Tơ̆ Gia Lai, 2847 hơdruh tơdăm dêh char Gia Lai năm pơm ƀô̆ đô̆i lơ̆m pơgê 25/2. Lơ̆m kơsô̆ âu, đei 59% ‘noh jĭ bơngai kon kông, 479 ‘nu đei hla ar apĭnh năm pơm ƀô̆ đô̆i, 72 ‘nu đei hŏk đại học, cao đẳng. Lêh pơjao iŏk lĭnh đei dêh char Gia Lai pơgơ̆r tih tơ̆ 17 hơnih tơ̆ 17 apŭng, thị xã, pơlei tơm kơ tơring.

Oei tơ̆ Đak Lak, đei 3.026 ‘nu kon pơlei năm pơm ƀô̆ đô̆i ‘măng âu. Vang truh akŏm tơ̆ Hơnih pơjao iŏk lĭnh tơ̆ thị xã Buôn Hồ, Đắk Lắk, đei Trung tướng Thái Đại Ngọc, Yŏng vei lăng khŭl lĭnh quân khu V, Bí thư Anih jang Đảng dêh char Đắk Lắk Nguyễn Đình Trung kŭm hăm kơdră tơring păng lơ lap kon pơlei. Tơ̆ hơnih pơjao - iŏk lĭnh tơ̆ Buôn Hồ đei 173 ‘nu kon pơlei, lơ̆m noh 80 ‘nu hlôi chih hla ar apĭnh năm pơm ƀô̆ đô̆i.

Oei tơ̆ Đắk Nông, Lêh pơjao linh tơ̆ dôm apŭng lơ̆m dêh char Đắk Nông đei pơgơ̆r tôch ‘lơ̆ng rŏ, ƀĕnh tơdrong chơt hơiă đơ̆ng đe druh dăm, sơnăm mơlôh năm pơm linh, ‘moi kiơ̆ hơyak jơ̆ng đơ̆ng đe ‘nhŏng, đe ƀă adrol sơ̆. Kiơ̆ đơ̆ng noh, tưk tơiung jơhngâm đon jang kăch mang, jơhngâm hưch hanh čhôk ‘nă kơ hơdrĕch hơdrung păng tơdrong juăt ‘lơ̆ng hơiă đơ̆ng sơ̆, khŏm pơjing păng vei lăng kơjăp ‘lơ̆ng teh đak. Sơnăm 2024, dêh char Đắk Nông đei pơjao iŏk hlŏh 1.150 ‘nu druh dăm năm pơm linh, lơ̆m noh đei 900 druh dăm năm pơm ƀô đô̆i păng hlŏh 250 ‘nu druh dăm năm pơm công an.

Đe druh dăm rơgei đei đon ‘lơ̆ng đơ̆ng dêh char Đắk Nông năm pơm linh ‘măng mă âu vă bơ̆ jang tơ̆ dôm anih jang kơ Anih tơm vei lăng công an, Quân đoàn 3 (Anih tơm vei lăng khul linh teh đak); Trung đoàn linh tơ̆ teh 994 (Anih chĕp kơl pơgơ̆r khul linh dêh char Đắk Nông), Anih chĕp kơ̆l pơgơ̆r khul linh vei lăng tơring sơlam dêh char păng Công an dêh char Đắk Nông.

Lêh pơjao iŏk lĭnh sơnăm 2024 đei 10 apŭng, pơlei tơm kơ dêh char Kon Tum vang pơgơ̆r lơ̆m pơgê 25/2 kiơ̆ ƀlep tơdrong hơgăt, vei sơđơ̆ng ‘lơ̆ng, tơpăt, ‘mơ ‘met păng tơpă jing Năr năm pơm ƀô̆ đô̆i. Sơnăm ‘nâu lơ̆m dêh char Kon Tum đei 804 ‘nu kon pơlei năm pơm ƀô̆ đô̆i.

Roi tơbăt đơ̆ng Anih tơm pơgơ̆r khŭl lĭnh dêh char Kon Tum ăn ƀôh Khŭl jang vei lăng Khŭl lĭnh rim tơring hlôi bơ̆jang kiơ̆ tơdrong jang rơih iŏk, krao kon pơlei năm pơm ƀô̆ đô̆i kơjăp, drơ̆ng 1 nơ̆r, hrơ̆ch hơdai, ƀlep Luơ̆t pơm lĭnh, vei sơđơ̆ng rơđăh, tơpăt lơ̆m rơih lĭnh.

Lơ̆m kơ sô̆ 804 ‘nu kon pơlei kơ dêh char Kon Tum năm pơm ƀô̆ đô̆i đei 26 ‘nu kon pơlei chih hla ar apĭnh pơm ƀô̆i đô̆i, lĭnh hle lơ̆m sơnăm đơ̆ng 18 truh 27 sơnăm vei sơđơ̆ng găh jơhngơ̆m pran; 28 lĭnh hle đei hŏk Trung cấp, Cao đẳng păng Đại học; 2 lĭnh hle ‘noh đảng viên. Hơdrol kơ năm pơm ƀô̆ đô̆i dôm lĭnh hle păng ŭnh hnam adoi iŏk đei tơdrong bơngơ̆t truh, pơlung đơ̆ng kơdră đảng, khŭl kơdră tơring kŭm nhen dôm anih jang, khŭl grŭp tơring.