‘Nâu jing kơsô̆ lơ hloh đơ̆ng sơ̆ truh dang ei păng jing sơnăm đei jơnei lơ mă teh đak bơ̆n tĕch phe ăn teh đak đe. Lơ̆m kơplah noh, sơkơ̆t sơnăm 2024 ăn ƀôh, tơdrong tĕch phe tŏk lơ noh kơlih minh ƀar teh đak hơtŏk răt tơmơ̆t vă vei mah phe xa ƀa sŏng. Tơdrong tơm noh phe ƀa lơ̆m kơpal teh tŏk bŏk jê̆ khăi, oei Việt Nam tŏk bŏk oei đei lơ phe ƀa.

Kiơ̆ jô̆ hơlen tơdrong kăl phe ƀa lơ̆m kơpal teh noh lơ, lơ̆m noh đei dôm teh đak juăt răt nhen Philippines, Indonesia dah mă Trung Quốc. Kiơ̆ Anih tơm Choh jang xa păng Hơtŏk tơring tơrang noh, ƀa pơyan Puih Phang 2023 - 2024 tơring tơmăn đak krong Cửu Long gô rei pơtăm đei jê̆ 1,5 trĭu hectar hăm kơsô̆ phe ƀa kơchĕng đei hloh 10 trĭu tâ̆n ƀa akŏm lơ̆m dôm hơdrĕch ƀa ƀâu phu ‘lơ̆ng vă ‘măn tĕch lơ̆m teh đak păng tĕch ăn teh đak đe.