Lơ̆m 2 tơdrong iung tơjră ayăt Phalăng păng Mih, xah sơlam teh Quảng Trực (apŭng Tuy Đức, dêh char Đăk Nông) jing anih pơjing, hơtŏk tơdrong jang kăch mang tơ̆ tơring pơbah Tây Nguyên.

Hăm tơdrong juăt jue jơhnơr hơrih nuih mơng lơ̆m tơdrong jang kăch mạng tơjră ayăt, sơnăm 2019, xah Quảng Trực hlôi đei Thủ tướng teh đak bơ̆n sơkơ̆t jing Tơring Sơđơ̆ng păng sơng Ƀăng pơkăp anih gru grua kơ dêh char. Yă Thị Brao, bơngai đei lui yom tơ̆ pơlei Bu Prăng 1A, xah Quảng Trực ăn tơbăt, kon pơlei M’Nông tơ̆ âu pơ-ư pơ-ang hăm tơdrong juăt jue nuih mơng noh. Kon pơlei hơdrin vei răk tơƀăk mong tơdrong juăt jue noh, lơ̆m tơdrong jang xa hloi: “Kon pơlei nhôn pơ-ư pơ-ang gah tơdrong juăt jue kăch mang nuih mơng kơ tơring teh nuih mơng Quảng Trực âu. Dôm sơnăm kơ âu nhôn hơnơ̆ng hơvơn kon pơlei tơguăt tơguăl, minh bơnôh kiơ̆ Đảng, Teh đak vă pơjing pơlei pơla teh đak pơdrŏng ‘lơ̆ng. Nhôn hơnơ̆ng pơtho kon mon kon sau athei băt vei răk tơƀăk mong tơdrong juăt jue kăch mang nuih mơng, Adoi ah sơnăm ‘nao, nhôn thơ thâu hăm mih ma duch nă tơ̆ pơlei pơla păng kon pơlei jâ̆p teh đak minh sơnăm ‘nao đei jơnei, hơnơ̆ng tơguăt tơguăl, drơ̆ng minh vă pơjing pơlei pơla, teh đak roi năr roi hơtŏk tơ-iung”

Kon pơlei rim hơdrung apŭng Ia Pa, dêh char Gia Lai ling lang hưch hanh hơmanh bơnê ‘noh groi teh ƀĕnh ƀang tơdrong joăt joe kĕch mang. Lơ̆m apŭng đei hloh 11.100 ŭnh hnam, hăm dang 57.000 ‘nu măt bơngai, lơ̆m au đei 70% ‘noh bơngai kon kông, găh lơ bơngai Bahnar păng Jarai.

'Nau jĭ tơring ƀĕng ƀang tơdrong jang joăt joe kĕch mang; lơ jơhnơr hơdruh tơdăm vang iung jang păng đei atŏk tơ iung lơ̆m bơ̆ jang kĕch mang, đơ̆ng rŏng au hlôi jing dôm khul kơdră chĕp pơgơ̆r tơm dơnơm kơ tơring. Jĭ jơhnơr hơdruh tơdăm tih vơ̆ djơ̆ ‘lơ̆ng đơ̆ng groi teh ƀĕng ƀang tơdrong joăt joe, ‘nhŏng R’Ô Hôk, oei tơ̆ tơring Ia Mrơn, apŭng Ia Pa chơt hơ iă pơma:“Tơring Ia Mrơn, apŭng Ia Pa, dêh char Gia Lai ‘noh groi teh tĕnh ƀĕng ƀang tơdrong joăt joe kĕch mang. ‘Nau jĭ hơnih kăn kư̆ kĕch mang păng iung tơblăh pơm rơngei hiôk hian ăn hơdrĕch hơdrung. Lăp đơ̆ng rŏng teh đak rơngei keh kong, đei tơdrong lăng ba kơtang đơ̆ng Đảng, Teh đak, kon pơlei tơ̆ au tơgoăt tơgoăl mĭnh nơ̆r ƀơ̆r đon, hơdrin pơnam jang sa atŏk tơ iung mŭk drăm, xut xa pơngot rơvĕt tơjur dơnuh. Gơnơm đơ̆ng noh, lơ ŭnh hnam roi năr roi đei ƀôh, hơrih sa sơđơ̆ng dơ̆ng kơjăp, tơplih roi kơtang. Kiơ̆  yok rok jơ̆ng, hơdruh tơdăm apŭng, ba hơdrin kiơ̆ yok rok jơ̆ng joăt joe kĕch mang sơ̆ ki. Adoi chă pơrô̆ pơrôp, pơtho khan kon pơlei pơm kiơ̆ trong bơ̆ jang đơ̆ng Đảng, khôi luơ̆t Teh đak; hơdrin jang sa, xut xa dôm tơdrong oei sa joăt joe pă lăp sơ̆ ki; vei lăng năng tông tơdrong ‘lơ̆ng, pơtho khan ăn đe oh hơdrin hŏk pơhrăm truh tơ̆p truh troch, tơgop tơ iung pơjing pơlei pơla kech mang roi năr roi pơdrŏng ‘lơ̆ng liĕm.”