Hơtuch giĕng âu ki, Anih vei lăng kon pơlei xăh Ea Tul, apŭng Cư M’gar (Dak Lak) pơgơ̆r “Năr đĭ đăng kon pơlei vang vei sơđơ̆ng tĕh đak sơnăm 2023”. Vang truh akŏm đei Phó Thủ tướng Trần Lưu Quang, bơngai tang măt đơ̆ng Anih tơm vei lăng Công an, Anih chĕp kơ̆l Đảng dêh char, Anih vei lăng kon pơlei dêh char Dak Lak kŭm hăm dôm anih jang kơpal tơ̆ tơring.

Lơ̆m dôm sơnăm âu ki, tơdrong jang đĭ đăng kon pơlei vang vei sơđơ̆ng tĕh đak tơ̆ xăh Ea Tul đei tơlĕch truh tơ̆ jơ̆p pơlei păng jang đei lơ tơdrong tôch hơiă. Dôm tơdrong ƀơm truh hơdrĕch kon kông, tơdrong lui khop, tơdrong sơđơ̆ng tơ̆ tơring đei vei kơjăp; tơdrong yoch, pơm glăi luơ̆t đei găn roi jur ƀiơ̆, hơnơ̆ng vei lăng kơjăp ‘lơ̆ng tơring ưh kơ đei ma túy, ưh đei gre tŭl prĕh băl, khul kơdră pơgơ̆r mât mĭnh jơhngâm đon, yoa kon pơlei mă bơ̆ jang pơvih pơvăn, kon pơlei mĭnh jơhngâm lui kiơ̆ Đảng, khul kơdră pơgơ̆r. Ƀok Y Uốt Ayun – Bí thư Đảng xăh Ea Tul, apŭng Cư M’gar tơroi, dang ei 10 pơlei păng 1 thôn đei chô̆ camera hơlen năng tơdrong sơđơ̆ng, păng pơjing grŭp vei lăng.

Ƀok Y Uốt tơroi truh dôm tơdrong kăl đơ̆ng tơdrong jang vei sơđơ̆ng tĕh đak tơ̆ xăh khei ‘năr âu ki: “Lơ̆m khei ‘năr âu ki, công an chính quy jur tơ̆ xăh vang tơgŭm pơjing lơ khul vei lăng, rim kơmăng chă dăr joang, vei kơjăp tơdrong sơđơ̆ng tơ̆ tơring. Gơnơm thoi nŏh mă lơ̆m xăh ưh đei tơdrong tơtông klĕ kiơ. ‘Ngoăih kơ ‘nŏh, khul jang kơpal oei adrin krao hơvơn jơhnơr mơ lôh, đe kôn mon kon sâu, hŏk tro athei đei đon arih xa ‘lơ̆ng, tơpăt, adrin vei lăng dôm bơngai pơm yoch tơ̆ tơring.”

Vang truh akŏm, Phó thủ tướng Trần Lưu Quang chih răk, pôk pơ ư păng tơchĕng ‘lơ̆ng dôm tơdrong mă Đảng ƀô̆, khul kơdră pơgơ̆r păng kon pơlei xăh Ea Tul jang đei lơ̆m khei ‘năr âu ki. Phó Thủ tướng hơpơi ‘mĕh Đảng ƀô̆, Khul kơdră pơgơ̆r kon pơlei xăh Ea Tul hơnơ̆ng tưk tơiung tơdrong mât mĭnh jơhngâm, kơchăng lơ̆m tơdrong jang đĭ đăng kon pơlei vang vei sơđơ̆ng tơ̆ tơring, gơ̆h hơgei lơ̆m tơdrong tơjră plơ̆ nơ̆r pơma kư̆ kă, hơlĕnh pơdăr, vă tơjră phă ngơ̆r Đảng, tĕh đak păng pơm tơhiong tơdrong tơguăt đĭ đăng hơdrĕch hơdrung tơ̆ xăh pơma adrô̆, dêh char Dak Lak pơma atŭm, vă tơgop pơjing tơpôl sơđơ̆ng ‘lơ̆ng, pơm ‘lơ̆ng ăn tơdrong arih xa hiôk sơđơ̆ng kơ kon pơlei.

Phó Thủ tướng Trần Lưu Quang athei Đảng ƀô̆, Khul kơdră pơgơ̆r păng kon pơlei Ea Tul tơrĕk truh 1,2 tơdrong ‘nâu: “Hơnơ̆ng bơ̆ jang ‘lơ̆ng, đei yoa dôm nơ̆r pơtho đơ̆ng Trung ương mưh bơ̆ jang Đĭ đăng kon pơlei vang vei sơđơ̆ng tĕh đak. Hơtŏk hơnăp jang hơdrol đơ̆ng khul linh công an chính quy, mặt trật tổ quốc, dôm khul grŭp tơpôl hơnơ̆ng hơlen năng, hơmet ming dôm tơdrong tam mă pran ‘lơ̆ng tơdăh đei vă gơ̆h bơ̆ jang ‘lơ̆ng tơdrong ‘nâu. Pơm ăn tơdrong jang ‘nâu roi đunh jang roi ‘lơ̆ng, roi đei yoa vă đĭ đăng kon pơlei vang jang kiơ̆.”

Brei drou, yă Trương Thị Ngọc Ánh, Phŏ Kơdră Anih Trung ương MTTQ Việt Nam kŭm truh hăm Năr đĭ đăng kon pơlei vang vei sơđơ̆ng tĕh đak tơ̆ xăh Ngọk Wang, apŭng Đăk Hà, dêh char Kon Tum. Khei ‘năr âu ki, Khul pơgơ̆r tang găn tơdrong yoch, pơm glăi lơ̆m tơpôl păng pơjing tơdrong jang đĭ đăng kon pơlei vang vei lăng tơdrong sơđơ̆ng tĕh đak kơ apŭng Đăk Hà vang roi tơƀôh ăn Anih chĕp kơ̆l Đảng apŭng, Anih vei lăng kon pơlei apŭng bơ̆ jang đei yoa ‘lơ̆ng dôm nơ̆r pơtho đơ̆ng Trung ương păng đơ̆ng dêh char Kon Tum lơ̆m tơdrong jang ‘nâu. Apŭng Đăk Hà pơgơ̆r 188 ‘măng chă roi tơbăt găh tơdrong đĭ đăng kon pơlei vang vei sơđơ̆ng tĕh đak ăn hlŏh 37.400 ‘nu bơngai. Kon pơlei roi tơbăt ăn khul linh công an 70 tơdrong kơtơ̆ng ang gĭt kăl; lơ bơngai năm nôp kơdih phao kip păng tơmam đôh.

Pơma lơ̆m Năr đĭ đăng kon pơlei vang vei sơđơ̆ng tĕh đak Trương Thị Ngọc Ánh, Phŏ Kơdră Anih Trung ương MTTQ Việt Nam tơchĕng ‘lơ̆ng dôm tơdrong jang đei đơ̆ng apŭng Đăk Hà, dêh char Kon Tum lơ̆m tơdrong tơroi tơbăt, krao hơvơn păng tơlĕch tơdrong jang đĭ đăng kon pơlei vang vei sơđơ̆ng tĕh đak; roi tơbăt tơdrong gĭt kăl đơ̆ng tơdrong jang ‘nâu hăm tơdrong sơđơ̆ng tơ̆ tơring. 

Tơ̆ hơnăp lơ khul kơnê̆ chă trong pơhlŭ hơplôm, tơjră phă ngơ̆r, vă pơm che re hơdrĕch hơdrung păng pơgơ̆r lơ tơdrong jang tơjră plơ̆ Khul kơdră pơgơ̆r, yă Trương Thị Ngọc Ánh athei:“Anih pơgơ̆r jang hơnơ̆ng roi tơƀôh vă anih jang đảng đei trong jang, đei nơ̆r pơtho bơ̆ jang mă pran hlŏh dơ̆ng hăm tơdrong ‘nâu. Dôm tơdrong jang đơ̆ng dôm anih jang găh Anih pơgơ̆r athei ‘moi kiơ̆ trong hue lăng truh tơ̆ tơring, oei kơjăp hăm tơring, băt hơdăh rim tơdrong lơ̆m kon pơlei, băt hơdăh tơdrong ‘mĕh vă păng sek tơlang tơtom, tơgăl hăm dôm nơ̆r pơma apinh tôch trŏ đơ̆ng kon pơlei. Athei bơ̆n hơtŏk loi dơ̆ng tơdrong roi tơbăt, pơtho tơƀôh luơ̆t ăn kon pơlei”.