Kiơ̆ đơ̆ng Hơnih thuê̆ dêh char Đak Nông, 9 khei au ki, akŏp thuê̆ iŏk đei 1.962 ti hlak jên, hơtŏ 66,4% mă Trung ương pơjao păng hơtŏ 75,8% pơtêng hăm sơnăm sơ̆.

Kon jên thuê̆ ăn hơnih bơ̆ jang sơnăm au tơjur kơtang kơ yuơ đei ƀơm đơ̆ng lơ tơdrong. Lơ̆m au, dêh char tŏk bŏk tơlĕch jang kiơ̆ lơ trong jang ưh kơ ăn thuê̆, tơjur thuê̆, pơđunh thuê̆ vă rim hơnih mơdro sa tơgŭm ăn pơm tơlĕch tĕch mơdro. Hơdrô̆ tơdrong tơjur 50% thuê̆ vei lăng cham char hlôi tơjur 100 ti thuê̆ iŏk đei kơ 9 khei. Atŭm hăm ‘noh, trong jang tơjur 30% thuê̆ teh kơ sơnăm 2022, tơdrong tơjur thuê̆ rim tơmam drăm hlôi pơm tơjur ăn iŏk thuê̆ truh 120 ti hlak jên. Mă kăl, tơdrong tĕch răt teh hnam lơ̆m dêh char tơjur pơm kơnê̆ kơtang truh tơdrong thuê̆ iŏk đei đơ̆ng groi teh kơ dêh char. Mă hơdăh, lơ̆m 9 khei, kon jên thuê̆ đơ̆ng iŏk yua teh jang sa lăp iŏk đei 246 ti hlak jên, hơtŏ 28,4% mă dêh char tơlĕch ăn, hơtŏ 41,5% pơtêng hăm sơnăm sơ̆. Hơnih jang thuê̆ kơ dêh char Đak Nông tŏk bŏk hơdrin tơlĕch rim trong jang vă tơmơ̆t ăn dôm tơdrong chă thuê̆ ăn hơnih mong jên bơ̆ jang sơnăm 2023 kiơ̆ trong tơlĕch ăn.