Hăm rim tơdrong đei băt, ƀôh, hlôh vao kon pơlei Tây Nguyên mă lơ ‘nŏh ưh gan tơlĕch jơhngâm tơ ‘ngoăih, arih xa gơnơm đơ̆ng choh jang xa tơ̆ tơring, lơ bơngai tam mă lĕch tơ̆ hơtăih pơlei lơ̆m lơ sơnăm. Yoa thoi nŏh, tơdrong tơroi tơbăt, mă loi jĭ roi tơbăt găh đak dơsĭ, achon kông tơ̆ đak dơsĭ athei đei trong roi tơbăt mă rơgei, kiơ̆ lơ tơdrong, tơmât hơdai tơdrong roi tơbăt hăm krao hơvơn kon pơlei. Công ty tơm Tân Cảng Sài Gòn jang hơdoi hăm dôm tơring, anih jang pơgơ̆r dôm jĭt ‘măng roi tơbăt găh đak dơsĭ, achon kông tơ̆ đak dơsĭ, akŏm đei hlŏh 4.000 ‘nu kăn ƀô̆, đảng viên, linh so, kon pơlei, công nhân, sinh viên păng hŏk tro tơ̆ tơring Tây Nguyên.

Ƀok A Bớt, Phó Bí thư chĕp kơ̆l đảng dêh char Kon Tum ăn tơbăt: “Tân Cảng Sài Gòn ăn bơngai jang roi tơbăt năm truh tơ̆ dôm apŭng hơtăih yăih kơ dêh char vă roi tơbăt, tơgŭm ăn kăn ƀô̆, đảng viên, kon pơlei mă loi jĭ đe ŏh hŏk tro hlôh vao hơdăh găh hơnăp jang hăm đak dơsĭ Việt Nam. Hop akŏm jĭ jơnăr vă Ban tuyên giáo dôm dêh char hơlen năng tơdrong jang hơdoi păng tơƀâp, hŏk iŏk đơ̆ng băl dôm tơdrong kăl, dôm trong jang hơiă mưh bơ̆ jang tơdrong jang chinh trĭ đơ̆ng Đảng păng teh đak.”

Tơdrong thi chă hơlen năng trư̆k tuyê̆n “Tân cảng Sài Gòn 35 sơnăm jang tŏk tơgăl lơ̆m apŭng plenh teh, tơguăt jơ̆p plei teh” sơng đei vă jê̆ 50 rơbâu ‘nu bơngai vang thi tơ̆ 63 dêh char, plt; pơjing đei đon hlôh vao kơjăp găh hơnăp jang gĭt kăl đơ̆ng đak dơsĭ, achon kông tơ̆ đak dơsĭ Việt Nam lơ̆m jơ̆p tơring lơ̆m teh đak pơma atŭm păng Tân Cảng Sài Gòn pơma hơdrô̆. Vă hơtŏk tơdrong jang hơdoi vang roi tơbăt găh đak dơsĭ hăm dôm tơring, ƀok Huỳnh Thế Mạnh, Kơdră chĕp kơ̆l Ban tuyên giáo dêh char Gia Lai pơma: “Athei bơngai roi tơbăt tơgŭm ăn Ban tuyên giáo jur tơ̆ dôm apŭng roi tơbăt găh tơdrong kăl, anih dơ̆ng, hơnăp jang gĭt kăl đơ̆ng đak dơsĭ, achon kông tơ̆ đak dơsi VN, rim tơdrong tơ̆ đak dơsĭ biển đông hrei ‘nâu...Hơnơ̆ng pơgơ̆r dôm tơdrong thi gĭt kăl đei yoa vă tưk tơiung jơhngâm đon ‘mêm kơ đak dơsĭ hăm kon pơlei.”

Đại tá Nguyễn Năng Toàn, Bí Thư Đảng, Kơdră chĕp kơ̆l công ty tơm Tân Cảng Sài Gòn pơma hơdăh: Lơ̆m sơnăm 2024, Công ty tơm Tân cảng Sài Gòn pơma hơdrô̆ chih hơdăh vă hơtŏk hlŏh dơ̆ng dôm tơdrong jang hơdoi hăm Ban tuyên giáo dôm dêh char Tây nguyên jô̆ hloi găh trong pơgơ̆r păng kơsô̆ ‘măng pơgơ̆r. Lơ̆m noh, akŏm tơplih ‘nao, tơlĕch lơ trong roi tơbăt, năng kăl truh tơ̆ rim khul grŭp, kon pơlei kăl đei roi tơbăt, atŭm hăm ‘nŏh jang hơdoi vang pơgơ̆r roi tơbăt găh đak dơsĭ, achon kông tơ̆ đak dơsĭ hơdai hăm bơ̆ jang “dŏng tơgŭm”, vang vei sơđơ̆ng ‘lơ̆ng tơdrong arih xa tơpôl, vă hơtŏk tơdrong ‘lơ̆ng păng đei yoa đơ̆ng tơdrong roi tơbăt truh hăm đĭ đăng kon pơlei.

“Vă hơnơ̆ng hơtŏk kơsô̆ bơngai roi tơbăt jur tơ̆ dôm tơring, hơnơ̆ng tơplih ‘nao trong roi tơbăt lơ ƀiơ̆ ăn kon pơlei Tây nguyên, hơnơ̆ng pơih xă bơngai vă roi tơbăt, năng kăl truh tơ̆ đe hŏk tro sinh viên, anih tĕch mơdro, anih jang hơdoi, bơngai tơmât jên jang păng tưk tơiung jơhngâm pran atŭm, akŏm tôch ai jên tơmam, khul jang vă hơtŏk tơdrong đei yoa đơ̆ng roi tơbăt.”

Chuẩn đô đốc Đỗ Văn Yên, Phó Chính ủy Khul linh đak dơsĭ ăn tơbăt: Kơdră chĕp Đảng, Anih chĕp kơ̆l pơgơ̆r khul linh đak dơsĭ hơnơ̆ng jang hơdoi mă kơjăp, pơgơ̆r bơ̆ jang đei yoa ‘lơ̆ng dôm tơdrong đei tơlĕch, hơnơ̆ng tơchĕng hơlen tơdrong vă roi tơbăt, trong pơgơ̆r roi tơbăt ‘nao; tơmât hơdai hăm tưk tơiung tơdrong jang “Yoa đak dơsĭ, achon kông đak dơsĭ Việt Nam” păng tơdrong jang “Jơ̆p lơ̆m teh đak yoa Trường Sa, Trường Sa yoa jơ̆p lơ̆m teh đak”.

“Tơdrong jang vei lăng tơdrong pơm tơm tơ̆ đak dơsĭ, achon kông đak dơsĭ lơ̆m chăl ‘nao roi kăl hlŏh dơ̆ng hăm tơdrong jang roi tơbăt. Khul linh đak dơsĭ tơ̆ hơnăp kơnh hơnơ̆ng jang hơdoi hăm dôm dêh char, plt, anih tơm, anih jang tơ̆ trung ương hơtŏk tơdrong ‘lơ̆ng đơ̆ng roi tơbăt găh đak dơsĭ, achon kông tơ̆ đak dơsĭ, năng ‘nâu jĭ tơdrong jang tơm tôch gĭt kăl...”

Công ty tơm bơ̆ jang đei yoa ‘lơ̆ng tơdrong tơgŭm, vei sơđơ̆ng tơdrong arih xa tơpôl tơ̆ 3 dêh char đei kĭ pơkăp; iŏk rong truh lôch hăm 28 ‘nu Mĕ Việt Nam nuih mơng, ‘nhŏng ŏh linh lôch tang teh đak tơ̆ tơring; tơgŭm man 15 tŏ hnam ‘mêm mơnat; hơpăh hŏk ƀŏng “Tơ̆k hơdăh đon hơpơi ‘mĕh” ăn đe ŏh hŏk tro tơnuh hŏk gơ̆h hơgei. Hơpăh tơmam ăn dôm bơngai đei kŏng, kon pơlei đei tơdrong arih xa pơmat tat, linh jĭ rơka, linh jĭ jăn tơ̆ tơring.