Kiơ̆ tơroi tơbăt đơ̆ng Anih jang Đoàn dêh char Dak Lak, lơ̆m 6 khei blŭng sơnăm ‘nâu, sơnăm mơlôh lơ̆m dêh char hlôi pơgơ̆r bơ̆jang đei hloh  4.000 tơdrong jang hơdruh tơdăm hăm akŏp kơ jă pơm đei iŏk yua hloh  7,2 ti hlak jên.

Mă hơdăh, rim kơdră đoàn lơ̆m dêh char hlôi ming man 17 tŏ hnam ‘mêm mơnat, hnam che văn ƀrê; bơ̆jang kiơ̆ 17km tơdrong jang Tơ̆k hơdăh trong pơlei, 23 Hơnih ngôi pơchơt ăn kơ đe hơioh; tơgŭm lơ hơ tuh hla ar ăn kơ đe hơioh; tơ sơng, hơmet ming dôm jĭt tŏ hnam hŏk hôp, hnam tơpôl hôp. Dôm tơdrong jang “Năr drŏu năm jang tơgŭm”, “Năr pơh rơgoh lơ̆m teh đak” đei pơgơ̆r lơ, sơng đei lơ lap đoàn viên, hơdruh tơdăm vang jang hăm tơdrong jang vei lăng cham char, tơ jră hăm tơplih tŏ ‘mi kial tơ̆ dôm tơring. Rim kơdră anih jang Đoàn dêh char hlôi pơjao asong hloh 20 rơbâu tơpu tơmam, vă jê̆ 3.000 kơ suơ̆t hŏk ƀŏng, gre tang vang ăn kon pơlei, hơioh; pơgơ̆r khăm hơmet jĭ đĕch tơ̆ dôm tơring hơtăih hơtŏ. Akŏp kơjă dôm tơdrong jang tơgŭm ‘noh hloh 10 ti hlak jên. Mŏ H Giang Niê, Bí thư anih jang đoàn dêh char Dak Lak tơroi:“Hơdai hăm tơdrong pơgơ̆r hơdrô̆ le rim tơdrong jang ‘noh đơ̆ng rim kơdră anih jang đoàn đei tơdrong jang hơdai hăm băl. Oei hăm dêh char ‘noh nhôn tơgĕch krao hơvơn tôch ai tơdrong bơngơ̆t truh tơgŭm đơ̆ng rim kŏng ti tơm, grŭp jang vă hơvơn năm tơ̆ tơring gĭt kăl kơ dôm dêh char Tây Nguyên. Kơ na jing đei dôm tơdrong jang tơgŭm đei lăng ƀlep tơdrong tơm, akŏm lơ̆m pơ jing tơring tơrang ‘nao, anih kơdrơ̆m hơgei. Dôm tơdrong jang ‘noh akŏm lơ̆m tơplih trong jang vă yak mơ̆t hơdăh ‘lơ̆ng hloh.”

Tơ̆ Kon Tum, hơtŏk hơnăp jang iung jang, năm tơgŭm, tơdrong pơcheh hơgei đơ̆ng hơdruh tơdăm, đơ̆ng blŭng sơnăm truh dang ei sơnăm mơ lôh tơring hlôi hơdrin vang jang kiơ̆ lơ tơdrong jang tơgop jang đang hơnăp jang tơm, hơnăp jang joăt jang păng vang jang hơtŏk tơiung mŭk drăm - tơpôl. ‘Nhŏng A Xây, Phŏ Bí thư Anih jang đoàn dêh char, Kơdră Jơnŭm vei lăng hơdruh tơdăm Việt Nam dêh char Kon Tum, tơbăt:  “Vă tơlĕch jang kiơ̆ đei iŏk yua lơ hloh, Khŭl chĕp kơ̆l pơgơ̆r Anih jang đoàn dêh char Kon Tum hlôi dăr hơlen, bơ̆jang ‘lơ̆ng pơ đĭ dôm tơdrong jang vă tơlĕch jang kiơ̆ lơ̆m khei 3 Khei hơdruh tơdăm. Pơhrăm dôm trong jang, tơdrong tơm ƀơm truh tơplih kơ sô̆ vă pơtho khoa hŏk, ki thuơ̆t ăn đoàn viên hơdruh tơdăm păng mă loi ‘noh jĭ tơmơ̆t ăn lơ̆m tơring hơtăih hơtŏ, tơring kon pơlei kon kông.”

Anih jang Đoàn dêh char Gia Lai kŭm ‘nao pơgơ̆r tơdrong jang pơ tôch 3 sơnăm pơ jing păng pơih să bơngai jang hơgei lơ̆m tơdrong jang Đoàn păng tơdrong jang hơdruh tơdăm hơioh dêh char Gia Lai păng pôk pơ ư Hơdruh tơdăm jang hơgei pơm kiơ̆ nơ̆r Ƀok Hồ sơnăm 2023. 3 sơnăm âu ki, rim kơdră Đoàn-Khŭl lơ̆m dêh char Gia Lai hlôi bơngơ̆t truh, tŭn pran dôm trong jang pơtho pơhrăm tơdrong joăt joe kach mang, jơhngơ̆m ‘mêm kơ teh đak, pơtho pơhrăm jơhngơ̆m đon ‘lơ̆ng, trong arih sa ‘lơ̆ng hơiă ăn hơdruh tơdăm hơioh. Anih jang Đoàn dêh char Gia Lai hlôi tơlĕch jang krao hơvơn “Mĭnh năr 1 tơdrong kơ tơ̆ng ang ‘lơ̆ng, mĭnh giĕng 1 tơdrong tơ roi hơiă” lơ̆m mạng tơpôl, chă ƀôh păng pôk pơ ư 27 ‘nu “bơngai ‘lơ̆ng, tơdrong ‘lơ̆ng” lơ̆m đoàn viên, hơdruh tơdăm.

Bơ̆ jang tơdrong tơchơ̆t kơ sô̆ 05 găh “Tŭn pran hŏk pơhrăm păng pơm kiơ̆ đon tơchĕng, jơhngơ̆m đon ‘lơ̆ng đơ̆ng Ƀok Hồ”, Khŭl chĕp kơ̆l pơgơ̆r Anih jang Đoàn dêh char Gia Lai hlôi lăng kăl tơlĕch jang tơdrong hŏk pơhrăm păng pơm kiơ̆ jơhngơ̆m đon ‘lơ̆ng đơ̆ng Ƀok Hồ, lăng ‘nâu jĭ hơnăp jang tơm, hơnơ̆ng lơ̆m rim tơdrong jang đơ̆ng khŭl jang Đoàn. Kiơ̆ đơ̆ng tơlĕch jang, hlôi đei ƀôh lơ bơngai hơgei, pơnam, yak hloh mơmat tơiung tơdrong jang sa, vei kơjăp sơđơ̆ng chĭnh trĭ, yua kơ tơdrong arih sa sơđơ̆ng kơ kon pơlei, pơjing tơring tơrang ‘nao. Hơdrin tơ̆ hơnăp kơnh hơnơ̆ng tŭn pran dôm tơdrong jang pơ jei băl ‘mêm kơ teh đak, iung jang vang akŏm hơtŏk tơiung mŭk drăm - tơpôl. Jĭ 1 lơ̆m dôm bơngai hơgei hloh đei pôk pơ ư Hơdruh tơdăm hơgei pơm kiơ̆ nơ̆r Ƀok Hồ, păng iŏk ƀăng khen đơ̆ng Anih vei lăng kon pơlei dêh char Gia Lai, oh Nay Wing, Bí thư anih jang đoàn apŭng Chư Sê, tơroi: “Năr ‘nâu ĭnh chhôk hơiă dêh, tơ̆ hơnăp kơnh gô đei dôm hơnăp jang tơm, hơdăh ‘lơ̆ng truh đoàn viên hơdruh tơdăm vă pơvei, hơtŏk đei dôm jơnei ‘lơ̆ng hloh dơ̆ng. Ĭnh gô jing bơngai năm hơdrol, iung jang hơdrol rim tơdrong vă pơm jŭk yŭk trong hơlâu ăn kơ đe đoàn viên hơdruh tơdăm. Hơtŏk loi dơ̆ng tơroi tơbăt, krao hơvơn đoàn viên hơdruh tơdăm găh dôm tơdrong jang nhen tơ roi tơbăt pơtho khôi luơ̆t, vei sơđơ̆ng trong nơnăm, pơm tơdrong hiôk vă hơdruh tơdăm gơh tŏk iŏk jên, tơchă ăn tơdrong jang, hơtŏk jên iŏk yua vă vei sơđơ̆ng tơdrong arih sa.”

 Chih iŏk tơdrong tơgop đơ̆ng sơnăm mơ lôh tơring, Kơdră Anih vei lăng kon pơlei dêh char Gia Lai hlôi hơpăh ƀăng khen ăn 6 khŭl păng 10 ‘nu bơngai yua kơ đei jang hơgei hloh lơ̆m tơdrong pơ jing păng pơih să bơngai jang hơgei lơ̆m tơdrong jang Đoàn păng tơdrong jang hơdruh tơdăm hơioh dêh char Gia Lai. Khŭl chĕp kơl pơgơ̆r Anih jang Đoàn dêh char Gia Lai kŭm pơ jao hơpăh ƀăng khen ăn 75 ‘nu hơdruh tơdăm hơgei pơm kiơ̆ nơ̆r Ƀok Hồ sơnăm 2023.