3 sơnăm hơdrol, ƀôh tơdrong tĕch răt teh rơ ông rơ ang, klo akăn Nguyễn Xuân Nguyên, phương Tân Lợi, pơlei tơm Buôn Ma Thuột hlôi đei iŏk yua sa hơpăh lơ đơ̆ng tĕch răt teh hnam. Lơ̆m khei năr teh măt, đei khei klo akăn tĕch răt teh iŏk đei truh mĭnh ƀar ti hlak jên gơnơm răt tĕch teh tơring jih pơlei tơm. Hơmŏ iŏk đei lơ hloh dơ̆ng, ‘nhŏng hlôi tŏk iŏk jên đơ̆ng kơtum kơtŏng ‘nhŏng oh, pơdơ̆ng hnam, gre ôtô ... tŏk iŏk dơ̆ng đơ̆ng hơnih mong jên dôm ti hlak jên vă răt teh đe. Mă lei đơ̆ng vă đĭ sơnăm 2022, tơdrong tĕch mơdro tơplih tôch kơtang, găh lơ teh mă ‘nhŏng Nguyên răt, đĭ tơhlăk tơhlĭn, tĕch ưh kơ hlot. Hloh minh sơnăm au ki klo akăn măh mơ ‘ngoanh kla ăn kon jên cheh. “Dang ei klo akăn nhi jang sa đei dôm yơ ‘noh akŏm năm ba jên cheh ăn hơnih mong jên ngăl, hloh 45 triu hlak jên lơ̆m 1 khei, mơmat dêh. Nhi hơdrin tôch ai, tơjur kơjă tôch kơ brĕ ră mă lei tĕch oei ưh kơ hlot ‘mơ̆i. Kơ jă tĕch mơdro hlôi tơjur 30 – 40% pơtêng hăm khei năr răt sơ̆ mă lei oei ưh kơ đei bơngai bu răt ‘mơ̆i. Tơdăh lơ̆m khei năr teh măt, dôm hơnih teh au chih tơbăt lơ̆m mạng ‘noh đei bơngai apĭnh răt hloi. Ư̆h kơ băt truh dang yơ tơdrong tĕch răt teh vih hơlơ̆k sơđơ̆ng nhen so dơ̆ng, vă tĕch pơ đĭ, tơdăh hơnơ̆ng chă pơdreo jên cheh lơ lau pă kĕ bơih.”

‘Nhŏng Huỳnh Thanh Tâm, bơngai đunh sơnăm pơm kơdranh tĕch răt teh tơ̆ pơlei tơm Buôn Ma Thuột tơbăt, khei năr teh măt đơ̆ng lơ̆m vă đĭ sơnăm 2021 truh tŏk bŏk sơnăm 2022, lơ̆m mĭnh khei ‘nhŏng tơƀôh tơbăt tĕch răt teh đei đơ̆ng 10 – 12 hơnih teh, jang sa iŏk đei truh kơ hrĕng triu hlak jên. Mă lei, đơ̆ng vă đĭ sơnăm 2022 truh dang ei, mĭnh khei lăp pơm kơdranh ăn kơ đe hlot ƀar pêng hơnih teh đech, tơjur 80 truh 90%, kon jên đe hơpăh đơ̆ng pơm kơdranh tĕch răt teh jei tơjur. ‘Nhŏng Tâm tơbăt:“Hrei au măt bơngai chă răt tĕh tĕch mơdro tơjur tôch kơtang, lơ̆m mĭnh khei ĭnh lăp tĕch hlot 2 – 3 hơnih teh dăh mă lơ khei lăp tĕch hlot 1 hơnih đĕch. Găh ba oei tĕch mơdro đei ‘noh pŭn ai đĕch kơ yuơ ba đei lơ boăl tĕch răt, đei bơngai kơ ‘nhŏ chă tĕch hlot mĭnh hơnih hloi văi. Teh oei sơ̆ lơ̆m khei năr teh măt dang 1 ti hlak jên lơ̆m 1 hơnih, dang ei tơjur lê̆ pă 600 triu hlak jên, đei ‘măng lơ tĕh oei, oei re hloh dơ̆ng. Kiơ̆ hrei au ‘nŏh teh tơjur kơtang hloh, păng kiơ̆ kơ ĭnh hơlen rŏ năng dang 2 sơnăm dơ̆ng ‘mơ̆i tơdrong tĕch răt teh mă sơđơ̆ng hơlơ̆k dơ̆ng, dang ei ba chă tĕch mơdro koă kơ lê̆ đĕch”.

Ư̆h khan lăp hơdrô̆ rim bơngai tơmơ̆t jên jang sa iĕ păng tĕch răt teh tơring tơ ter rơ hiŭng rơhiăng, tơdrong tĕch răt teh hnam tơ̆ rim hơnih jang tơm tơ̆ Buôn Ma Thuột jei ưh kơ ƀrĕt tŏsĕt ƀiơ̆. Kiơ̆ đơ̆ng ƀok Ngô Đình Vạn – Kơdră chĕp pơgơ̆r Kŏng ty Tĕch răt teh hnam Lộc Sơn Hà păng SkyVi, hơnih tĕch mơdro hnam teh ‘lơ̆ng lơ̆m rim Tơdrong vă jang pơlei tơm chehphe, Tơdrong vă jang Eco City păng Hơnih Kơdrơ̆m Ân Phú...  Kŏng ty măh tơlĕch truh 75% măt bơngai jang kơ yuơ tơdrong tĕch răt tĕh nhen lĕ đĭ pơdơ̆h. Đơ̆ng vă jê̆ 100 ‘nu bơngai jang, jang sa iŏk đei hloh 90 ti hlak jên lơ̆m 1 sơnăm, dang ei hơnih au lăp pă tim mă truh 20 ‘nu bơngai jang, jang sa iŏk đei lơ̆m sơnăm 2023 ‘nŏh lăp pă tim mă truh 20 ti hlak jên. Ƀok Vạn hơmŏ tơdrong mă au gô hơmet pơ ‘lơ̆ng lơ̆m sơnăm 2024 truh au kơnh, mưh kon pơlei choh jang sa lơ̆m dêh char hơnơ̆ng jang sa iŏk đei kơjăp păng kon jên cheh đơ̆ng hơnih mong jên hơnơ̆ng tơjur tŏ sĕt.“Đunh kơ au hloh 1 sơnăm kon pơlei choh jang sa chĕp ba jên năm ba ming răk tôch kơ lơ kơ yuơ jên cheh măt đơ̆ng 8 truh 11%, mă lei dang ei tơjur pă 4-5% păng kon pơlei rŏ năng gô iŏk tơvih. Lơ loh, iŏk tơvih vă pơm kiơ, kiơ̆ kơ ĭnh đe sư vă vih hơlơ̆k dơ̆ng chă răt teh kơ yuơ kơjă teh păh ai păng trŏ lăp hăm răt akŏm teh. ‘Ngoăih kơ ‘noh, mŭk drăm Dak Lăk tŏk bŏk atŏk tơ iung ‘lơ̆ng, trong glung rĕnh, logistic tŏk bŏk tơ iung pơjing, pơjing đei cham char atŏk tơ iung păng tơdrong jang tĕch răt tĕh đei iŏk yua kơjăp păng lơ bơngai tơmơ̆t jên jang lăng kơjăp. Tim mă jô̆, kơjă sâu riêng, chehphe tŏk măt păng lơ bơngai pơdrŏng hloh dơ̆ng păng lơ̆m mă noh kơnh đe sư đei jên ‘nŏh đe sư chă răt tĕh dơ̆ng.”

Sơnăm 2023 - 2024, jang sa iŏk đei đơ̆ng ‘long sa plei păng ‘long kăp gĭt tơm kơ Dak Lăk, nhen sâu riêng, chehphe, tiu tŏk măt hlŏh ƀar ‘măng pơtêng hăm sơnăm 2022, hăm tơdrong tŏk rŏ năng hloh 15.000 ti hlak jên. Atŭm hăm noh, jên cheh đơ̆ng hơnih mong jên tŏk bŏk tơjur kơtang, rim bơngai jang tơmơ̆t jên jang tĕch răt teh tơ̆ dêh char gô hơmŏ lơ̆m dôm tơdrong tơplih ‘nao đơ̆ng tơdrong tĕch răt au. Mă lei, tơpă yan au Dak Lăk oei jing dêh char dơnuh đĕch. Hăm tơdrong ‘meh vă păng tơdrong đei kơdih lơ̆m dêh char, rŏ năng tôch tơnap mă pơm hơtŏk sơđơ̆ng hăm hnam teh oei răt akŏm, răt pơkơ̆ng tôch kơ lơ đơ̆ng dôm sơnăm hơdrol.