Tơ-iung pơjing ah sơnăm 2021 kơyuơ đơ̆ng dôm bơngai mơlôh hơbĕch hơbal, Kŏng ti tĕch pơdro Epis, apŭng M’Drak, dêh char Đăk Lăk, tĕch pơdro phơ̆m đei bơ̆ đơ̆ng dôm tơmam choh pơtăm hlôi đei tơ̆ tơring. Băt hơdah tơdrong pran kơ kŏng ngê̆ sô̆, đe boăl mơlôh hlôi tơrĕk hămbơngai răt yua dôm tơmam kiơ̆ dôm anih tĕch điê̆n tưh. Pơmai Lê Thị Hồng Thơm, Phŏ Kơdră kŏng ti ăn tơbăt: Dang ei tơmam pơm tơlĕch đơ̆ng anih jang hlôi đei tĕch tơ̆ tôm anih tĕch răt điê̆n tưh juăt jue đei lơ bơngai răt yua băt truh păng đei lơ bơngai hơlen lăng nhen: Shoppee, tiki, lazada, tiktokshop… Tơdrong mă âu hlôi tơgŭm ăn anih jang mŭk drăm tơjur đei lơ jên huach ăn tơdrong tơbang tơmam drăm: “Jing minh anih jang mŭk drăm iung pơm jang kơdih noh adoi oei lơ tơnap tap gah jên hu, anih tĕch noh tơdrong tĕch tơmam lơ̆m dôm tơdrong tĕch răt điê̆n tưh păng internet hlôi jing tơdrong pran păng tơgŭm ăn kơ nhôn mong ƀiơ̆ jên huach lơ̆m tơdrong thuê anih tĕch dah mă dôm tơdrong mă anih jang mŭk drăm tam mă đei”.

Adoi rơih trong tơguăt păng pơih să tơring tĕch đơ̆ng dôm tơdrong pơyua kơ tĕch răt điê̆n tưh, Kŏng ti tĕch pơdro Kim Long, tơ̆ apŭng Krông Buk, dêh char Đăk Lăk hlôi tenh kuăng đei lơ bơngai răt yua tơ̆ lơ dêh char, pơlei tơm lơ̆m jâ̆p teh đak. Ƀok Đỗ Ngọc Anh, tang măt ăn anih jang mŭk drăm ăn tơbăt: “Tơmam nhôn noh tơmam ‘nao, kơyuơ noh mă kơdih po gơnơm kiơ̆ trong tĕch online ‘noh mă tơm. Hăp đei hloh 50% tơdrong pơyua đơ̆ng tơdrong tĕch tơmam drăm kiơ̆ trong tĕch răt âu, đơ̆ng dôm  website tĕch tơmam kơ po. Kơyuơ noh tơdrong yua website adoi nhen tĕch kiơ̆ online lơ̆m tơdrong tĕch tơmam hăp jing minh pah kăp gĭt lơ̆m tơdrong jang tĕch pơdro kơ po” .

Kiơ̆ kơ ƀok Hoàng Minh Ngọc Hải, Kơdră Anih jang tơguăt păng tơplih kơsô̆ kơ Jơnŭm jang mŭk drăm dêh char Đăk Lăk, kơsô̆ chih akŏm dang ei 70% kơsô̆ măt bơngai Việt Nam tơrĕk hăm Internet păng mă lơ noh đe mơlôh. Tĕch răt kiơ̆ trong điê̆n tưh hlôi jing juăt hăm bơngai răt yua. Anih jang mŭk drăm gơh chă tơrĕk hăm lơ bơngai răt yua kăp gĭt. Jơnŭm jang hlôi đei lơ tơdrong jang đei iŏk jang, tơgŭm ăn anih jang mŭk drăm Đăk Lăk tơroh tĕch tơlĕch tơmam drăm, mă kăl noh tơmam drăm tơ̆ tơring kiơ̆ pơkăp trư̆k tuyê̆n. Ƀok Hoàng Minh Ngọc Hải ăn tơbăt: “Nhôn hlôi pơih să păng tơguăt hloh 28 anih jang kiơ̆ trong ‘nao vă pơjing minh anih jang tĕch răt ‘lơ̆ng tơnăp, vă tơgŭm ăn dôm anih jang mŭk drăm gơh đei dôm trong jang tơnăp hloh. Dôm trong jang âu adoi đei kơjăp gah tơdrong srĕp păng tơdrong tơnăp. Ah anih jang mŭk drăm gơh yak hadoi hăm dôm anih jang kloh klĕch, adoi nhen hơvơn đei tơdrong tơplih dar deh, inh lui ngeh anih jang mŭk drăm gô đei yua lơ tơdrong hiôk mă trong jang tĕch pơdro điê̆n tưh hơ-‘nhăk ăn păng iŏk lơ jơnei kăp gĭt lơ̆m trong jang ‘nao kơsô̆”.