1- Sơnăm 2023 jing sơnăm ang hơdah hăm tơdrong jang tơmang pơhiơ̆ dêh char Dak Lak, 1.160.000 ‘nu tơmoi, đei 110,48% pơtêng hăm tơlĕch jang, tŏk 16,06% pơtêng hăm khei năr âu sơnăm 2022. 

Pơm kiơ̆ Tơchơ̆t jang kơ teh đak gah hơtŏk mŭk drăm – tơpôl tơring kon pơlei kon kông păng groi kông jăl sơnăm 2021 – 2030, Anih Joh ayŏ, Tơplŏng kơdâu păng Tơmang pơhiơ̆ tŏk bŏk oei keh đang hla bar kăl tơgŭm asong pơm jang tơmang pơhiơ̆ gơh hơgei tơring kon pơlei kon kông sơnăm 2023 – 2024 tơ̆ pơlei Tơng Jŭ, (xah Ea Kao, pơlei tơm Buôn Ma Thuột) păng pơlei Jun (thĭ trâ̆n Liên Sơn, apŭng Lăk). Yă H’Yam Ƀuôn Krông (rơneh sơnăm 1965), jing bơngai yuk trong hơlâu jang tơmang pơhiơ̆ pơlei pơla tơ̆ pơlei Tơng Jŭ, xah Ea Kao, pơlei tơm Buôn Ma Thuột, dêh char Dak Lak tơroi: “Inh sô̆ hơ-iă ah pơjing pơlei tơmang pơhiơ̆ tơ̆ pơlei Tơng Jŭ. Dêh char Dak lak hlôi tơchơ̆t tơlĕch jang âu tơ̆ pơlei Tơng Jŭ păng pơlei Jun tơ̆ Lăk. Nhôn hơpơi ‘meh dôm jăl pơgơ̆r tơring pơm trong hiôk ăn tơmang pơhiơ̆ pơlei Tơng Jŭ gơh hơtŏk tơ-iung. Sơnăm ‘nao tho thâu hăm đe kơdră dêh char, pơlei tơm păng dôm jăl pơgơ̆r tơring hơnơ̆ng grăng pran, jơnap ‘lơ̆ng hơkâu ling lang”.

2 - Apung Krông Nô, dêh char Đắk Nông ‘noh jĭ mĭnh lơ̆m dôm groi teh đei lơ hơnih ‘lơ̆ng rŏ đe ư hơnhang ang hơnhăk. Lơ̆m au đei chơkơ Dray Săp, dăh mă hơgơ̆p kông ŭnh lơ̆m Hơnih cham char groi teh plei teh. Ƀok Y Suơ Hlong, bon Đru, thĭ trân Đắk Mâm, apŭng Krông Nô, tơbăt, kon pơlei bơnbgai M’nông tôch hưch hanh hơmanh bơnê găh groi teh đei lơ hơnih tơmang lăng ‘lơ̆ng rŏ trŏ lăp atŭm hăm tơdrong oei sa joăt joe ‘lơ̆ng liĕm sơ̆ ki.

Dôm tơdrong au tŏk bŏk iung jang vă atŏk tơ iung mŭk drăm, tơpôl tơgŭm ăn tơdrong hơrih sa kơ kon pơlei roi năr roi atŏk tơ iung: “Ĭnh tôch hơ iă mưh ƀôh hiwnih tơmang pơhiơ̆ ‘lơ̆ng liĕm nhen chơ Dray Săp dăh mă hơgơ̆p kông ŭnh đei iung jang, atŭm hăm tơdrong oei sa joh ayŏ joăt joe kơ bơngai M’nông vă atŏk tơ iung mŭk drăm,tơpôl. Đei lơ kon pơlei M’nông jei vang iung jang tơmang pơhiơ̆ au. Ĭnh hơpơi ‘meh vă iung jang đei jơnei hloh dơ̆ng rim hơnih cham char ‘lơ̆ng liĕm păng tơdrong oei sa joatw joe ‘lơ̆ng rŏ vă tơgŭm ăn atŏk tơ iung mŭk drăm, tơpôl.”         

3 – Hăm cham char ‘lơ̆ng kăp gĭt, lơ̆m dôm năr Têt Nguyên đan Giáp Thìn 2024 Tơring tơmang pơhiơ̆ Măng Đen cham char pơkăp kơ teh đak, lơ̆m apŭng Kon Plông, deh char Kon Tum sơng lơ tơmoi truh tơmang, hŏk hơlen. ‘Nhŏng A Blép, hnam tơ̆ pơlei Đăk Y Pai, xah Măng Bút ăn tơbăt, ‘nhŏng pơ-ư pơ-ang kơ pơlei pơla po.

Kơtă lơ̆m dôm năr Têt, vă đei lơ tơmam drăm ăn tơmoi chă tơmang lăng, jơnŭm pơgơ̆r tơring, anih jang Joh ayŏ apŭng Kon Plông, dêh char Kon Tum hlôi hơvơn lơ khul ngê̆ nhơ̆n vang akŏm pơdreh chĭng chêng, hơsuang; tơbang gah tơmam xa juăt jue, et xa kiơ̆ khôi joh ayŏ kơ bơngai Xơ Đăng… Vang năm akŏm dôm tơdrong âu, kon pơlei tơ̆ tơring đei yua hloh. ‘Nhŏng A Blép chơt hơ-iă ăn tơbăt: “Tơ̆ tơring tơmang pơhiơ̆ Măng Đen âu inh đei kon inh vang akŏm lơ̆m Khul chĭng chêng – hơsuang. Khei năr âu ki, đe sư hlôi pơhrăm vă sơng sơnăm ‘nao. Tơdrong akŏm lơ̆m Khul pơdreh chĭng chêng – hơsuang minh pah noh vă vei răk tơƀăk mong joh ayŏ juăt jue, minh pah noh chă jên yua ăn unh hnam, atŭm hăm noh pơjing cham pơhiơ̆ ăn tơmoi păng kon pơlei tơ̆ tơring. Sơnăm ‘nao, inh thơ thâu rim unh hnam grăng pran, tơnŏ sô̆ sôn, jang xa đei yua lơ, mŭk drăm hơtŏk tơ-iung hloh sơnăm so. Inh adoi hơpơi ‘meh kon hơ-ioh gơh đei akŏm lơ̆m Khul pơdreh chĭng chêng – hơsuang roi năr roi hơgei vă tơdrong pơdah roi năr roi ‘lơ̆ng hloh”.

4 - Đơ̆ng rŏng dôm năr pơgơ̆h têt chơt hơ iă puih mak, đơ̆ng năgg 3 têt, Kŏng ty tơmang pơhiơ̆ Siam Tour (tơ̆ pơlei tơm Buôn Ma Thuột, Đắk Lắk) iung jang sơng tơmoi tơmang pơhiơ̆ puih mạ păng pơgơ̆r joh hơri, ba tơmoi tơmang lăng joh ayŏ sơnăm ‘nao. ‘Nhŏng Y Thiên Adrơng, Kơdră chĕp pơgơ̆r Kŏng ty tơbăt: Vă hơmet ăn tơdrong jang puih mak, khul bơ̆ jang păng dôm bơngai jang tơgŭm Kŏng ty hlôi pơhrăm đơ̆ng hơdrol Têt. Hăm tơdrong pơgơ̆r ‘lơ̆ng rŏ pơđĭ joh hơri, tôm reh, tơroi hơ-‘mon ... ‘ngoăih pơgơ̆r ăn tơmoi chă lăng, kŏng ty oei iung jang tơgŭm ăn tơmoi ŭnh hnam năm tơmang pơhiơ̆ lơ̆m khei năr têt. ‘Nhŏng Y Thiên hơmŏ, rim tơdrong pơgơ̆r au gô pơ̆ih blŭng ăn tơdrong chơt hơ iă lơ̆m sơnăm ‘nao Giáp Thìn: “ ‘Meh vă rim ‘nhŏng oh pôm nơ̆r ƀơ̆r đon, iung jang lơ tơdrong jang găh atŏk tơ iung tour tơmang pơhiơ̆, găh vei răk tơƀăk mong tơdrong joăt joe sơ̆ ki vă roi năr roi atŏk kơtang hlŏh dơ̆ng, đei lơ bơngai băt truh, vă ning nai kai ning mônh mưh tơmoi năm tơ̆ Buôn Ma Thuột jei băt trih tơdrong oei sa, jŏh ayŏ kơdŏ soang, tơdrong hơ-‘mon Tây Nguyên.