Dôm năr vă jê̆ têt, tơ̆ hơnih ming man trong glung rĕnh Khánh Hòa – Buôn Ma Thuột jăl trong găn hloh tơring Ea Knếc, apŭng Krông Pach oei mơdŭk mơdăk pơm trong nơnăm.

Tơdrong vă jang trong gre rĕnh Khánh Hòa - Buôn Ma Thuột hơtăih dang 117,5km pơm tơƀưh dêh char Khánh Hòa hăm Dak Lăk. Tơdrong vă jang au đei klăh asong 3 tơnô̆ jang, tơnô̆ 1 kơ yuơ dêh char Khánh Hòa pơm tơ-‘ngla tơmơ̆t jên jang; tơnô̆ 2 kơ yuơ Hơnih tơm vei lăng Trong gre nơnăm ming man; găh tơnô̆ mă 3 kơ yuơ dêh char Dak Lăk iŏk jang. Tơnô̆ jang au đei dêh char Dak Lăk pơjao ăn Hơnih jang vei lăng Tơdrong vă jang Tơmơ̆t jên jang ming man trong nơnăm păng choh jang sa atŏk tơ iung tơring tơrang dêh char pơm tơ-‘ngla tơmơ̆t jên jang tơlĕch ming man. Lơ̆m khei năr Têt Giáp Thìn 2024 au, rim hơnih ming man găh tơnô̆ kơsô̆ 3 jei apĭnh iung jang prăt jơ ‘năr Têt, Hơnih chĕp pơgơ̆r hlôi athei rim tơngla hơnih jang iung jang tĕnh koăng, kơjăp ‘lơ̆ng, ‘noh kăl lăng ba kơjăp truh tơdrong hơpăh ‘lơ̆ng hơ iă ăn bơngai jang vang iung jang ming man kiơ̆ tơdrong tơchơ̆t.