Tơdrong chih tơbăt đơ̆ng Anih roi tơbăt tĕh dơdrŏ păng khan hơdrol đak pŏh yă, Anih jang Vật lý plei tĕh ăn ƀôh, lăp dang 20 năr blŭng kơ khei 7, tơ̆ apŭng Kon Plông, dêh char Kon Tum đei 70 ‘măng tĕh dơdrŏ. Adrol kơ ‘nŏh Anih âu kŭm tơbăt đei truh kơhrĕng ‘măng tĕh dơdrŏ tơ̆ tơring âu. Arih xa tơ̆ găh pơbăh Hnam kơmăy unh điên Thượng Kon Tum, mŏ Trần Thị Thu păng lơ kon pơlei tơ̆ thôn 3, xăh Tân Lập, apŭng Kon Rẫy tôch pơngơ̆t rim ‘măng iŏk đei nơ̆r tơroi găh tĕh dơdrŏ: “Tơring kon pơlei oei xa tơ̆ âu hơla kơ dơnâu đak. Mưh đei tĕh dơdrŏ ‘nŏh kon pơlei tôch hli. Tơdăh tơ̆ kơpal ti đei tĕh dơdrŏ, đei tơdrong kiơ ‘nŏh mă pơchŏh đak dăh mă đak lip truh ‘nŏh kon pơlei tơ̆ tơring âu gô đei đak lâp đĭ. Hmă hmă đe pơchŏh đak đĭ đei đak lơ̆p bơih, ưh băt vă arih xa thoi yơ bơih?”. 

Tơpă tơ̆ yăn âu, lơ̆m kơhrĕng ‘măng tĕh dơdrŏ khei ‘năr âu ki tơ̆ Kon Plông, hui ‘măng tĕh dơdrŏ pơm ăn kon pơlei băt. Kon pơlei lăp băt tĕh dơdrŏ kiơ̆ đơ̆ng nơ̆r tơroi đơ̆ng anih jang kơpal, anih chih tơdrong kơ tơ̆ng ang đĕch. Yă Bùi Thị Oanh, hnam tơ̆ plei Vi Rin, xăh Đăk Tăng, apŭng Kon Plông pơma thoi âu: “Kon pơlei tơ̆ âu đe ƀôh nhen thoi hmă đĕch. Tam đei bơngai lôch lơ liơ mă hli. Tam ƀôh tơdrong krê hơmơt kiơ ôh. Tơpă ‘nei tơ̆ âu tam đei tơdrong tih kiơ ôh”.

Tơ̆ hơnăp lơ tơdrong tơroi găh tĕh dơdrŏ tơ̆ apŭng Kon Plông, vă kơ kon pơlei huei hli, kŭm nhen huei lăng pơhơi, dôm khul kơdră pơgơ̆r tơ̆ dêh char Kon Tum hơtŏk tơdrong dăr lăng, roi tơbăt, pơtho tơƀôh trong tơjră vă pơm sơđơ̆ng jơhngâm đon kon pơlei păng tơpôl. Mă lei kiơ̆ ƀok Nguyễn Hữu Tháp, Phŏ Kơdră vei lăng kon pơlei dêh char Kon Tum, tơdrong ưh kơ ‘lơ̆ng hlŏh dang ei ‘nŏh jĭ tam mă đei 1 tơdrong tơchĕng hơlen yơ găh tĕh dơdrŏ tơ̆ tơring âu păng ‘nâu jĭ tơdrong sar bar lơ̆m plenh tĕh kơna ưh gơ̆h roi tơbăt hrôih, jing ưh gơ̆h kơchăng hơdrol: “Hơnơ̆ng pơtho ăn dôm anih jang kơpal, tơring tơrang, apŭng Kon Plông jang hơdoi kơjăp hăm dôm Anih tơchĕng hơlen vă hơlen năng rim tơdrong, kơchăng tơjră hăm tĕh dơdrŏ. Dêh char Kon Tum tam mă hlôh vao lơ găh tơdrong vei lăng păng tơjră hăm tĕh dơdrŏ. Athei Anih pơgơ̆r jang kơ tĕh đak găh tang găn tơdrong sar bar tơgŭm tôch ai ăn tơring vă roi tơbăt hơdrol, đei trong tơjră ‘lơ̆ng tơdăh đei tĕh dơdrŏ lơ̆m dêh char”.

Kiơ̆ tơdrong chih jô̆ đơ̆ng Anih roi tơbăt tĕh dơdrŏ păng khan hơdrol đak pŏh yă, Anih jang Vật lý plei tĕh, lơ̆m kơhrĕng ‘măng tĕh dơdrŏ tơ̆ apŭng Kon Plông, dêh char Kon Tum đơ̆ng sơnăm 2022 truh dang ei, tĕh dơdrŏ jăng dêh hlŏh truh 4.7 đei ƀât hơtuch khei 8/2022. Đơ̆ng rŏng kơ tĕh dơdrŏ âu, Anih pơgơ̆r jang kơ tĕh đak găh tang găn tơdrong sar bar hlôi tơlĕch lơ trong jang vă kơchăng tơjră hăm tĕh dơdrŏ, nhen: dăr hơlen năng tơ̆ yăn âu; pơgơ̆r pơtâp pơhrăm hơtŏk đon hlôh vao ăn kăn ƀô̆ tơ̆ đĭ đăng xăh, thĭ trơ̆n lơ̆m apŭng Kon Plông; pơgơ̆r pơtâp trong tơjră hăm đak lip, tĕh dơdrŏ jăng...

Mă lei truh dang ei tam mă đei 1 tơdrong jang khoa hŏk yơ tơchĕng hơlen jrŭ găh tơdrong tơm pơm ăn tĕh dơdrŏ, tơdrong krê hơmơt đơ̆ng tĕh dơdrŏ tơ̆ dôm tơring lơ̆m apŭng Kon Plông, dêh char Kon Tum vă đơ̆ng nŏh tơlĕch đei trong tơjră lăp ‘lơ̆ng.