‘Măng thi tốt nghiệp THPT sơnăm ‘nâu dêh char Kon Tum đei hlŏh 5.000 ‘nu hŏk tro, tŏk 273 ‘nu hŏk tro pơtêng hăm sơnăm sơ̆. Lơ̆m nŏh, hlŏh 4.800 ‘nu hŏk tro thi THPT păng hlŏh 160 ‘nu hŏk tro thi ƀô tŭk. Kơsô̆ hŏk tro bơngai kon kông vang thi đei hlŏh 1.700 ‘nu, hŏk tro chih măt năm thi kơdih vă jê̆ 220 ‘nu. Dêh char Kon Tum pơjing 12 anih thi, lơ̆m nŏh 5 anih thi tơ̆ plt Kon Tum, 7 anih thi tơ̆ dôm apŭng păng bơngai lăng thi tơ̆ dôm anih thi ‘nŏh hlŏh 900 ‘nu. Thây Bùi Văn Quốc, Phŏ vei lăng Hnam trưng tĕh đak rong hŏk tro kon kông apŭng Kon Plông, ăn tơbăt, sơnăm ‘nâu, hnam trưng đei 82 ‘nu hŏk tro vang thi tốt nghiệp THPT mă lơ ‘nŏh jĭ kon hơ ‘lơ̆p bơngai Xơ đăng ngăl:

“Truh dang ei hnam trưng hlôi pơgơ̆r đang tơdrong pơtho ming ăn hŏk tro, hnam trưng kŭm pơgơ̆r hloi tơdrong thi pơlong năng ăn hŏk tro bơih. Tơ̆ hơnăp kơnh, Hnam trưng hơnơ̆ng chă rơih đe hŏk tro hŏk ưh gan gơ̆h vă pơtho ming dơ̆ng, adrin vă đĭ đăng hŏk tro thi đŏu tốt nghiệp ngăl. Găh tơdrong rong 'me hŏk tro, hnam trưng pơtho ăn rim lăm, khul jang tơ̆ hnam trưng hơtŏk tơmam xa ăn đe ŏh lơ̆m khei 6 vă đe ŏh đei jơhngâm pran 'lơ̆ng mưh vang thi”.

‘Măng thi tốt nghiệp THPT sơnăm 2023, dêh char Gia Lai đei hlŏh 14.800 ‘nu hŏk tro chih măt vang thi, lơ̆m nŏh đei hlŏh 3.100 ‘nu hŏk tro bơngai kon kông. Dêh char krao akŏm dang 2300 ‘nu kăn ƀô̆ vang lăng thi tơ̆ 41 anih thi lơ̆m 17 apŭng, thĭ xăh, plt. Anih pơgơ̆r thi kơ dêh char, athei Anih vei lăng kon pơlei dôm apŭng, thĭ xăh, plt păng dôm anih jang đei ƀơm truh tơgŭm ăn hŏk tro gre yak vih vât, hơmet anih oei, sŏng xa ăn hŏk tro. Găh nŏh dơ̆ng, hơlen năng, tơgŭm jên ăn đe hŏk tro bơngai kon kông, unh hnam đei kŏng, unh hnam tơnuh, hŏk tro tơ̆ tơring hơtăih yăih, vă ưh đei hŏk tro yơ hŭt thi yoa tơƀâp tơdrong pơmat tat găh mŭk drăm dăh mă gre yak vih vât.

Pơma tơ̆ jơ bơ̆ jang hăm Anih pơgơ̆r thi tốt nghiệp THPT 2 dêh char Kon Tum păng Gia Lai, Phŏ Kơdră tơm vei lăng pơtho pơhrăm Ngô Thị Minh tơchĕng ‘lơ̆ng tơdrong jang hơmet ăn ‘măng thi tôch kơchăng đơ̆ng 2 dêh char. Atŭm hăm ‘nŏh athei dôm anih jang đei ƀơm truh hơnơ̆ng bơ̆ jang ‘lơ̆ng dôm tơdrong hơgăt đơ̆ng Anih tơm vei lăng pơtho pơhrăm găh tơdrong thi; hơlen năng rim tơdrong hơmet vă chă ƀôh păng hơmet ming tơtom hăm dôm tơdrong ưh kơ ‘lơ̆ng tơdăh đei. Hơtŏk tơdrong roi tơbăt, pơtho tơƀôh ăn hŏk tro păng mĕ ƀă hŏk tro găh tơdrong hơgăt, nơ̆r pơtho thi; jang hơdoi kơjăp hăm dôm anih jang kơpal vă pơm ‘lơ̆ng, hơtŏ hơnơ̆ng, trŏ ƀlep ăn ‘măng thi.

Phŏ Kơdră vei lăng pơtho pơhrăm Ngô Thị Minh, pơma: “Anih pơgơ̆r kơdêh char găh tơdrong thi tốt nghiệp THPT 2023 hlôi jang kiơ̆ rim tơdrong hơgăt păng tôch kơchăng lơ̆m tơdrong jang kơdih. Tơdrong pơtâp pơhrăm ăn dôm bơngai jang găh tơdrong thi ‘nŏh tôch kăl, gơ̆h lăng ƀôh dôm tơdrong đei chih lơ̆m hla ar oei tam mă lăp hăm tơring vă tơlĕch nơ̆r pơma, apinh vă đơ̆ng rŏng kơ thi, dăh mă ‘măng thi sơnăm đơ̆ng rŏng kơnh đei yoa ƀiơ̆, ‘lơ̆ng ƀiơ̆ kơ ‘măng thi sơ năm hơdrol. Tơdrong hơgăt thi, hăm đe ŏh năm bơ̆n ưh gơ̆h lăng pơhơi ‘năi, tơdrong roi tơƀôh nơ̆r hơgăt thi ăn đe ŏh athei tơplih ming vă đe ŏh ƀônh hlôh, vă đe ŏh ƀôh kơ dih kâu jĭ bơngai tơm lơ̆m tơdrong thi. Tơdrong đe ŏh năm thi athei năm trŏ jơ, pơm kiơ̆ dôm tơdrong hơgăt kăl đei roi tơbăt mă hơdăh ăn đe ŏh ‘năi” .

Phŏ Kơdră tơm vei lăng pơtho pơhrăm Ngô Thị Minh oei athei dôm tơring ưh gơ̆h đei đon lăng pơhơi; mưh pơtâp pơhrăm tơdrong hơgăt thi athei tơplih ‘nao trong pơtho tơƀôh vă gơ̆h hlôh vao rim tơdrong hơgăt, bơ̆ jang trŏ hơnăp jang kơdih; roi tơƀôh mă tôm vă bơngai jang lơ̆m ‘măng thi gơ̆h tơjră hăm rim tơdrong; trong dăr hơlen đơ̆ng Anih pơgơ̆r thi athei chih mă hơdăh.

Phŏ Kơdră tơm vei lăng pơtho pơhrăm Ngô Thị Minh, pơma hơdăh: “’Măng thi athei jang ‘lơ̆ng tơdrong hơgăt vei lăng sơđơ̆ng. Sơđơ̆ng găh jơhngâm pran, tơdrong arih kơ đe ŏh. Bơ̆n adrin vă đe ŏh mât tơ̆ lăm thi đei jơhngâm đon hiôk sơđơ̆ng, huei đei pơngơ̆t tơdrong kiơ. Sơđơ̆ng găh tơmam xa, sơđơ̆ng mưh đei ‘mi, trong rơbơ̆r, tơdrong yak vih vât đơ̆ng đe ŏh pơmat tat. Sơđơ̆ng găh tang găn unh xa đôh, ƀât lăp mưh ‘mi pơm ăn unh điêm cham. Sơđơ̆ng găh tơdrong vei lăng đê thi, ƀai thi. Sơđơ̆ng găh tơdrong tang găn jĭ vă pơm ‘lơ̆ng ăn tơdrong thi”.

‘Măng thi tốt nghiệp THPT sơnăm 2023 pơgơ̆r ƀât hơtuch khei 6. Lơ̆m nŏh, ‘năr 27/6 ‘nŏh jĭ năr pơm hla ar thi. Pơgơ̆r lăng thi tốt nghiệp THPT lơ̆m 2 năr ‘năr 28 păng 29/6. Dôm tơring athei tơrĕk truh tơdrong roi tơbăt vă hŏk tro, mĕ ƀă hŏk tro păng tơpôl băt hơdăh tơdrong gĭt kăl đơ̆ng thi tốt nghiệp THPT; tơtom pôk pơ ư dôm khul grŭp, rim bơngai jang ‘lơ̆ng lơ̆m tơdrong pơgơ̆r thi kŭm nhen sek tơlang tơpăt dôm bơngai pơm glăi, pơm ưh ‘lơ̆ng truh tơdrong thi.