Hơđơ̆ng jơhngâm hrŭk hơbăn ao tanh kơ bơngai K’Ho, ŏh Sruk Đan, hŏk tro lăm 9, Hnam trưng tĕh đak rong hŏk tro kon kông jăl ƀar apŭng Đam Rông (dêh char Lâm Đồng) ăn tơbăt: “Ŏh sơnăm ‘nâu đei tŏk lăm 9 bơih, kơna hnam trưng athei năm hŏk sơnăm hŏk ‘nao hrôih ƀiơ̆, đơ̆ng ‘năr 22/8. Đe boăl hŏk hơdai năm hơkŭm tơ̆ hnam trưng tôch hơiă. Sơnăm ‘nâu jĭ sơnăm hŏk hơtuch jăl kơna nhôn vă adrin hŏk pơhrăm mă ‘lơ̆ng. Mât lơ̆m sơnăm hŏk ‘nao, tơmam, lăm hŏk tơ̆ hnam trưng đei hơmet rơgŏh ‘lơ̆ng, lăm hŏk đei sơng hơmet, ŏh tôch hơiă. Sơnăm âu ki, tơdrong hŏk pơhrăm đơ̆ng ŏh tam mă gan rơgei, kơna lơ̆m sơnăm hŏk ‘nao âu, ŏh vă adrin hŏk mă gơ̆h ƀiơ̆ vă huei pơm lao đon mĕ ƀă rong ‘me, ăn hŏk pơhrăm truh um”.

Apŭng Đam Rông jĭ tơring pơmat tat dêh hlŏh kơ dêh char Lâm Đồng, kon pơlei kon kông đei truh 70% kơsô̆ kon pơlei tơ̆ âu. Dôm sơnăm âu ki, Đảng păng tĕh đak hơnơ̆ng tơrĕk truh tơdrong pơtho pơhrăm tơ̆ tơring. Kŭm hăm tơmam drăm, lăm hŏk đei tơlĕch jên man kơjăp ‘lơ̆ng, hŏk tro bơngai kon kông tơ̆ âu oei iŏk đei lơ tơdrong tơgŭm đơ̆ng Đảng păng tĕh đak. Mă loi, đon băt rong 'me kon hơ 'lơ̆p năm hŏk đơ̆ng kon pơlei kŭm roi tŏk.

Lơ̆m năr blŭng mât hŏk sơnăm hŏk 'nao, yă Me Nhi chông kon năm hŏk vă pơlung kon adrin hŏk mă gơ̆h ƀiơ̆: “Mưh mât hŏk lăm 6 tơ̆ hnam trưng Tĕh đak rong hŏk tro kon kông apŭng, đei hnam trưng roi tơƀôh, ŏh yơ hŏk rơgei ‘nŏh gô đei hơpăh ăn hŏk ƀŏng, đei ăn năm hŏk tơ̆ tĕh đak đe. Đon hơpơi đơ̆ng mon 'nŏh vă adrin hŏk pơhrăm iŏk đei hŏk ƀŏng 'nŏh păng năm hŏk tơ̆ Nhật Bản. Thoi nŏh kơna athei pơnam hŏk, adrin tôch ai, vă đơ̆ng rŏng kơ tốt nghiệp lăm 12, mon gơ̆h iŏk đei hŏk ƀŏng âu. Unh hnam nhôn kŭm vă pơjing tơdrong 'lơ̆ng ăn kon, 'ngoăih kơ jên mong đei, unh hnam oei chă tok iŏk dơ̆ng vă gơ̆h đei tôm jên ăn mon năm hŏk tơ̆ Nhật Bản hŏk răh, jang răh”.

Đon pơhnŏng đơ̆ng yă Me Nhi ‘nŏh ưh lăp adrin rong ‘me kon hŏk rơgei lơ̆m tĕh đak đĕch mă oei ‘mĕh ăn kon năm hŏk tơ̆ dôm tĕh đak rơgei đei ư hơnhang nai hai. Unh hnam đei 3 ‘nu kon, kon kơdră hŏk mă rơgei vă 2 ‘nu ŏh rok kiơ̆: “Đơ̆ng rŏng kơ mŏ kơdră, unh hnam oei đei 2 ‘nu ŏh dơ̆ng. 2 ‘nu đơ̆ng rŏng, unh hnam hơnơ̆ng pơlung măr sư adrin hŏk thoi mŏ ‘năi. Ƀât blŭng sơnăm hŏk ‘nao, unh hnam răt hơmet bơ̆n hla ar, hơbăn ao ‘nao, răt gre tang vang vă năm hŏk, yoa hnam trưng hơtăih kơ hnam hlŏh mĭnh kây sô̆. Mĭnh păh ‘nŏh yoa đon adrin hŏk đơ̆ng đe kon, unh hnam vă adrin rong ‘me tôch ai ‘năi. Pơma atŭm đe kon hơ ‘lơ̆p hnam nhôn pơnam hŏk ngăl, hŏk gơ̆h ‘năi kơna inh ƀôh tôch čhôk ‘nă păng vă drin rong kon hơ ‘lơ̆ng hŏk chư ngăl”.

Pơm ƀât tŏk bŏk bri kông, Hnam trưng tĕh đak rong hŏk tro kon kông jăl ƀar apŭng Đam Rông (dêh char Lâm Đồng) đei sơng kơ mâu ƀrach ‘lơ̆ng vă mât lơ̆m sơnăm hŏk ‘nao 2023-2024. Ƀok thây Nguyễn Hữu Hanh – Phŏ hiê̆u trơng Hnam trưng Tĕh đak rong hŏk tro kon kông jăl ƀar apŭng Đam Rông tơroi, mă đơ̆ng oei tơ̆ tơring hơtăih yăih ră, mă lei tơmam drăm, lăm hŏk tơ̆ hnam trưng đei hơmet tôch ‘lơ̆ng, pơyoa ‘lơ̆ng ăn tơdrong pơtho pơhrăm.

Sơnăm hŏk ‘nao âu, đơ̆ng kơsô̆ jên Tơdrong jang tơm kơ tĕh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021-2030, hnam trưng chă hơmet ming lăm hŏk, anih oei xa, tep pơdơ̆h ăn đe hŏk tro tơ̆ hnam trưng: “Dang ei, tơmam, lăm hŏk tơ̆ hnam trưng đei tơlĕch jên hơmet ming tôch ‘lơ̆ng. Rim lăm hŏk đei sơng hơmet, man hơmet hơnă tôch rơgŏh; vă pơyoa ăn tơdrong pơtho pơhrăm. Tơ̆ anih oei xa kơ đe hŏk tro kŭm đei sơng hơmet, pơklep gŏch tơnăr ‘lơ̆ng hlŏh vă pơyoa ăn đe ŏh hŏk tro oei xa păng hŏk pơhrăm”.