Pơyan he ‘nâu, hơnơ̆ng tơ̆ kơsơ̆, dơnâu glơi đak tơ̆ Anih ngôi pơchơt, hŏk pơhrăm kơ đe druh dăm, hơiŏh iĕ dêh char Gia Lai pơih dơ̆ng lăm pơtho glơi ưh đei iŏk jên ăn đe hơiŏh đei tơdrong arih xa pơmat tat tơ̆ plt Pleiku, dêh char Gia Lai. Lơ̆m rim ‘măng hŏk pơhrăm, ‘ngoăih kơ pơtho glơi, đe oh oei đei roi tơƀôh, pơtâp glơi dŏng bơngai glơ̆k, trong hơmet ăn bơngai glơ̆k.

Oh Võ Mạnh Cường, hŏk tro tơ̆ plt Pleiku pơma: “Hnam tơnuh kơna ưh đei jên vă năm hŏk, năr ‘nâu tơ̆ Hnam hŏk pơhrăm, ngôi pơchơt kơ đe druh dăm, hơiŏh iĕ dêh char Gia Lai pơih lăm pơtho glơi ăn đe ŏh pơmat tat, oh tôch hơiă păng truh chih măt hloi. Thây pơtho ăn ŏh glơi tôm kơloăi.”

‘Nhŏng Nguyễn Tiến Thịnh, Bơngai pơtho lăm glơi ăn druh dăm, hơiŏh iĕ Gia Lai ăn tơbăt, vang truh hăm lăm hŏk, đe hơiŏh iĕ đei pơtâp tôm tơdrong đơ̆ng jơ̆ng glơi, ti hơvat truh tơdrong dui jơhngâm. ‘Ngoăih kơ glơi plơ̆ muh măt tơ̆ kơpal, glơi kit, glơi hơvat, glơi mơ̆ng kơdih vă, ‘nhŏng Nguyễn Tiến Thịnh oei pơtâp ăn đe oh trong tang găn glơ̆k păng hơmet dôm tơdrong krê: “Mưh đei pơih dôm lăm pơtho glơi ưh đei iŏk jên, kơdih kâu inh kŭm truh pơtho ăn đe ŏh glơi, tang găn kơ glơ̆k, pơtho tơƀôh ăn đe oh vă đe oh mưh tơƀâp tơdrong krê tơ̆ đak krong, dơnâu đak, đe ŏh gơ̆h vei lăng kơdih dăh mă chă dŏng bơngai nai, tơgŭm ăn bôl boăl tơhnơr băt trong veh ver kơ glơ̆k.”

Ăn kon năm hŏk glơi tơ̆ lăm pơtho ưh đei iŏk jên, ƀok Trần Văn Thanh, oei tơ̆ phường Hoa Lư, plt Pleiku hơpơi ‘mĕh kon kơdih kâu pơtâp đei hơkâu jăn pran ‘lơ̆ng, kŭm jên gơ̆h glơi: “Inh ƀôh hrei ‘nâu đe hơiŏh glơ̆k lơ dêh kơna ‘mĕh ăn kon năm hŏk vă sư gơ̆h glơi, mưh truh năr pơh inh chông kon truh tơ̆ âu glơi vă mon roi gơ̆h glơi, ning mônh kơnh đei tơdrong kiơ sư gơ̆h dŏng kơdih kâu sư”.

Tơ̆ Kon Tum, giĕng âu ki kŭm pơgơ̆r Lêh pơih blŭng pơyan he, năr Olympic kơ đe hơiŏh păng tơlĕch tơdrong đĭ đăng kon pơlei pơtâp glơi, tang găn kơ glơ̆k, hăm tơdrong vang akŏm đơ̆ng hlŏh 1.300 ‘nu hơiŏh. Tơ̆ jơ pơm lêh Khul pơgơ̆r krao hơvơn rim anih jang, khul grŭp kơ dêh char Kon Tum vei kơjăp, tưk tơiung tơdrong pơtâp pơhrăm tơplŏng kơdâu pơma atŭm păng glơi pơma hơdrô̆.

Tơdrong glơ̆k hơnơ̆ng kơ đei mă loi hăm đe hơiŏh lơ̆m pơyan he. Vă vei lăng sơđơ̆ng ‘lơ̆ng ăn vă jê̆ 168.000 ‘nu hŏk tro lơ̆m dêh char lơ̆m pơyan pơdơ̆h hŏk sơnăm ‘nâu, dêh char Kon Tum krao hơvơn rim khul grŭp, dôm anih jang, hnam trưng, unh hnam păng đĭ đăng khul tơpôl hơtŏk tơdrong vei lăng vă găn tôch ai tơdrong pơ̆k rơka, mă loi jĭ tơdrong hơiŏh glơ̆k.

Ƀok Nguyễn Xuân Truyền, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Kon Tum ăn tơbăt, pơyan he ‘nâu vă iŏk yoa đĭ đăng sơlung đak vă pơgơ̆r pơtho glơi, roi tơƀôh tơdrong krê kơ glơ̆k ăn đe hơiŏh: “Hơpơi ‘mĕh đe boăl đoàn viên, druh dăm, sinh viên, đe ŏh hŏk tro, đe mĕ ƀă hŏk tro păng đĭ đăng kon pơlei ưh lăp adrin pơtâp glơi đĕch mă oei jing 1 ‘nu bơngai chă roi tơbăt, pơlung bôl boăl, kơtum kơtŏng ‘nhŏng oh hŏk pơhrăm, băt hơdăh dôm trong tang găn glơ̆k, vang tơgop dar deh tang găn đĭ tơdrong glơ̆k lơ̆m dêh char vă năm truh đon pơhnŏng “Bơbŭng hnam sơđơ̆ng ‘lơ̆ng”, “Hnam trưng sơđơ̆ng ‘lơ̆ng” păng “Tơpôl sơđơ̆ng ‘lơ̆ng”.

Tơ̆ Lâm Đồng, Lêh pơih blŭng pơyan he, Năr Olympic kơ đe hơiŏh păng tơlĕch tơdrong đĭ đăng kon pơlei pơtâp glơi, tang găn glơ̆k tơ̆ đe hơiŏh sơnăm 2024 kŭm đei pơgơ̆r tơ̆ plt Đà Lạt. Jơ pơm lêh đei pơgơ̆r vă krao hơvơn đe hơiŏh lơ̆m dêh char adrin truh akŏm lơ̆m dôm tơdrong tơplŏng kơdâu, ngôi pơchơt lơ̆m pơyan he, hơtŏk jơhngâm pran, băt trong arih xa ‘lơ̆ng, mă loi ‘nŏh pơtâp glơi, vă tang găn glơ̆k hăm đe hơiŏh.

Việt Nam jĭ 1 lơ̆m dôm teh đak đei hơiŏh glơ̆k lơ lơ̆m rim sơnăm lơ̆m apŭng plenh teh. Tơ̆ Lâm Đồng, lơ̆m sơnăm 2023 âu ki, đei 20 ‘nu bơngai glơ̆k; dôm khei blŭng sơnăm 2024 âu lơ̆m dêh char đei 10 ‘nu bơngai glơ̆k. Anih vei lăng kon pơlei dêh char Lâm Đồng athei dôm anih jang kơpal, tơring tơrang lơ̆m dêh char jang hơdoi mă ‘lơ̆ng lơ̆m tơdrong pơgơ̆r dôm tơdrong jang pơyan he ăn đe hŏk tro kŭm nhen bơ̆ jang ‘lơ̆ng tơdrong krao hơvơn pơgơ̆r ăn đe oh, hŏk tro rim jăl hŏk vang pơtâp glơi, pơgơ̆r thi glơi ăn hŏk tro, druh dăm păh iung, đe hơiŏh iĕ lơ̆m sơnăm kŭm nhen lơ̆m pơyan he vă hơtŏk kơsô̆ hơiŏh, hŏk tro gơ̆h glơi lơ̆m dêh char; găn tôch ai tơdrong lôch glơ̆k tôch kơ mơnat.