Chih iŏk tơ̆ yăn âu tơ̆ anih tĕch mơdro, truh dang ei, tơmam vă tĕch ƀât Tết nguyên đán Giáp Thìn 2024 tơ̆ dêh char Gia Lai tôch lơ, tôm kơloăi vă kon pơlei chă răt yoa. Kŭm hăm dôm kơ chơ đơ̆ng sơ̆, rim anih siêu thị, anih tĕch mơdro tih hơnơ̆ng jĭ dôm anih sơng đei bơngai răt tơmam truh lơ hlŏh yoa tơmam đei tĕch tơ̆ âu đei chih hơdăh anih pơm ngăl.

Yă Phạm Thị Diện, xăh Cư An, thĭ xăh An Khê, dêh char Gia Lai, năm răt tơmam tơ̆ siêu thị Co.opmart plt Pleiku, pơma: “Inh ƀôh dôm tơmam tơ̆ âu tôch ‘lơ̆ng păng lơ kơloăi, oei tơ̆ ‘ngoăih kơ chơ ‘nŏh hli tơmam ya, ưh sơđơ̆ng ăn jơhngâm pran, tơmam tơ̆ âu tôch ‘lơ̆ng, pơdă tĕch tôch hơiă”

Ƀok Bùi Quốc Bình, Kơdră Siêu thị Co.opmart plt Pleiku, dêh char Gia Lai tơroi, vă pơma lăp hăm tơdrong ‘mĕh tơ̆ anih tĕch mơdro, anih nhôn hlôi răt iŏk lơ tơmam vă tĕch ƀât tết: “Tơdrong răt iŏk đơ̆ng kon pơlei ƀât tết Giáp Thìn 2024 tŏk dang 3 ‘măng pơting hăm năr hmă, ưh gơ̆h lê̆ đei tơdrong kơmăh tơmam, kơjă tŏk, vang vei lăng sơđơ̆ng tơdrong tĕch mơdro ‘nŏh siêu thị hơmet dang 110 ti hlak jên vă răt mong tơmam tĕch ƀât tết ‘nâu. Dang ei kơsô̆ tơmam âu nhôn đĭ hơmet tôm adrol kơ Tết dang 2 khei păng dang ei, rim anih ‘măn răk dang 60-70% tơmam Tết ming kơtă lơ̆m siêu thị. Tơmam tĕch athei băt hơdăh  anih pơm, athei rơgŏh ‘lơ̆ng ngăl.”  

Kiơ̆ tơdrong tơchĕng đơ̆ng Anih vei lăng jang kơmăy, tĕch mơdro dêh char Gia Lai, akŏm đĭ đăng tơmam đei chơ chuĕn, tĕch mơdro lơ̆m khei Tết Nguyên đán iŏk đei 17.500 ti hlak jên. Vă pơm lăp, pơ truh măh mai tơmam yoa kăl ƀât Tết, Anih vei lăng jang kơmăy, tĕch mơdro dêh char athei dôm anih tĕch mơdro tơlĕch trong ‘măn răk tơmam yoa kăl vă vei sơđơ̆ng tơdrong tĕch mơdsro, bơ̆ jang đei yoa tơdrong vei sơđơ̆ng kơjă tơmam, tĕch trŏ kơjă đei pơklep, ưh ăn đei tơdrong ưh kơmăh tơmam, kơjă tơmam tŏk. Hơdai hăm ‘nŏh akhan, dôm tơmam yoa kăl ‘lơ̆ng ngăl, đei tôm hla ar chih tơbăt, anih pơm.

Ƀok Rcom Jen, Phŏ Kơdră Anih vei lăng jang kơmăy, tĕch mơdro dêh char Gia Lai, pơma: “Anih vei lăng jang kơmăy, tĕch mơdro dêh char tơlĕch trong ‘măn răk tơmam 2024, vei lăng ‘lơ̆ng tơmam, dôm tơdrong hơgăt găh tơmam xa rơgŏh, tĕch mơdro điên tư. Kiơ̆ đơ̆ng hơlen năng rim tơdrong tĕch mơdro tôch sơđơ̆ng. Bơ̆ jang dôm tơdrong jang mong akŏm tơmam, chih tơlĕch lơ trong chơ tĕch tơmam tơ̆ tơring tơrang, jang hơdoi hăm anih vei lăng tĕch mơdro chă hơlen năng rim tơmam, tơdăh ƀôh tơmam ya, ưh kơchih hơdăh anih pơm ‘nŏh vă sek tơlang tơpăt kiơ̆ khôi luơ̆t”.

Vă vei lăng ‘lơ̆ng tơdrong tĕch mơdro, pơvih ăn kon pơlei răt yoa, Anih vei lăng kon pơlei dêh char Đắk Lắk tơlĕch trong vei sơđơ̆ng kơjă tĕch hăm dôm tơmam yoa kăl ƀât hơtuch sơnăm 2023 păng Tết Nguyên đán Giáp Thìn 2024. Khei ‘năr vei sơđơ̆ng kơjă tĕch iŏk đơ̆ng blŭng khei 12/2023 truh đĭ khei 2/2024. Grŭp tơmam vă vei sơđơ̆ng kơjă đei: Phe ƀa tơmam xa (‘nhĕm nhŭng, ‘nhĕm iĕr, bip, kơtăp iĕr bip, đak kho, sĭk, ƀôt ngok păng dôm kơloăi tơmam xa, ‘nhot, ƀum, plei ‘long), đak xăng, đak dâu. ‘Nâu jĭ dôm tơmam yoa kăl, đei lơ bơngai răt; ƀônh ưh kơmăh, kơjă tĕch ƀonh tŏk.

Dêh char Đắk Lắk krao hơvơn đei 11 anih tĕch mơdro, siêu thị vang jang kiơ̆ trong vei sơđơ̆ng kơjă tĕch ƀât hơtuch sơnăm 2023 păng Tết Nguyên đán Giáp Thìn 2024. Tơchĕng adrol kơsô̆ jên vă răt ‘măn răk tơmam, tĕch ƀât Tết hlŏh 473 ti, pơm lăp vă jê̆ 27% tơdrong ‘mĕh vă đơ̆ng kon pơlei tơdăh đei tơdrong ưh kơmăh tơmam. ‘Ngoăih kơ ‘nŏh, tơmam tơ̆ dôm anih tĕch mơdro lơ̆m kơchơ kŭm ‘măn răk lơ, pơm lăp hăm tơdrong ‘mĕh vă răt tơmam đơ̆ng kon pơlei ƀât Tết ‘năi.

Ƀok Lưu Văn Khôi, Kơdră Anih vei lăng jang kơmăy, tĕch mơdro dêh char Đắk Lắk tơroi, kŭm hăm vei sơđơ̆ng, măh mai tơmam tĕch ƀât tết, dêh char oei hơtŏk dôm trong jang tang găn tơmam ưh kơ ‘lơ̆ng păng hơlĕnh pơdăr mưh tĕch mơdro: “Anih vei lăng tĕch mơdro kŭm hăm Anih vei lăng kon pơlei dôm apŭng, thĭ xăh, plt gô đei trong jang tôch hơdăh vă pơtruh măh mai tơmam kŭm nhen vei sơđơ̆ng kơjă tơmam. Hơdai hăm ‘nŏh jĭ hơtŏk dôm trong jang dăr hơlen vă tang găn tơmam ya, tơmam ưh kơ ‘lơ̆ng, hơlenh pơdăr mưh tĕch mơdro.”

Vă tang găn tơmam mong ôn tơmam, hơtŏk kơjă glăi luơ̆t; vei lăng sơđơ̆ng anih tĕch mơdro, Anih vei lăng tĕch mơdro dêh char Đắk Lắk ‘nao tơlĕch khei bơ̆ jang tơm tang găn tĕch mơdro ôn, hơlĕnh pơdăr păng tĕch tơmam ya adrol, lơ̆m păng đơ̆ng rŏng kơ Tết Nguyên đán Giáp Thìn sơnăm 2024.  Kŭm hăm ‘nŏh, dôm Khul jang oei pơgơ̆r dăr lăng kơjăp tơdrong tĕch mơdro đak xăng, đak dâu, kơchơ̆t sŏh, ưh gơ̆h lê̆ đei tơdrong mong ôn tơmam, hơtŏk kơjă glăi luơ̆t vă vei sơđơ̆ng tơdrong tĕch mơdro ƀât Têt ăn kon pơlei.