Tơ̆ năr roi tơƀôh trong rơih hŏk tro hŏk, roi tơbăt tơdrong jang ăn hŏk tro hok đang lăm 9, oh Trần Thuỳ Tú, hŏk tro lăm 9D, hnam trưng THCS Thành Nhất, plt Buôn Ma Thuột răp mơ̆ng tôch hơlen, chih răk rim tơdrong kăl păng pơ̆n ha ƀơ̆r apinh hăm dôm tơdrong oh tam mă băt. Oh tơroi: “Kiơ̆ đơ̆ng năr âu oh hlôh vao lơ ƀiơ̆ găh tơdrong tơm đơ̆ng pơtho pơhrăm kŭm nhen hŏk tơdrong jang tơ̆ dôm anih pơtho tơdrong jang. Kơna gô đei 1 tơdrong chă rơih ‘lơ̆ng ăn đe bôl boăl hŏk tro ưh kĕ druh kiơ̆ tơdrong hŏk pơhrăm. Đe boăl gô đei trong vă tưk hơtŏk hơkâu kơdih kŭm nhen chă rơih đei tơdrong jang lăp hăm kơdih ƀiơ̆”. 

‘Nâu jĭ sơnăm mă blŭng Anih vei lăng pơtho pơhrăm dêh char Đắk Lắk pơgơ̆r “Năr roi tơƀôh trong iŏk hŏk tro mât hŏk, roi tơbăt tơdrong jang ăn hŏk tro hŏk đang lăm 9”. Kô Nguyễn Thị Lương, hnam trưng THCS Nguyễn Thị Minh Khai, plt Buôn Ma Thuột ăn tơbăt, Tơdrong “Pơtho hŏk kiơ̆ tơdrong jang păng pơm kiơ̆ trong klăih song hŏk tro hŏk pơhrăm mưh hŏk phô thŏng tơ̆ dêh char Đắk Lắk đơ̆ng 2018 - 2025” đei tơlĕch đơ̆ng sơ̆ bơih, mă lei dôm hnam trưng pơjing trong roi tơbăt kơdih ngăl kơna tam mă gan đei yoa. Kơplăh ‘nŏh hŏk tro ‘mĕh chă hơlen găh tơdrong hŏk tơdrong jang roi đunh roi lơ: “Đei 1 kơsô̆ hŏk tro hŏk chư ưh gan gơh mă lei tôch gơ̆h hăm dôm tơdrong jang nai, kơna đe oh ‘mĕh truh chă hơlen năng. Nhen dôm ‘măng roi tơƀôh thoi âu hŏk tro hnam trưng nhôn chih măt tôch lơ, ‘mĕh chă hơlen năng mă hơdăh ƀiơ̆ găh dôm hnam trưng hŏk trung câp tơdrong jang”.

Vang truh akŏm lơ̆m năr roi tơbăt găh trong hŏk chư, hŏk tơdrong jang ăn hŏk tro hŏk đang lăm 9, ƀok Đặng Như Thanh, bơngai dơ̆ng tang ăn Hnam trưng Trung cấp Đắk Lắk akhan, ‘nâu jĭ tơdrong jang tôch kăl vă tơgŭm ăn đe oh kơchăng ƀiơ̆ lơ̆m tơdrong chă hơlen năng, rơih tơdrong hŏk pơhrăm, hŏk tơdrong jang mă lăp hăm đon rơgei đơ̆ng kơdih păng tơdrong ‘mĕh vă đơ̆ng tơpôl. Tơdrong hŏk tơdrong jang oei hơnơ̆ng pơih trong ăn đe oh hŏk pơhrăm păng tơjur ƀiơ̆ jên hŏk pơhrăm: “Đe ŏh hŏk chư hai, hŏk tơdrong jang hai, đơ̆ng rŏng 3 sơnăm đei ŏh đei hloi 2 ƀăng: Ƀăng lăm 12 păng ƀăng tơdrong jang. Đơ̆ng noh đe oh gơ̆h rơih hŏk dơ̆ng Cao đẳng, Đại học vă pơm kiơ̆ tơdrong ‘mĕh vă đơ̆ng kơdih. Găh noh dơ̆ng, Teh đak hrei ‘nâu đei lơ tơdrong tơgŭm ăn đe ŏh hŏk tơdrong jang hai, hŏk chơ hai, lơ tơdrong tơgŭm hơiă tơpă”.

Sơnăm hŏk 2024 - 2025, Đắk Lắk pơhlom năng đei dang 31.000 ‘nu hŏk tro tôt nghiêp lăm 9, tŏk hlŏh 2.000 ‘nu oh pơting hăm sơnăm hŏk adrol sơ̆. Lơ̆m kơsô̆ âu đei dang 23.000 ‘nu oh vă mât hŏk tơ̆ dôm Hnam trưng THPT kiơ̆ tơdrong hơgăt, hlŏh 4.000 ‘nu hŏk tro hŏk tơ̆ Anih pơtho pơhrăm hơnơ̆ng – anih pơtho tơdrong jang, oei đei ‘nŏh hŏk kiơ̆ trong hŏk tơdrong jang đơ̆ng Tơdrong “Pơtho pơhrăm kiơ̆ tơdrong jang păng klăih song hŏk tro hŏk pơhrăm mưh hŏk phô thŏng tơ̆ dêh char Đắk Lắk đơ̆ng 2018 - 2025”.

Kiơ̆ ƀok Đỗ Tường Hiệp, Phŏ Kơdră Anih vei lăng pơtho pơhrăm dêh char Đắk Lắk, Anih oei hơtŏk tơdrong roi tơƀôh trong rơih hŏk tro hŏk, roi tơbăt tơdrong jang ăn hŏk tro jăl 2 vă đe ŏh gơ̆h chă rơih đei trong yak lăp ‘lơ̆ng: “Anih pơtho pơhrăm hơnơ̆ng pơm hơtŏk đon hlôh vao ăn khul thây kô, kăn ƀô̆ vei lăng, mă loi jĭ hŏk tro, mĕ ƀă hŏk tro păng đĭ đăng tơpôl băt hơdăh tơdrong klăih song trong hŏk pơhrăm đơ̆ng rŏng kơ hŏk đang lăm 9 ‘nŏh tôch gĭt kăl. Đe oh gơ̆h tơplih ming tơdrong arih xa kơdih, hŏk pơhrăm đơ̆ng kơdih kiơ̆ đơ̆ng ưh hơdrô̆ hŏk chư đĕch mă đơ̆ng đơ̆ng hŏk tơdrong jang hai păng gơ̆h pơjing tơdrong arih xa ăn kơdih tơ̆ ning mônh kơnh kiơ̆ đơ̆ng hŏk tơdrong jang”. 

Kiơ̆ đơ̆ng hơtŏk tơdrong roi tơƀôh trong rơih iŏk hŏk tro mât hŏk, roi tơbăt tơdrong jang, hơmĕng tơ̆ hơnăp kơnh mĕ ƀă hŏk tro păng đe ŏh hŏk tro tôt nghiêp lăm 9 tơ̆ Đắk Lăk gô đei lơ trong rơih lăp ‘lơ̆ng, veh ver tơdrong tơgar băl chă hnam trưng vă hŏk nhen sơnăm sơ̆.