Anih vei lăng mŭk drăm kơ Quốc hội hlôi bơ̆ jang hăm dôm dêh char, plt: Khánh Hòa, Ninh Thuận, Bình Thuận, Đồng Nai păng plt Hồ Chí Minh. Tơ̆ jơ bơ̆ jang, dôm bơngai tang măt drơ̆ng nơ̆r tơlĕch Trong jang tơmât jên ăn tơdrong Pơm trong gre treng kơdâu hrĕnh tơ̆ trong Bắc - Nam, vang tơgop tơguăt rim tơring.

Tơdrong jang pơm trong gre treng kơdâu hrĕnh Bắc - Nam kơjung dang 1.540 km; năm klĕch 20 dêh char, plt. Tơdrong jang vă pơm ‘nao 2 tŏ trong gre treng tơtil băl, kơdâu hrĕnh truh 350 km/jơ. Jô̆ hơlen blŭng a tơdrong kăl đei teh vă pơm trong ‘nŏh hlŏh 10.800 ha, akŏm đĭ đăng jên jang hlŏh 1,7 triu ti hlak jên. Tơchĕng adrol, tơdrong jang âu gô đei kĭ ăn trong tơmât jên jang lơ̆m jăl khei mă IV sơnăm ‘nâu; tơlĕch jang lơ̆m sơnăm 2027; adrin man đang lơ̆m sơnăm 2035.