Đơ̆ng rŏng 2 sơnăm pơtoi tơjur sar bar trong nơnăm, lơ̆m 5 khei blŭng sơnăm 2024 tơdrong sar bar trong nơnăm lơ̆m dêh char Đăk Nông đei ƀôh hli hlơt, hăm 57 ‘măng sar bar pơm 37 ‘nu bơngai lôch, 38 ‘nu rơka.

Pơtêng hăm khei năr âu sơnăm 2023, sar bar trong nơnăm tơ̆ Đăk Nông tŏk gah kơsô̆ ‘măng sar bar, kơsô̆ bơngai lôch păng rơka. Tơdrong tơm noh kơlih tơdrong pơm kiơ̆ khôi luơ̆t đơ̆ng bơngai vơ̆r gre ưh đei tơnăp, tơdrong hơmet sar bar kiơ̆ trong nơnăm lơ̆m tơring tam mă tơtom.

Gah dôm trong jang vei sơđơ̆ng trong nơnăm lơ̆m khei năr truh, Thượng tá Phạm Quốc Lập, Kơdră anih kanh sat trong nơnăm – Kŏng an dêh char Đak Nông ăn tơbăt, anih jang hlôi chă hơlen, pơtruh nơ̆r hăm jơnŭm pơgơ̆r tơring păng rim anih jang kơpal atŭm pơm jang, hơtŏk chă tơroi tơbăt gah khôi luơ̆t, hơtŏk chă hơlen sek tơlang dôm tơdrong pơm glăi pơkăp vei sơđơ̆ng trong nơnăm, tơlĕch tơdrong jang tôm kon pơlei vang chă tơroi tơbăt gah tơdrong pơm glăi pơkăp vei sơđơ̆ng trong nơnăm.