŭng Cư Kuin, khŭl linh Kŏng an dêh char Dak Lak hlôi pơgơ̆r pơvang păng rôp vei. Dang ei khŭl linh kơpal tŏk bŏk pơgơ̆r iŏk nơ̆r tơ roi đơ̆ng dôm bơngai âu.

Thoi noh, truh dang ei, khŭl linh kơ pal dêh char Dak Lak hlôi rôp vei đei pơđĭ 6 ‘nu đei chă druh rôp krê hơmơt lơ̆m ‘măng pơm kơ nê̆ tơ̆ apŭng Cư Kuin ‘năr 11/6 pơm ăn 9 ‘nu lôch păng 2 ‘nu rơka. Truh dang ei, Anih jang kŏng an hlôi tơkêng 84 ‘nu bơngai pơm yoch, lơ̆m noh đei 75 ‘nu pơm glăi găh pơm kơnê̆ vă tơ jră khŭl kơdră kon pơlei; 7 ‘nu pơm glăi găh ưh kơ tơ roi bơngai pơm glăi; 1 ‘nu pơm glăi găh ôn bơngai pơm yoch; 1 ‘nu pơm glăi găh pơgơ̆r, tơ ƀôh ăn bơngai nai mơ̆t lĕch tơ̆ teh đak đe dăh mă oei tơ̆ Việt Nam glăi.