Hŏk tro drănglo Nguyễn Đức Danh (lăm 12 A1, Trưng THPT Lương Thế Vinh, apŭng Kbang, dêh char Gia Lai) jing minh lơ̆m 8 bơngai mơlôh, gơh hơgei kơ dêh char Gia Lai sơnăm 2023. 

Oei hŏk tơ̆ hnam trung, oh hlôi đei 4 đê tai khua hŏk kih thuơ̆t adoi đei hơpah kơjung. Lơ̆m noh, đe tai iŏk yua AI lơ̆m tơdrong tơgŭm hơlen păng vei lăng hnam trưng hŏk đei jơnei hơpah mă mônh kơ tơdrong pơlong tin hŏk mơlôh dêh char Gia Lai ‘măng mă 22-2023, đei jơnei mă 2 tơdrong pơlong tin hŏk mơlôh tơring Tŏk bŏk -Tây Nguyên păng đei iŏk hơpah pơchhơp jơhngơ̆m kơ jơ̆p teh đak. Nguyễn Đức Danh adoi jing bơngai hơgei lơ̆m tơdrong hŏk pơhrăm păng pơm kiơ̆ đon bơnôh ‘lơ̆ng Hồ Chí Minh kơ dêh char Gia Lai: “Hăm sơnong jang lơ̆m ƀan châ̆p hanh đoan hnam trưng, inh hơnơ̆ng vang jang tơnăp tôm tơdrong jang đei pơtm. Jinh minh hŏk tro noh inh sơkơ̆t tơdrong hŏk pơhrăm jing kăp gĭt hloh. Gơh đei jơnei tơnăp lơ̆m hŏk pơhrăm adoi jĭ kon nguan hŏk tro hơgei kơ Ƀok Hô jing hơdah lơ̆m tơdrong jang vă ning nai kơnh jing bơngai jang tơgop tơ-iung pơjing teh đak”.

Adoi hăm tơdrong hơpơi ‘meh plang, pơmai Nguyễn Hoài Phương – Ƀĭ thư Đoan Hơdruh Tơdăm CS Hồ Chí Minh apŭng Chư Păh, dêh char Gia Lai hlôi atŭm hăm đe hơdruh tơdăm pơjing tơring tơrang ‘nao păng pơyua ăn tơpôl.

Lơ̆m noh, hơdah noh jăl trong hơdruh tơdăm đei unh tơ̆k hơdah păng camera vei sơđơ̆ng tơpôl tơ̆ pơlei Phung, xah Ia Mơ Nông. Atŭm hăm noh đei 5 tŏ hnam ‘mêm kơ-eng păng lơ trong jang tơgŭm ăn đe hơ-ioh kon kông pơti mĕ ƀă. Pơmai Nguyễn Hoài Phương ăn tơbăt: “Jĭ bơngai drăkăn jang kơdră đoan, inh hơnơ̆ng akŏm tơdrong hŏk pơhrăm kiơ̆ Ƀok đơ̆ng dôm tơdrong iĕ hloh, ƀônh hloh. Lơ̆m khei năr âu ki, inh atŭm hăm đoan viên hơdruh tơdăm tơ̆ tơring vang jang keh đang hloh 550 tơdrong jang hơdruh tơdăm, hăm kơjă hloh 8,5 tih hlj. Nhôn tơchĕng noh jĭ tơdrong ƀônh hiôk vă đe mơlôh gơh hŏk pơhrăm, plang jơhngơ̆m păng tih vơ̆ djơ̆ ‘lơ̆ng”

Đơ̆ng sơnăm 2021 truh dang ei, tơ̆ dêh char Gia Lai đei 235 bơngai mơlôh đei pôk bơnê jing đe hơdruh tơdăm pơm kiơ̆ nơ̆r Ƀok. ‘Nhŏng Đỗ Đức Thanh – Phŏ Ƀĭ thư Đoan Hơdruh Tơdăm CS Hồ Chí Minh dêh char Gia Lai ăn tơbăt, lơ̆m dôm ‘măng pơlong nhen: hơdruh tơdăm iung pơm jang, sơnăm mơlôh gơh hơgei lơ̆m vei lăng teh đak, hơdruh tơdăm iung pơm jang... lơ hơdruh tơdăm hlôi tơƀôh đei jơhngơ̆m đon plang akŏm jơhngơ̆m mơlôh lơ̆m tơdrong hŏk pơhrăm, pơm jang, hơtŏk mŭk drăm – tơpôl: “Tơdrong pơih să um ai ‘lơ̆ng, trong jang hơgei jing minh lơ̆m dôm tơdrong jang hơnơ̆ng. Nhôn đei minh tơdrong juăt jang gah pơih să dôm trong jang âu, mă kăl noh hơtŏk pran tơdrong hŏk pơhrăm păng pơm kiơ̆ đon bơnôh, trong jang ‘lơ̆ng Hồ Chí Minh. Kiơ̆ kơ noh adoi pơjing đei tơdrong hŏk hơlen dih băl pơjing đei khul mơlôh dơnưp pơyua ăn tơpôl”

Đơ̆ng tơdrong chă tơroi tơbăt, hơtŏk pran tơdrong hŏk pơhrăm păng pơm kiơ̆ trong jang ‘lơ̆ng Hồ Chí Minh ăn đe mơlôh lơ̆m dêh char lơ̆m khei năr âu ki, Anih Juăt jang Đoan dêh char Gia Lai sơkơ̆t hơdah minh ƀar trong jang vă hơtŏk pơ-‘lơ̆ng tơdrong hŏk pơhrăm păng jang kiơ̆ Ƀok lơ̆m khei năr truh. Sơkơ̆t rim sơnăm tơlĕch tơdrong jang tơm kơ dêh char, akŏm pơma dơnuh chĭnh trĭ hăm hơnăn “Ƀlŏk kơ Ƀok – Đon bơnôh bơ̆n phăl hlăng hloh” trŏ ah tơbăt năr rơneh Ƀok. Pơtơm tơdrong jang “Tơ̆k hơdah tơdrong hơpơi sơnăm mơlôh Việt Nam”, pơgơ̆r pôk bơnê kơ hơdruh tơdăm jang hơgei lơ̆m jang kiơ̆ Ƀok tơ̆ dôm jăl jang, pôk bơnê hăm hơdruh tơdăm jang hơgei lơ̆m tôm tơdrong jang. Hơtŏk pran tơdrong pơm kiơ̆ hơvơn “Rim năr minh tơdrong ‘lơ̆ng, rim giĕng minh tơdrong rŏ” tơ̆ trang kơdih po, fanpage kơ dôm anih jang Đoan, jơnŭm jang. Akŏm tơlĕch jang kiơ̆ Pơkăp đơ̆ng Anih jang kơpal kơ Đoan dêh char gah tơdrong pơih să um ai, tơdrong ‘lơ̆ng lơ̆m tơdrong hŏk pơhrăm păng pơm kiơ̆ đon bơnôh, trong jang ‘lơ̆ng Hồ Chí Minh đơ̆ng dang ei truh sơnăm 2027.