Kiơ̆ kơtơ̆ng ang đơ̆ng Anih bơ̆ jang vei lăng kon pơlei apŭng Tuy Đức, ah pơgê năr 6/8, lơ̆m tơring teh kơ thôn 4, xah Đăk Buk So đei ƀôh teh chăr să đơ̆ng 5cm truh 80cm, ataih pơhlom 110m. Anih teh chăr âu oei lơ̆m tơring kon pơlei oei sa, pơrăm truh hnam oei kơ 21 unh hnam kon pơlei.

Lơ̆m noh, hlôi đei 2 unh hnam kon pơlei đei hnam iĕ gah rŏng tơpăi đĭ đăng. 19 unh hnam nai đei ƀôh tơchăr ah chơnĕng păng drơh hnam. Jơnŭm pơgơ̆r tơring păng khul jang kơpal apŭng Tuy Đức hlôi hơlen, sơkơ̆t, chih akŏm tơdrong răm, đei nơ̆r chih tơbang tơ̆ anih teh hơlih. Atŭm hăm noh, pơtruh khul jang dah yông kon pơlei lĕch đơ̆ng tơring hli hlơt. Thoi noh, khei năr âu, lơ̆m tơring teh kơ apŭng Tuy Đức, pơđĭ 2 xah sơlam teh 'noh Đăk Buk So păng Quảng Trực đei ƀôh teh hơloh, teh chăr hli hlơt, pơjuă truh tơdrong hơrih, mŭk drăm kơ jê̆ 100 unh hnam kon pơlei.