Ưh hơdrô̆ tơ̆ lăm hŏk, tơ̆ dôm lăm oei kơ đe hŏk tro lơ̆m kĭ tŭk xă kơ Hnam trưng hŏk tro kon kông hŏk oei ha doi THCS apŭng Kon Plông, tơdrong hăt hot hŏk pơhrăm adoi đei akŏm tơnăp păng tenh kuăng.

'Nguaih kơ jơ đei bơngai pơtho chă pơtho tơ̆ lăm, 82 'nu hŏk tro kơ hnam trưng vang pơlong tôt ngĭp THPT sơnăm âu adoi kơchăng lơ̆m tơdrong kơdih hŏk pơhrăm. Oh Trần Trung Thành, hŏk tro lăm 12B ăn tơbăt: “Nhôn axong jơ ăh pơgê noh hŏk pơhrăm tơ̆ lăm. Ăh kơsơ̆ noh hŏk pơhrăm răh, pơchơt răh vă da ƀiơ̆ kơ hrat. Nhôn hơdrin dơh po vă keh đang dôm tơdrong mă thâi kô pơtho adoi nhen nhôn hơdrin chă bơ̆ lơ đê pơlong hơlen lăng đê pơlong đơ̆ng dôm xơnăm adrol vă gơh đei tơdrong hlôh vao hơdăh ăn 'măng pơlong THPT teh đak truh âu kơnh”.

Hăm 69 hŏk tro kon hơ-ioh kon kông năm pơlong tôt ngĭp THPT xơnăm âu, ƀok thâi Bùi Văn Quế, Phŏ Kơdră hnam trưng hŏk tro kon kông hŏk oei hadoi THCS apŭng Kon Plông ăn tơbăt, Jơnŭm pơgơ̆r hnam trưng păng đe thâi kô 'măn ăn đe oh tơdrong tơgŭm kăp gĭt nhen: axong bơngai pơtho kơtă vei lăng pơtho pơhrăm đơ̆ng đe hŏk tro ăh kơmăng; hăm đe hŏk tro hŏk tơjruh axong bơngai pơtho chă tơgŭm, pơtho hơdrô̆ vă đe oh lui ngeh tơnăp ăh năm akŏm pơlong: “Jơnŭm pơgơ̆r hnam trưng hơnơ̆ng tơguăt tơjê̆, hơlêm đe oh chă hŏk pơhrăm tơnăp tơ̆ lăm. Atŭm hăm noh lơ̆m rim 'măng xŏng xa lơ̆m năr, nhôn năm truh anih pai gŏ chă apinh jet gia đe oh et xa thoi yơ. Jơnŭm pơgơ̆r hnam trưng chih hla bar pơtruh ăn anih jang vei lăng kon pơlei apŭng Kon Plông tơgŭm jên ăn 69 hŏk tro kon kông găh jên xŏng xa lơ̆m 4 năr đe oh akŏm pơlong vă hơtŏk pơ 'lơ̆ng tơmam drăm xa ăn đe oh”.  

'Măng pơlong tôt ngĭp THPT xơnăm âu dêh char Kon Tum đei 5.028 'nu pơlong, lơ̆m noh đei 1.722 'nu hŏk tro kon kông. Yă Phạm Thị Trung, Kơdră Anih jang Pơtho Pơhrăm dêh char Kon Tum ăn tơbăt, pơrang jĭ COVID-19 pơdui đunh lơ xơnăm hlôi pơrăm tih tên truh tơdrong hŏk pơhrăm kơ đe oh hŏk tro pơma atŭm păng hŏk tro kon kông pơma hơdrô̆. Vă tơgŭm ăn rim 'nu oh hlôh vao kơjăp găh tơdrong bơ̆ ƀai pơlong, Anih jang Pơtho Pơhrăm dêh char Kon Tum pơm kiơ̆ tơdrong kăp gĭt hloh lơ̆m hŏk pơhrăm:  “Truh ăh jê̆ khei năr pơlong Anih jang adoi akŏm Khul pơm jang năm truh rim hnam trưng tơlĕch tơchơ̆t tơdrong jang păng akŏm jơ pơtho pơhrăm kiơ̆ trong kơdih kăp gĭt. Pơhrăm kiơ̆ đơ̆ng noh vă đe mon băt hơdăh tơdrong pran, tơdrong kue kơ po. Đơ̆ng rŏng pơlong hơlen lăng âu ki noh nhôn hơlen hơdăh pă 'măng dơ̆ng. Đe oh hŏk tro mă kăl tơgŭm kăp gĭt noh dôm hnam trưng pơjing dôm tơdrong kăl, lơ trong jang tơgŭm ăn hŏk tro lui ngeh xơđơ̆ng jơhngơ̆m hăm tơdrong hlôh vao adoi nhen tơdrong kloh klĕch kơ 'măng pơlong âu”.

'Măng pơlong xơnăm âu, jâ̆p dêh char Đăk Lăk đei hloh 21.000 'nu hŏk tro chih măt pơlong, lơ̆m noh hŏk tro kon kông đei 28%. Găh anih pơlong, đei 33 anih pơlong tơm hăm 900 lăm pơlong. Truh dang ei, dôm anih jang hlôi vei xơđơ̆ng tôm tơmam drăm kăl tơ̆ dôm anih pơlong, anih in akŏm đê pơlong păng anih châ̆m pơlong kiơ̆ nhen tơchơ̆t.

Anih Pơtho Pơhrăm adoi axong jê̆ 3.000 kăn ƀô̆ lăng pơlong, hơlen ăn 'măng pơlong, tam mă jô̆ khul jang hơlen. Tơdrong jang pơhrăm ăn kăn ƀô̆ lăng pơlong, hơmet anih, tơmam kăl vă tang găn păng hơmet pơrang jĭ ăn đe hŏk tro pơlong hlôi đei vei xơđơ̆ng. Jơnŭm pơgơ̆r 'măng pơlong ăn tơbăt, tŏk bŏk oei jang tơnăp tơdrong tơroi hơlêm găh đon bơnôh vă hŏk tro xơđơ̆ng jơhngơ̆m vang akŏm pơlong.

Atŭm hăm noh xơkơ̆t hơdăh hlôi hơmet tơnăp vei xơđơ̆ng tơpôl lơ̆m dôm năr pơlong. Đăi tă Nguyễn Hữu Lương, Kơdră anih vei xơđơ̆ng chĭnh trĭ lơ̆m anih jang, kŏng an dêh char Đăk Lăk ăn tơbăt:  “Tôm tơdrong jang jang đei tơrĕk truh dôm tơdrong tơxŭl tơxăl tơpôl tơ̆ Cư Kuin mă đei tơrĕk truh tơdrong vei xơđơ̆ng tơpôl, nhôn ƀôh hơdăh, ưh đei kiơ pơngơ̆t kơ đon vă pơgơ̆r pơlong ăn đe oh hŏk tro lơ̆m tơring teh kơ dêh char Đăk Lăk dang ei. Rim khul kŏng an dêh char Đăk Lăk jang atŭm kơjăp hăm anih jang pơtho pơhrăm drơ̆ng minh lơ̆m tơdrong jang đơ̆ng dêh char truh tơ̆ apŭng gô vei xơđơ̆ng tơpôl ăn 'măng pơlong âu".