Ƀok Y Luyện Niê Kdăm, kơdră tang măt Kuô̆k hô̆i jăl X, sơ̆ jang Ƀĭ thư Đảng dêh char Dak Lăk tơbăt, jĭ bơngai hlôi đei lơ tơdrong tơplih ‘nao kơtang, dôm tơdrong jang đơ̆ng Tổng Bí thư Nguyễn Phú Trọng ling lang đei kon pơlei lui, kon pơlei ‘mêm kơ eng, kon pơlei hôn bơnê. “Ƀok hiong ‘noh jĭ tơdrong hiong răm kơ mĭnh ‘nu kon gơ̆h hơgei kơ Đảng, kơ Teh đak kơ kon pơlei. Ƀok Tổng Bí thư hlôi năm ngôi hăm dêh char Dak Lăk, jĭ bơngai lăng ba kơtang truh kon kông, tơdrong hơrih sa tơpôl, tơdrong oei sa kơ kon pơlei, jĭ tơdrong lăng ba tơnăp tơpă mơ̆n”. 

          Chĕp răk tơƀăk vei nơ̆r pơtho khan đơ̆ng Tổng Bí thư Nguyễn Phú Trọng tơ̆ Pơm lêh hop akŏm Kơdră tang măt lơ̆m teh đak Đoàn hơdruh tơdăm Kŏng san Hồ Chí Minh ‘măng mă XII, mŏ H’Hương Buông Krông, Bí thư Đoàn pơlei tơm Buôn Ma Thuột (dêh char Dak Lăk) iŏk ‘noh pơm hơyak pran ăn kơdih hŏk pơhrăm jang kiơ̆. Mă kăl pơm jŭk yŭk trong hơlou lơ̆m hơdrin hok pơhrăm jang kiơ̆ jơhngơ̆m đon kĕch mang; pơm jŭk yŭk trong hơlou hŏk pơhrăm, lơ̆m choh jang sa, tơchăr; pơm jŭk yŭk trong hơlou lơ̆m bơ̆ jang tơdrong jang chinh trĭ: “ ‘Noh jĭ jơhngơ̆m pran vă ba hơnơ̆ng hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơ iă kơ Ƀok Hô păng kơdih ƀok Tổng Bí thư. Hŏk kiơ̆ ƀok găh tơdrong phăl hơlăng, tơpăt, tơnăp ‘lơ̆ng, jơhngơ̆m đon hơ iă, bơ̆ jang ‘lơ̆ng. Hơnơ̆ng hŏk pơhrăm hloh dơ̆ng dôm tơdrong hơ iă, ưh kơ ‘nhoen kơ tơnap, ưh tơtok kơ gleh păng hơdrin hloh dơ̆ng vă pơjing đei jơhngơ̆m đon nuih chinh trĭ kơjăp, hơnăp jang ‘lơ̆ng, jơhngơ̆m đon phăl hơlăng, tơmang lăng jrŭ hloh dơ̆ng”.

Lơ̆m ‘măng năm ngôi, bơ̆ jang tơ̆ dêh char Kon Tum ƀơ̆t khei 4/2011, Tổng Bí thư, Kơdră chĕp pơgơ̆r Kuô̆k hô̆i Nguyễn Phú Trọng ‘măn jơ ‘năr năm ngôi hăm kon pơlei Bahnar oei lơ̆m pơlei Đak Mut, tơring Đak Mar, apŭng Đak Ha. Tơ̆ ou Tổng Bí thư chă apĭnh jet gia găh tơdrong hơrih sa, mơ̆ng kon pơlei chă pơma tơbăt jơhngơm đon păng pơkă kon pơlei pơm kiơ  ‘lơ̆ng tơgoăt tơgoăl, tơchăr hơgei lơ̆m choh jang sa.

Đơ̆ng rŏng 13 sơnăm Tổng Bí thư, Kơdră chĕp pơgơ̆r Kuô̆k hô̆i Nguyễn Phú Trọng năm ngôi, dang ei hlôi đei tơplih hơdăh lơ̆m choh jang sa păng hơrih sa kơ kon pơlei lơ̆m pơlei Đak Mut, tơring Đak Mar, apŭng Đak Ha, dêh char Kon Tum. Mư̆h Tổng Bí thư năm ngôi, ƀok A Khiếu tŏk bŏk pơm thôn trơng, kơna ƀlŏk hơdơ̆r nơ̆r pơma dơnuh đơ̆ng Tổng Bí thư hăm kon pơlei nhen ‘nao brei mơsơ̆ đĕch. “Tổng Bí thư pơkă kon pơlei ling lang tơgoăt tơgoăl pôm nơ̆r ƀơ̆r đon, tơgŭm djru dih băl, vang atŏk tơ iung mŭk drăm ŭnh hnam. Hrei ou, ŭnh hnam ayơ lơ̆m pơlei jei jang sa gơ̆h, đei chehphe vei lăng năng tông ƀlep kih thuơ̆t, plei ăl. Kơtơ̆ng ƀok Tổng Bí thư hiong, bu bu jei ơ̆h sơ-‘ngon ngăl păng vang ‘măn jơ ‘năr tơbăt jơhngơ̆m ‘mêm tôch bach hmach tôch kơ dêh kơ ƀok, hmach bơnê kơ ƀok Tổng Bí thư hlôi pơtho khan ăn kon pơlei jang sa. Kon pơlei hơpơi ăn kơ Ƀok vih hăm mĕ ƀă yă ƀok ‘lơ̆ng hơ iă”.

Ƀok Lê Xuân Hưng, Ƀĭ thư Đảng tơring Đak Mar tơbăt, 13 sơnăm hơdrin tơplih ‘nao, pơlei Đak Mut hlôi pơjing đei pơlei pơla ‘nao. Hơnơ̆ng lơ̆m lơ sơnăm pơlei đei kơdră kơpal pôk ăn hla bơar hôn bơnê găh dôm tơdrong jang keh đang ‘lơ̆ng liĕm. ‘Măng năm ngôi đơ̆ng Tổng Bí thư, Kơdră chĕp pơgơ̆r Kuô̆k hô̆i Nguyễn Phú Trọng lơ̆m mă noh sơ̆ hlôi jing jơhngơ̆m pran kơtang tơgŭm ăn kang ƀô̆, đảng viên atŭm hăm kon pơlei lơ̆m tơring tơgoăt tơgoăl pôm nơ̆r ƀơ̆r đon hơdrin jang keh đang rim trong tơlĕch ăn.“Truh sơnăm 2014, tơring Đak Mar nhôn iŏk đei jing tơring tơrang ‘nao. Đơ̆ng noh truh dang ei jang kiơ̆ nơ̆r pơtho khan, pơrô̆ jang đơ̆ng Tổng Bí thư, kon pơlei, pơđĭ khul kang ƀô̆, đảng viên iung jang atŏk tơ iung mŭk drăm, jŏh ayŏ hơrih sa tơpôl, mă kăl ‘noh tơplih ‘long pơtăm, kon tơrong. Truh dang ei nhôn hlôi iŏk đei jang sa iŏk đei jô̆ hơtŏ măt bơngai ‘noh 56 triu hlak jên. Sơnăm 2022, tơring Đak Mar nhôn hlôi iŏk đei jing tơring tơrang ‘nao ‘lơ̆ng liĕm păng nhôn jei tŏk bŏk tơ iung pơjing iŏk đei jing tơring tơrang ‘nao pơm jŭk yŭk trong hơlou lơ̆m sơnăm 2025”.

Hăm kon pơlei rim hơdrung tơring A Yŭn, apŭng Chư̆ Sê, dêh char Gia Lai, Tổng Bí thư Nguyễn Phú Trọng ưh khan lăp mĭnh ‘nu kơdră chĕp pơgơ̆r prăt jơhnơr hơrih kơ yuơ teh đak, kơ yuơ kon pơlei, mă lei oei jing minh ‘nu bơngai hlôi pôk ăn kon pơlei đei tơdrong hơrih sa phĭ tơtŏ dơnŏ ‘lơ̆ng. Lơ̆m ‘măng năm bơ̆ jang tơ̆ dêh char Gia Lai khei 4/2017, Tổng Bí thư Nguyễn Phú Trọng hlôi truh năm ngôi hăm tơring A Yŭn, mĭnh tơring tơnap tap hloh kơ apŭng Chư̆ Sê. Mơ̆ng kon pơlei pơma tơbăt jơhngơ̆m đon hơpơi ‘meh vă đei pơnơ̆t đak vă choh jang sa, Tổng Bí thư hlôi pơrô̆ athei tơring akŏm khul jang tĕnh koăng ming man pơnơ̆t đak Pơlei Keo. Ƀar sơnăm đơ̆ng rŏng, pơnơ̆t đak Plei Keo ming man keh đang păng pơro đak rơngơp đơ̆ng đak kroong A-Yŭn truh hăm chŭn na hơnhăk ăn tơdrong phĭ tơtŏ dơnŏ ‘lơ̆ng ăn kon pơlei. Ƀok Đinh A Nhur, 73 sơnăm, oei tơ̆ pơlei Achông, tơring A Yŭn tơbăt:“Mưh Tổng Bí thư Nguyễn Phú Trọng jur ngôi, ba chơt hiôk dêh, tơchĕng lơ̆m to ưh kơ jor đei đak bơih. Dang ei đak kroong A-Yŭn gơh tŏk ro tơ̆ groi, tŏk tơ̆ kông bơih, sơ̆ đei đăi đơ̆ng yơ. Chơt hơ iă ‘nă hal pă băt dang yơ hloi, mĭnh sơnăm đơ̆ng 2 pơyan truh 3 pơyan kơna kon pơlei pă đei pơngot rơvĕt bơih”.

Đei pơnơ̆t đak Pơlei Keo, kon pơlei tơring A Yŭn hlôi rei pơtăm hloh 300ha chŭn na ƀa đak 2 pơyan, sơđơ̆ng hơrih sa. Kră pơlei Đinh Miơch, pơlei Achông, lăng kơjăp tơmam pôk ăn gĭt kăl đơ̆ng Tổng Bí thư ăn kơ kon pơlei A Yŭn.“Kon pơlei hiôk dêh lăp đơ̆ng rŏng Tổng Bí thư Nguyễn Phú Trọng pơrô̆ pơjing ăn kon pơlei đei pơnơ̆t đak ‘noh tơdrong hơrih sa roi năr roi sơđơ̆ng. Nhôn gô ling lang ƀlŏk hơdơ̆r, hôn bơnê kơ Ƀok hlôi plang ăn kon pơlei A Yŭn lơ̆m hrei ou păng ning nai kai ning mônh kơnh”.

Đơ̆ng rim ‘măng iung năm, tơlen băt, chă mơ̆ng nơ̆r tơgop, nơ̆r tơbăt jơhngơ̆m đon hơpơi ‘meh vă đơ̆ng kon pơlei rim hơdrung Tây Nguyên, Tổng bí thư Nguyễn Phú Trọng hlôi pơrô̆ athei kơdră chĕp pơgơ̆r tơring tơlĕch jang kiơ̆ rim trong jang tơgŭm djru ăn tơring kon kông oei tơ̆ Tây Nguyên. Đơ̆ng noh, hlôi tơgŭm ăn kon pơlei rim hơdrung tơ̆ ou roi năr roi phĭ tơtŏ dơnŏ’lơ̆ng, hơnŭk hơnoa. Kon pơlei hôn bơnê kơ Tổng bí thư Nguyễn Phú Trọng ưh kơbăt dang yơ hloi!