‘Măng teh hơlih đei ƀôh ƀơ̆t ‘mi tih pơdui đunh lơ jơ lơ̆m gơmăng ‘năr 28/6 hlôi pơm ăn 1 pơnơ̆ jih găn kơ jung vă jê̆ 20m tơ̆ trong iĕ 36, trong Hoàng Hoa Thám, phường 10, pơlei tơm Đà Lạt đei hơlih ƀơ̆t dang 2-3jơ pơ gê 29/6. ‘Măng teh hơlih âu pơm ăn 2 tŏ hnam đei tŭn hơtăih hơnih blŭng a, teh tơmo hơ lih pơm ăn kơ lơ̆p lơ bơngai.

Kiơ̆ kơ ‘nhŏng Lưu Xuân Đua, ŏng dôm bơngai răm, 2 ‘nu bơngai răm ‘noh klo kăn plei tơ̆ apŭng Phú Hòa, dêh char Phú Yên, hơdai hăm hloh 10 ‘nu bơngai nai đơ̆ng Phú Yên năm tơ̆ Đà Lạt jang kŏng nhân ming man. Kơplăh đei ƀôh teh hơlih, lăp đei 2 ‘nu klo kăn bơngai răm âu tep lơ̆m pơ sŭn. Hloh 10 ‘nu kŏng nhân nai tep tơ̆ nai kơ na pŭn ai hoei kơ đei tơdrong truh. Lăp tơdrong đei ƀôh, khŭl linh kơpal dêh char Lâm Đồng hlôi đei măt tơ̆ hơnih âu tơtĕnh tơlĕch jang tơdrong dŏng sar bar, dŏng tơgŭm. Đei 5 ‘nu đei dŏng iŏk tơtom păng chơ ba năm tơ̆ hnam pơgang hơmet.