‘Noh kơ jĭ kơtơ̆ng ang tơ̆ Hop akŏm lơ̆m teh đak găh tơdrong jang tang găn ‘mi kial pơrăm păng tơchă dŏng sar bar sơnăm 2024 yua đơ̆ng Phŏ Thủ tướng Trần Lưu Quang pơgơ̆r pơgê 10/5. Chih jô̆ đơ̆ng Anih jang găh tŏ ‘mi kial, Anih tơm vei lăng găh Tơmam drăm păng Cham char ăn ƀôh hơyuh tŏ jô̆ păh lăp 4 khei blŭng sơnăm tơ̆ rim tơring lơ̆m teh đak tă kơ lơ hloh pơting hăm jô̆ păh lăp lơ sơnăm đơ̆ng 0,5-1,5 độ C.

Tơring Tây Nguyên păng Pơbăh kŭm hlôi đei ƀôh tŏ hang tôch kơ dêh pơdui đunh. Đak ƀoh mơ̆t hrơm tơ̆ tơring Pơbăh truh hrôih păng kơtang hloh jô̆ păh lăp lơ sơnăm. Kiơ̆ kơ ƀok Hoàng Đức Cường, Phŏ kơdră Anih jang găh tŏ ‘mi kial, tơplih hơyuh tŏ ‘mi kial hơnơ̆ng pơm hơtŏk tơdrong ưh kơ ‘lơ̆ng, sơnăm ‘nâu đei ƀôh tŏ ‘mi kial pơrăm pơđĭ hloi tŏ hang, đak ƀoh hrơm, kial hơbŭt, ‘mi prĕl. Tơdrong El Nino tŏ hang tŏk bŏk tơ jur rŏ lăng tơplih jing tơdrong La Nina hăm ‘mi, kial hơbŭt, đak tih, đak lơ̆p đei ƀôh lơ, akŏm lơ̆m hơtuch sơnăm.