Năr 23/10, Kơdră chĕp pơgơ̆r apŭng Bảo Lâm, dêh char Lâm Đồng hlôi pơrô̆ athei rim hơnih bơ̆ jang ƀơm truh năm dăr lăng teh hơđang jrŭ ou tơ̆ thôn 4, tơring Lộc Tân. Kiơ̆ tơbăt, tơ̆ teh groi đei teh hơđang dang jrŭ 1,5met, kơjung hơtăih truh kơhrĕng met đơ̆ng groi jur trŭh tơ̆ thŭng. Tăp dăr mĭnh ƀar hơnih đei teh tơdrŭt hơlih iĕ, lơ tơmo tih trăp truh mơjĭt tơ̆n lơ lôk lơ lak, mơmơt tơgrŏr năm tơ̆ bro koeng Cốc đơ̆ng dang yơ ưh kơbăt. Ƀok Đặng Văn Hân, oei tơ̆ thôn 4, tơring Lộc Tân, tơbăt, koeng Cốc đei 20 ŭnh hnam hơrih sa. Rim năr, bro ou đei lơ bơngai truh phĕ hla che păng chă yak tơ̆ trong jơ̆ng groi. Mưh ƀôh groi teh hơđang jrŭ, kon pơlei tôch tơtăm, hơmơt đei tơdrong răm ou to. Hơnih vei lăng kon pơlei apŭng Bảo Lâm hlôi pơrô̆ athei hơnih bơ̆ jang tơring Lộc Tân hơtơ̆p kơƀang tơbăt păng iung jang tang găn hơlou hơmơt đei tơdrong pơrăm.