Pơm lêh hlôi tơbăt hơdăh đei 5 nơ̆r tơbăt ăn: jang kiơ̆, hơnih truh; mơ̆t hơdoi; tơdrong lang să păng trŏ lăp apŭng plĕnh teh hăm hơmŏ pơm hơtŏk hơnih dơ̆ng kơ chehphe Buôn Ma Thuột; tơƀôh tơbăt tơdrong joăt joe huch chehphe Cà phê Buôn Ma Thuột truh hăm bôl boăl apŭng plĕnh teh. Lơ̆m tơdrong pơgơ̆r pơm lêh hlôi đei pơgơ̆r hop akŏm mơdro sa apŭng plĕnh teh sơnăm 2023 hăm vang năm đơ̆ng 464 ‘nu bơngai tang măt, ‘nŏh đei 86 ‘nu bơngai tang măt ăn rim hơnih jang apŭng plĕnh teh ‘nŏh kơdră ctang măt ăn rim teh đak tơ̆ Việt Nam.

Pơtôch hop akŏm hlôi đei 10 hla bơar kĭ pơkăp dih băl, ƀlŏk hơdơ̆r jang hơdoi hlôi đei kĭ pơkăp ƀar păh rim hơnih tĕch mơdro tơmam drăm tơ̆ teh đak đe đơ̆ng rim teh đak Trung Quốc, Hàn Quốc hăm hơnih mơdro sa Việt Nam.

Tơrĕk truh tơdrong jang hadoi tĕch pơdro, lơ̆m sơnăm 2023, dôm dêh char lơ̆m tơring Tây Nguyên hlôi đei lơ tơdrong kơ-‘nôh păng đei jơnei tơnăp.

Jơnŭm pơgơ̆r dêh char Lâm Đồng hlôi vang jang, pơgơ̆r tơdrong jang hadoi tĕch pơdro hăm lơ dêh char, pơlei tơm lơ̆m teh đak; asong jang hadoi minh ƀar tơdrong jang hăm teh đak Nhâ̆t, Hàn Quốc, Ấn Độ. Đei jơnei hơdah, ah jê̆ đĭ sơnăm 2023, gre păr kơ Anih jang gah gre păr JeJu Air đơ̆ng cham gre păr Incheon (Seoul), Hàn Quốc hlôi păr tơpăt truh cham gre păr Liên Khương (dêh char Lâm Đồng), pơm gru kơnăl ăn tơdrong pơm jang ‘lơ̆ng hơ-iă, hơtŏk hloh dơ̆ng tơdrong tơguăt kơjăp đơ̆ng jơnŭm pơgơ̆r dêh char Lâm Đồng păng anih tơm Seoul pơma hơdrô̆ păng dôm dêh char, pơlei tơm kơ teh đak Hàn Quốc pơma atŭm, pơm kơđeh tơdrong hơtaih kơ 2 tơring, pơm trong hiôk ăn kon pơlei păng tơmoi truh tơmang, hŏk hơlen păng dêh char Lâm Đồng adoi hơpơi ‘meh pơm trong ‘nao lơ̆m tơdrong hơvơn asong jang, hơtŏk mŭk drăm – tơpôl.