Kiơ̆ kơ ‘noh, sơnăm 2023 pơkom kon jên jang teh đak 83.000 ti hlak jên. Kơdră chĕp pơgơ̆r Hơnih tơm jang jên hu Hồ Đức Phớc tơbăt, sơnăm 2023, thuê̆ ăn hơnih bơ̆ jang Teh đak jơnei 1.754 ti hlak jên. Tơlĕch iŏk yua kon jên jang teh đak dang 2.109 ti hlak jên, hơtŏ 101,6% trong tơdra hơdrol, tŏk vă jê̆ 74.000 ti hlak jên. Akŏp pơkom kon jên teh đak lơ̆m sơnăm ‘noh 83.000 ti hlak jên.

Bơ̆ jang vei lăng, răt yua mŭk drăm teh đak tơ̆ rim hơnih tơm, hơnih bơ̆ jang păng tơring hơnơ̆ng tơplih hơ iă, sơđơ̆ng, pơkom. Sơnăm 2023, Hơnih tơm jang jên hu hlôi kĭ tơchơ̆t trong jang hơmet ming, hơmet pơ ‘lơ̆ng hăm 379 hơnih hnam, teh kơ rim hơnih jang tơm, hơnih bơ̆ jang Trung ương. Sơnăm 2024, Thủ tướng Teh đak hlôi tơlĕch Tơdrong jang kơtang găh bơ̆ jang kiơ̆ pơkom, tang găn brăh brư kon jên jang hăm 9 tơdrong jang tơm păng 5 trong jang, athei rim hơnih tơm, hơnih bơ̆ jang, tơring tơ iung pơjing trong pơprŏ jang kiơ̆ rim trong jang, tơdrong pơkăp pơkom lơ̆m rim tơdrong jang. Hơnơ̆ng dăr lăng, tơlĕch hơmet ming khôi luơ̆t, hla bơar pơkăp kơ khôi luơ̆t đei ƀơm truh jang kiơ̆ pơkom, tang găn brăh brư jên hu sơđơ̆ng ‘lơ̆ng hơ iă, trŏ lăp hăm khôi luơ̆t, hơmet pơ ‘lơ̆ng tơdrong hơgrop. Năr 21/5, Kuô̆k hô̆i pơma dơnuh găh rim khôi luơ̆t trong gre, pơgơ̆r tĕch răt mŭk drăm păng hơnơ̆ng lăng hơlen, kĭ tơchơ̆t bơ̆ jang tơmơ̆t kang ƀô̆ bơ̆ jang.